Read Kok Borok HABAKUK 1 Bible Online

HABAKUK 1 - Kok Borok bible

HABAKUK 1

¹Omo diyari Habakuk Kaitorni kók khna rwjakmani.

²O Subraiyung tei bwswk kwdwk ang chubamung sanwi chiri khóksinai tei nwng tei bwswk khna yaui tong sinai? “Sátokjak súk kha” hwnwi sauibo tei bwswk nwng phiyók yaui tong sinai?

³Tamo wngwi nwng ano cha yarokno phunugui tong lang tei tongmung hamyano naisik rwui tong lang? Ani bwskango komormung tei sátok-pitok khlaima nukjago; uálaima tei naislermarok ani bwskango phai-o.

⁴Aboni bagwi’-no raida luthur kha tei bujsói w se wng li ya. Hamyarok kahamrokno kitingjak aboni bagwi bujsói wng li ya.

⁵Iko dopharokno naisigwi nai di! Nwng kwmam anw, mwlang cha di! tamni hwn ba ang jora’-ono samung mungsa khlainai, a kókno nono sa phano nwng poito khlaiwi man glak.

⁶Tamni hwn ba ang Babilonno bacha rw kha, bórok wng kha belai mecher tei khairokma kwrwi dopha; bórok buini hano seknani bagwi ha gwnangwi kádulwi thángo.

⁷Bórok wng kha kirimasingcha khe sokromjak; bórok bwkha-o chajakmani abo se bórokni raida.

⁸Bórokni korairok gegumarokni slái se kodo kuk, bórok sanja jorani sẃikurrokni slái thamchi kutung; bórokni korai kanairok hakchalni simi belai kheno doui phai-o; sikruk hai khe bórok monokna bagwi doui phai-o.

⁹Bórok joto ur phnangna bagwi mwkhang suhorwi bwskango swkangwi phai-o; bórok hasingsa bángma swk borok kwbángmano kha bai kha.

¹⁰Bórok habugrarokno thesra kari lai-o tei tẃiphangrokno thwng lai-o. Chokdeualrokno bórok mwnwi lai-o tei abono láina bagwi holong burung khe rúng lai-o.

¹¹Hakhe bórok nokbar hai khe doui thángo; bórok belai khe cha ya khlaiwi majra gwnang wngo; tamni hwn ba bórokni phan se bórokni mwtai!

¹²O Subraiyung ani Kaitor, nwng mol brúm brúm tong phlainai Kwtharsa ya diba? Chwng thwi glak. O Subraiyung nwng bórokno buj thumna bagwi mari khlai kha; o Holongthai Kwrak, nwng chwngno sátogwi khoraina bagwi bórokno chong kha.

¹³Nini mokol aswk se kwthar, nwng cha yano naisigwi man ya tei samung hamyano soiwi tongwi man ya; hakhe nwng ba tamni borok hamyarok bórokni slái kaham kukno monok phuru siring siring khe tong?

¹⁴Nwng bororokno twijlangni á hai khlai kha, twithernai tei makhagwi himnairokni hai khe tẃithernai kwrwi khlai kha.

¹⁵Bo bórok bebaknono biching bai khe tubu kha; bórokno chei bai sopreu tisakha; hakhe abórokno baila-o khe da kha; hakhe bo belai khe tongthogwi bársa kha.

¹⁶Aboni bagwi bo bini chei-o ratharmungrok ratharo tei baila-o satrairok sógo; tamni hwn ba abo bai bórok mojomo man kha tei chámung kahamrok mano.

¹⁷Hakhe bórokba tamo bórokni cheino bukcha khlai khlaina bagwi dopharokno sokomorwi máng tong sinai hai de?