Read Kok Borok SAKARIA 1 Bible Online

SAKARIA 1 - Kok Borok bible

SAKARIA 1

¹Darias habugra chámani nokha bisik nwini talcharo, Subraiyung, Berekiani bwsla Iddoni busuk diyari Sakariani thani kók sa kha:

²Subraiyung norokni chuchusongno belai jolijak kha.

³Aboni bagwi bórokno hai hwnwi sa di, phan gwnang Subraiyung hai hwnwi sa-o, “Ani thani kiphil di, hakhe angbo norokni thani kiphilnai.”

⁴Norokni chuchusong hai ta wng bai di, swkangni diyarirok bórokno hai hwnwi sa lang kha, “Norokni samung hamyarok yakarwi bwkha kiphil di” tamo khe bórok ani kók khna li ya,

⁵norokni nuchusong buko? Diyarirok mol brúm brúm de kwthang tong ba?

⁶Ang ani selengrok tei diyarirokno dagiui norokni chuchusongno khorai kha, tamo khe bórok bwkha de kiphil si? Aboni bagwi bórok ma manjak kha tei yagulo khe bwkha kiphilwi “Kwplaisa Subraiyung, bini chong tẃi’-no chini samungni manthaino rw kha.”

⁷Darias habugra chámani nokha bisik nwini tal chisa, Sebat talni salnwichibrwi phuru Subraiyung Berekiani bwsla, Iddoni busuk Sakaria diyari bai nukjagwi hai hwnwi sa kha,

⁸“Ang horo khoroksa borokno korai kwchak saka-o kasajak nuk kha! Bo harungni buphang bwlwngo bachajak; bini uklogo kwchak, chaksru-sru tei korai kuphurrok tongo.

⁹Hakhe ang bono hai hwnwi sẃng kha, ‘Ani bugra, abórok tamo?’ Ang bai kók saui tongnai suari, ‘Abórok tamo ang nono phunuk anw’ hwnwi sa kha.

¹⁰Hakhe martel buphang bwlwngo bachaui tongnai a borok sa kha, ‘Abórok’-no Subraiyung ha gwnangwi mwrwkna rohormani.’

¹¹Hakhe bórok buphang bwlwngo bachaui tongnai Subraiyungni suarino hai hwnwi sa lai kha, ‘Chwng bebak ha gwnangwi thángwi nuk kha, bebak swngchar kwchang kwchang’-no tongo.’

¹²Hakhe Subraiyungni suari sa kha, ‘O kwplaisa Subraiyung, nwng nokha bisi snichi jora jolimani Jerusalem bai Judiani kamiyungrokno khairoknani tei bwswk lerno kho?’

¹³Hakhe Subraiyung khorang kwchang tei khairokma kók bai ang bai kók sanai suarino hai hwnwi sa kha.

¹⁴Aphuru khe ang bai kók sanai suari ano hai hwnwi sa kha: ‘Kwplaisa Subraiyung hai hwnwi sa-o, ang Jerusalem bai Siyonni bagwi belai risi nang kha.

¹⁵Ang tong kwchang tei yókjak dopharokno belai joli kha. Srapsa se ang bororokno joli-o; abo se bórok bororokno belai khe sátok kha.

¹⁶Aboni bagwi Subraiyung hai hwnwi sa-o, Ang Jerusalemno uphilwi khairok kha; aro ani nok kwthar tangjak phinai tei kamiyung tisajak phinai.

¹⁷Ahai hwnwibo sa di, Kwplaisa Subraiyung hai hwnwi sa-o: Ani kamiyungrok haino hai chasa phirwi ernai; Subraiyung Siyonno bwkha kochom rwnai tei Jerusalemno saiwi na phinai.’ ”

¹⁸Ang khorok tisaui nai khe bokorong kongbrwi nuk kha.

¹⁹Ang bai kók saui tongnai suarino ang hai hwnwi sẃng kha, “Abórok tamo?” Bo ano hai hwnwi sa kha, “O bokorongrok’-no Juda, Israil tei Jerusalemno oroi-poroi khlainai.”

²⁰Hakhe Subraiyung ano khorokbrwi sor taknairokno phunuk kha.

²¹Ang hai hwnwi sẃng kha, “Bórok tamo khlaina phai lai?” Bo hai hwnwi sa kha, “O bokorongrok’-no Judani bokhorokno tisaui man ya tẃi khe oroi-poroi khlainai; tamo khe o samung tangnairok bórok ha Juda tei bórokni bororokno kebengwi bokorong tisaui oroi-poroi khlainairokno sikiriui bórokni bokorongno swbaina phai-o.”