Read Kok Borok HABAKUK 3 Bible Online

HABAKUK 3 - Kok Borok bible

HABAKUK 3

¹Diyari Habakuk Sigionot bai khe surima.

²O Subraiyung, ang nini kókno khna kha, nini samungni kókno khnaui ang kirima chá kha. Chini jora-o thangcha rw phi di; chini o jora-obo abono saui man rw di; belai khe thamchi tung phurubo khairoknano ta pok ja di.

³Kaitor Temanni phai-o, Kwtharsa Paran hatháini phai-o. Sela Nokha bini chẃngsacha bai kupulung tei swngcharo khe bini lobmung bai máng kupulung.

⁴Bini chẃngmabo sal kwchẃng hai; bini yakni pohor nongkhoro, Aro’-no bini phan huijak tongo.

⁵Bini swkang swkang bok thángo, bini utung utung khe bemuk hamyarok.

⁶Bo bathak khe ha kwlwibra kha; bo naisik khe dopharok jangrijak kha. Mol brúmni hatháirok oroi-poroi wng bai kha, mol brúmni hatháirok kwlwk bai kha. Mol brúm brúmni simi bini lama le sláijakma kwrwi.

⁷Ang Kusanni kainogo digi-sigi nangma nuk kha; Midiano tongnairokno kwlwibrama nuk kha.

⁸O Subraiyung, nwng ba tamo twimarokno da joli lang? Twijlangrokno twimarokno da nwng ba joli lang, tei aboni bagwi da nwng korairogo kasaui, nini kwplai korai malkhungrogo kasaui berai lang?

⁹Nwng badukhung koknani tiyar wng kha, chakhlarokno seplena naiwi tong kha, nwng twimarok bai khe hano swkak kha. Sela

¹⁰Hatháirok nono nugwi ma kwlwi kha; twi tur khe kochok khlai tháng kha; twi kuthuk khorang kotor khe gurum kha, tei aboni yakrok kuchuk khe kasasa kha.

¹¹Nwng kokmani chakhlarok jiliksama bai tei nini koslu jiliksama bai sal tei tal mwlang chaui ma bathak kha.

¹²Nwng thamchi bai ha-o swkangwi phaisa kha tei jolima bai khe dopharokno kádul phai kha.

¹³Nini bororokno mwthangnani nini chongthar chongjakrokno mwthangnani bagwi nwng ongkhorwi phai kha. Nwng borok hamyarokni bokhorokrokno sukhrup phai kha, bini yaphang buchuk swprak kha. Sela

¹⁴Bórokni sengkrakrok bangkundri phai tẃi khe phaiwi chwngno oroi-poroi khlaiwi swprakna phai khe tei bigrarokno sislap ya sini monogwi tongthoknairok hai khe phai phuru khe nwng bórokni koslu bai khe bórokno yophla kha.

¹⁵Nini korairok bai twijlangno kádul kha, hakhe twirok pupakjaksa kha.

¹⁶Ang abórokno khnaui bwkha kwlwi kha; a khorangno khnaui ani khukchwi somcha kha. ani bekreng phonwi phai kha tei yapri bel kha. Ang siring siring khe chwngno choproknairok ma komorma salno naisingwi tongnai.

¹⁷Khwichang buphang rotomsa ya phano, tei angur budugo bwthái thái ya phano; olibrok thái ya wng phano tei panthoro mungsa chámung thái ya phano; meranogo mera bukcha wng phano, tei guainok musukrok kwrwi phano,

¹⁸hai phano ang Subraiyungni thani tongthoknai; ano mwthangnaisa Kaitorno tẃiwi bwkha srangnai.

¹⁹Kaitor, Subraiyung se ani phan; bo ani yakungno mwswini yathek hai khlai-o tei tongthai kuchugo kasana phan rw-o. Rwchapmung tẃithernaisani banta: Buduk gwnang tammung bai khe.