Read Kok Borok MIKA 3 Bible Online

MIKA 3 - Kok Borok bible

MIKA 3

¹Hakhe ang sa kha: o Jakobni bosongni bokhorokrok tei Israilni tẃiphangrok khna di! Norok bujsóino sina nangma ya de?

²Kahamno selengjagwi hamyarokno khe hamjaknairok, ani bororokni bukur khuknairok tei bekrengni bahanno swkaknairok;

³ani bororokni bahanno chánairok, bórokni bukurno khugwi bekrengrokno bokocho-bokocho khe swbainairok tei muitwgo tongma muihan hai khe bophon-bophon khe bahan kwraknairok.

⁴Bórok aphuru Subraiyungni thani kapnai, tamo khe bo bórokni kapmano khna glak; bo bórokni aroni mwkhang uphilnai, tamni hwn ba bórok samung hamya khlai kha.

⁵Ani bororokno lama koró rwnai diyarirokno tẃiwi Subraiyung hai hwnwi sa-o, bórok chána man khe se “Tong kwchang” hwnwi sa-o tei chána rw yarokno khe kebengwi choba khlainani sakhlai-o.

⁶Aboni bagwi norokni hor phaiwi tongo, nubo nuk glak, nini thani mwnakma gerepsaui phainai mungsanobo siniui man glak. Diyarirokni sal habwi páinai tei bórokni salrok khe mwnakjak wngnai;

⁷ulo tamo wngno wng ya abono nuknairok tei ulni kókno swkang sa khlainairok bórok ma lachinai; bórokno Kaitor kók sa ya wngma bagwi bórok bebakno búkhúk ma kholopnai.

⁸Tamo khe ang, Jakobno bini cha yano tei Israilno bini sumsokni kókno sanani bagwi Subraiyung rwmani phan tei suar kupulung wng kha.

⁹Jakobni bosongni bokhorokrok tei Israilni tẃiphangrok khna di, norok bujsóino khe selengjago tei keplengno khe kokoi-mokoi khlai kha,

¹⁰Siyonno thẃi bai tei Jerusalemno samung hamya bai khe tisa lai kha!

¹¹Aroni naikolphangrok rang cháui bujsói khlai-o, ochairok rang naui phrwngo, diyarirok rang bai kók diyari sakhlai-o; ahai phano se bórok Subraiyungni chubamungno khatungwi “Subraiyung chwng bai pal tongo! Chini mungsa hamya wng glak” hwnwi sa lai-o.

¹²Aboni bagwi Siyon haphar chuaijak tẃi khe chuaijaknai; Jerusalem khe swbaiwi rúngjak wngnai tei hathái sakani nok khe buphang bwlwng wngnai.