Read Kok Borok HABAKUK 2 Bible Online

HABAKUK 2 - Kok Borok bible

HABAKUK 2

¹Ang ani nok kuchugo tongwi, chokdeualo khe tongnai; bo ano tamo naiwi tongnai ang tentaiwi samano tamo kiphilwi sa abono naisingwi tongnai.

²Hakhe Subraiyung ano hai hwnwi sa kha: “Imang-mukthangni kókrokno holongthai belebo khe swiwi narwk di, hakhe abono porinairok sa phi rwi tongwi man anw.

³Tamni hwn ba imang-mukthang khe phunukjakma abo nang phainani jora tong kho; abo páinani kókno tẃi saui tongo tei abo tatal sa ya. Tumung abo nang phaina lerma hai wngwi tong phano abono naising di; abo na se nang phainai, ler glak.

⁴Nai di bwkha sitra bororok le kwma langnai, tamo khe borok kaham khe bini poito bai se kwthang tongnai.”

⁵Tei se angur bwtwi le bandinai se; thamchi kutungrokbo tongwi tong glak. Bórok kwthwi tongthai hai khe búkhúk kuarma khe khua-o; thwimung hai bo asi yókjak ya. Bórok bebak dopharokno tei bororokno sak sakni bagwi thumo.

⁶Bórok bebakno thesra kariui mwnwiwi ahai hwnwi sa ya da, “Buini manwi-khwnwirokno sakni bagwi thumwi rúngnairok bwswk se hamya sitrano! bui rang ma tẃimani rangrok bai tei bwswk gwnang wngwi tong sinai?”

⁷Nini thani manthai tongnairok tei nwng kwlwibra rwmani bororok achomsa bachaui phai glak diba? Aphuru khe nwng bórokni thani segwi tubujaknai manwirok hai se wngnai.

⁸Nwng dopha kwbángmano phan khe sekpromani bereni yógwi tong rwknai bororok nono phan khe sekpronai, tamni hwn ba nwng borokni thẃi kochok rw kha, kwrẃng-kwrẃng ha-o tei kamiyungrogo tong báinairokno tanthar-súthar khlai kha.

⁹“Samung hamya tangwi nok-núkhungrokni bagwi ajinai tei nok kuchugo tongwi khom-khom tei kirina kwrwi khe tongnairok bwswk se hamya sitrano!”

¹⁰Nwng borok kwbángmano oroi-poroi khlaiwi nini núkhungni lachimung khlaiwi sakno sokomorna-o tubu kha.

¹¹Nini nokni deualni holongthai se nono tentaiwi sanai tei nokni phaklaibo a kókno yachagwi sanai.

¹²Thẃi kochok rwui tei samung hamya bai kamiyung songchanai gaija thung!

¹³Nai di bororok hór bai khamwi pái thung hwnwi simi phankraksa Subraiyung le nai ya, dopharok kwrwi kwrwi’-no uana lai ya diba?

¹⁴Tamo khe twijlango twi kupulung wng tẃi swngcharo Subraiyungni chẃngsacha siyan bai kupulung wngnai.

¹⁵Noksa-nok arini borokno jolimung khan rwui phek rwui bórokno lachimasingcha khe nainairok bwswk se hamya sitrano!

¹⁶Nwng bórom man yaui lachimung se mannai. Nwngbo nung di tei didak-midak wng di! Subraiyungni yagra yakni khuri nini aro phainai tei nini chẃngsacha-o lachimasingcha klainai!

¹⁷Nwng Lebanonno swprakma hai khe nwngbo swprakjaknai; yabrwirok sokomorjakmani abo nono sundru rw anw, tamni hwn ba nwng borokni thẃi kochok rw kha tei kamiyung tei aro tongnairokno sátok-pitok khlai kha.

¹⁸Mwtai mangno le abono taknaisa se tago hwn khe aboni tamo chúkma tong? Takjaknai bokhongo khe daui takma mwtai mangrok tatal phrwng ya diba? Abono taknaisa bini takjak mwtai mangno se bwkha beraui tongo, yang a mwtai mangrok kók se saui man ya!

¹⁹Buphang bai snamjak manwirokno se, bacha di; tei kók saui man yarokno se sicha di, hwnwi sanairok bwswk se hamya sitrano! Abo le phrwngwi da man ba? Nai di abo le rangchak-rukphaini se takjak tei aboni rangmabo kwrwi.

²⁰Tamo khe Subraiyung le bini Noktharo; bini bwskango; bebak swngchar siring siring tong si thung.