Read Kok Borok MIKA 7 Bible Online

MIKA 7 - Kok Borok bible

MIKA 7

¹Ang bati se nang kha! sachlang jorani bebak bwtháirok tei angur bwtháirok khagwi páimani yagulo abórokno khakna thángnaisa hai se wng kha, aro khagwi chánani bagwi tei angur bochopbo kwrwi kha tei ang chána muchungmani swkang mun granai khwichangbo kwrwi kha.

²O ha sakani Kaitorno hamjaknai bororok kwma bái kha tei borok kaham khoroksa phano kwrwi laha; bórok butharna bagwi huijagwi naisingwi tong lai-o tei bórok khoroksa tei khoroksano cheirok bai kwcha rw lai-o.

³Bórokni yakrok samung hamya tangna kwrwng máng; tẃiphangrok tei buj thumnairok rang chána sano, borok kotor khe bo bini muchung tẃi’-no sa-o; bórok jottono thansa khe samung hamya khlaina chap lai-o.

⁴Bórokni bere kaham kuk se atakereng hai, bórokni sói kuk borok hwnjaknairokbo sichu busu hai. Norokni mwrwknai bororokno sakhlaina sal tei norokni sátokjaknani sal samphaui phai kha; tabuk bórok pál man ya wngna sampha kha.

⁵Nini nok arini borokno poito ta chá di, kichingnobo bwkha ta bera di; nini khája-o khe kwbagwi thumani nini hikno suda búkhúk bwklap gwnang khe kók sa di;

⁶tamni hwn ba bwsla buphano sak nangjak glak, bwsajwkbo bumano, hamjwkbo bwkrajwkno kebengwi bachanai; khoroksa swk borokni kena ari le bini nokni bororok se.

⁷Tamo khe ang le Subraiyungno se khatungwi tongnai, ang ani mwthangnaisa Kaitorno naisingwi tongnai; ani Kaitor ani khorangno khna-o.

⁸O ani kena arirok, ani birmanno nugwi ta mwnwi di; ang klai phano bacha phinai; ang mwnago achugwi tong phano Subraiyung ani pohor wngnai.

⁹Ang tabuk Subraiyungni jolimano ma manjagwi tongo, tamni hwn ba ang bono kebengwi sumsok khlai kha, tamo khe páithago khe bo chini phaising wngwi kók sanai tei chini bagwi bujsói khlainai; bo ano pohoro tikhlaiwi tubunai; ang bini bujsói khlaimano nuknai.

¹⁰Aphuru khe ani kena arirok omono nugwi ma lachinai, a kena arirok “Buko sla norokni Subraiyung, norokni Kaitor?” hwnwi hwn laimani; ang mokol baithang bo kwlaimano nuknai, bo aphuru lamarokni harpek hai khe káduljaknai.

¹¹A salo nini chokdeualrok tisajaknani sal! A salo nini hani ari marirok phuarjaknai.

¹²Aphuru nini thani ha Asiriya tei ha Ijipni bororok, ha Ijipni simi twimani bororok, twijlang kaisani simi tei kaisa twijlangni bororok tei hathái kaisani simi tei hathái kaisani bororok phainai.

¹³Tamo khe Samung hamya tangmarokni bagwi o ha borok bukcha wngwi thángnai.

¹⁴Nwng nini bororokno nini yakni raidang bai khe mwrwk di, bórokni bugra le nwng se, bórokno kitingjak ha kaham tong phano bórok bolong bisingo saichung-susuk wngjak; bórokno swkang phuruni hai khe Basan tei Giliado mwrwgwi chá rw di.

¹⁵Nwng chwngno ha Ijipni tikhlaiwi tubu phuruni hai khe chwngno uanamasingcha samungrok phunuk di.

¹⁶Dopharok omono nugwi bórokni phan tong phano ma lachinai; bórok bórokni yak bai búkhúk ma muthupnai tei khunju nathong ma khanai;

¹⁷bórok chibuk hai khe tei kubun ha-o ma malnairok hai khe hadlwi ma swlak thung; bórok kwlwibraui bórokni nok kwrakrokni ongkhorwi ma phainai; kirima bai khe bórok Subraiyung chini Kaitorni thani ma phainai tei bo nono ma kirijaknai.

¹⁸Kwthang tong rwknai bini bororokni cha yarok tei sumsokrokno nakarnai nwng hai Kaitor tei sabo tong? Tei bo mol brúm joli phlaiwi tong ya, tamni hwn ba bo pái phlai ya khairokmano rwna hamjago.

¹⁹Bo haino hai chwngno khairok phinai, bo chini cha yarokno yakung bai kádulnai. Nwng chini sumsokrokno twijlang kuthugo khiklai rwnai.

²⁰Sal kwbángma swkang chini chuchusongno nwng Jakobni thani kók rwma tẃi kók narwk kha tei Abrahamno nini pái phlai ya hamjakmano phunuk kha.