Read Kok Borok JAPHANIA 3 Bible Online

JAPHANIA 3 - Kok Borok bible

JAPHANIA 3

¹Kebengwi bachanai, sátok-pitok khlainai tei kamiyungno kwthar ya khlainai, nwng bwswk se hamya sitrano!

²Bo, sajakmarokno khunju kan ya, bo khoraijakmarokno sak nangjak ya. Bo Subraiyungni thani bwkha bera ya tei bini Kaitorni phaising sederwi tháng ya.

³Bini tangphangrok singho sokromjak hai; bini buj thumnairok khe geguma akarjak hai, ai ya sak bórok mungsanobo yakar ya.

⁴Bini diyarirok sak nang ya tei poito kwrwi gwja; bini ochairok kwtharno dera rw-o tei kerongno swbai-o.

⁵Bórok bai tongnai Subraiyung wng kha bujsói khlainai; bo cha ya khlai ya. Phung ai brúmno bo bujsói khlai-o, abo hai khlai yaui tong ya; tamo khe cha ya khlainaini le lachima se kwrwi.

⁶“Ang bebak dophano kwma rwui pái kha; bórokni choba khlaijaknai nok kwrakrokno swbai kha; ang bórokni lamarokno bukcha khlai kha, aro khoroksa phano him li ya; bórokni kamiyungrokno swbai kha, aro khoroksa phano tongnai kwrwi tei borok bukcha khlai kha.

⁷‘Bo ano ki se kirinai tei bórok ang khoraimano khna anw; tei bo mokol nuk ya wng glak[2] tei bini saka-o ani sátokmabo klai glak’ hwnwi ang khá kamani, tamo khe bini bororok teibo se samung hamya khlaina bagwi hal-hal khe khlai lai si-o.”

⁸“Aboni bagwino ano naising gra di” hwnwi Subraiyung sa-o, “Ang bachaui dopharokno majra berna salno naising di. Tamni hwn ba ang dopharokno tei harokno thumwi ani jolimani phan phunuknani hwnwi bwkha-o chong kha; ani bwkhani jolimani bai bebak ha khamwi pái báinai.

⁹“Aphuru ang bororokni khukni kókno kahamo slái rwui pái báinai, hakhe bórok bebakno Subraiyungni mungno ma khunai tei bwkha thansa khe bono mon lainai.

¹⁰Ethiopiani twimani ayang narni hani koiwi surinarok, pisa-piring wngjak ani bororok ani banta yapharmungrok tubunai.

¹¹“A salo nwng ano cha ya khe kebengwi bacha kha hwnwi lachimasingcha wngna nang glak; tamni hwn ba ang aphuru norokni bisingni bebak kung chuknai tei thamchi kutungrokno nor báinai tei ani hathái kwtharo kung chuknai tong glak.

¹²Tamni hwn ba ang norokni bisingo borok kwchang tei koinenerokno klangnai. Bórok Subraiyungni mungwi katimung naituknai,

¹³Israilsarokni bere a tong rwknai bororok cha ya khlai glak tei tatalbo sa glak, bórok bandinabo nai glak. Bórok cháui kwchang kwchang khe rokonai, bórokno khoroksa phano sikiri-sokoro khlai glak.”

¹⁴O Siyonni sajwk khorang kotor khlaiwi rw chap di, o Israil chirik di! nini khápang phiyogwi tongthok di, o Jerusalemni sajwk!

¹⁵Subraiyung nono kebengwi buj thumnano rosa kha, bo nini arirokno nor kha. Subraiyung Israilni habugra nwng bai tongo; nwng mungsa birmanno tei kirina nang glak.

¹⁶A salo Jerusalemno hai hwnwi sajaknai: “O Siyon ta kiri di; nini yakno ta bel rw di.

¹⁷Subrai norokni Kaitor norok bai tongo, bo sengkrak, norokno kwplai khlai-o; bo nono tẃiwi tongthoknai, nono hamjakmung bai kwtal khlainai; bo nono tẃiwi khorang kotor khlaiwi rwchapnai,

¹⁸tero tongthok tẃi khe.” Subraiyung hai hwnwi sa-o, “Ang nini komorna kirina tongmano pái rw kha, phiya nini lachimasingchano norwi pái kha.[3]

¹⁹Nai di, ang aphuru nono kusupnairokno sátoknai. Ang yakung-yak man yano phiyóknai tei khibijakrokno thumsa khlainai, ang bórokni lachimung wng thani slái rwui swngchar gwnangwi bólaijakmung tei lobjakmungno rwnai.

²⁰A jora-o ang nono nogo tubunai aphuru nono thumsa khlainai; au, ang nono ha sakani bebak bororokni thani bólai rwnai, nono ani mokol bwskango swkangni hai khe khlai phuru,” hwnwi Subraiyung sa-o.