Read Kok Borok NAHUM 1 Bible Online

NAHUM 1 - Kok Borok bible

NAHUM 1

¹Ninobino tẃiwi sajakmarok. Elkusni bwsla Nahum imang-mukthang khe phunukjakmani bijap.

²Subraiyung wng kha risi gwnang, yagul sunai Kaitor, Subraiyung wng kha yagul sunai tei thamchi gwnang; Subraiyung bini kena arirokno yagul su-o tei bini kebengnai arirokni banta thamchirok khatiui tono.

³Subraiyung doui joli ya tei phanbo gwnang kuk, phiya ba Subraiyung samung cha yani majra rw ya wng ya. Nokbar kotor tei bangkundri se bini lama, chumuirok se bini yakungni hadlwi.

⁴Bo twijlangno damrogwi ran rw-o, tei bebak twimarokno ran rw-o; Basan tei Karmel mwran sa-o, Lebanonni khumrok hoi-o.

⁵Bini bwskango hatháirok ma kwlwibra-o, hachukrok ma unogo; bini bwskango o ha tei ha saka-o tongnai ma kwlwibra-o.

⁶Bo joli khe sabo tongwi mannai? Bini jolima kutungno sabo soiwi mannai? Bini jolima hór hai khe lukhlaijago, tei abo bai holongrok báiwi ma kukhrubo.

⁷Subraiyung wng kha kaham, tekto manẃi tongma jora-o katijaknai; bo bini aro khorok bomwi tongthai na phainairokno kati rw-o.

⁸Tamo khe bo bini kena arirokno twi lomsa rwui pái rwui páinai, tei bono kebengnairokno mwnakma-o riphriknai.

⁹Nwng Subraiyungni bagwi tamni hamya chap? Bo pái rw suknai; bo bini arirokno uáinwi yagul su glak.

¹⁰Bórok wng kha rap laijak busurok hai, chuak kephekrok hai khe bórok phekjak; bórok chwkap kwran hai khe khamwi páinai.

¹¹Nini aroni khoroksa Subraiyungno kebengwi bachanai hamya chapnai tei hamyani aroni kókbiti nanai ongkhorwi phai ya diba?

¹²Subraiyung hai hwnwi sa-o, “Bórok phankrak tei kwbángma phano wng thung bórok sokomorjaknai tei ma kwma langnai. Ang nono tekto manjak rw phano ang nono tei abo hai khlai phi glak.

¹³Hakhe ang tabuk bórokni horbakno norokni sakani rosaui nanai tei norokno khamani sordukno sachu-ui rwnai.”

¹⁴Subraiyung nini bagwi hai hwnwi dagimung sakhlai-o: “Nini mung tei bosongo tong glak kha; ang nini mwtainokni takjak mwtaimang tei tankhurwi snamjak mwtai mangrokno sokomornai. Nwng natha wng kha aboni bagwi ang nini simalwng mangkhor snamnai.”

¹⁵Iko hatháirokni saka tẃi khoroksa kóktma kaham tubu-ui phaimano, tong kwchangni kók pírnaino naisik di! O Juda, nwng nini ter pandarokno khlai di tei nini chakmarokno rw di, tamni hwn ba nini thani tei borok hamyarok kebengwi bachaui phai glak; bórok sokomorjak súk kha.