Read Kok Borok SAKARIA 10 Bible Online

SAKARIA 10 - Kok Borok bible

SAKARIA 10

¹Sachlangni jora-o Subraiyungno uatwi san di, Subraiyung se nono chumui tei nokbar-uatwi rw-o tei jotoni bagwi panthoro bwthái-bumuk thái rw-o.

²Norokni nokni mwtairokno nang-nung ya kókrok sa lai-o, sema nainairok khe tatal khe nugo; imang nainairok khe tatal khe imangni kók sa-o tei tatal kheno bwkhano methebo. Aboni bagwi bororok kwmajak merarok hai ayang-uyang himgurung lai-o; bórok mera mwrwknai kwrwini bagwi belai khe tekto mano.

³Ang mera mwrwknairokno belai joliui thamchi ka kha tei ang tẃiphangrokno[5] sátoknai; tamni hwn ba Kwplaisa Subraiyung bini merarokno naikini khlai-o, Judani núkhungno, bórokno chobani phan gwnang korairok hai khe snamnai.

⁴Bórokni bisingni nok busupni holongthai, ríni nokni khatonjaknai thong, chobani badukhung tei dagiphangrok phai anw.

⁵Bororok pal khe chobani phan gwnang sengkrak wngnai, bórokni kebengnai arirokno laharni hadlwi kádulmani hai khlainai; bórok choba nang lainai, tamni hwn ba Subraiyung bórok bai tongo, hakhe bórok korai kasanairokno mechenwi lachimasingcha khlainai.

⁶Ang Judani bororokno phankrak khlainai, tei Josepni núkhungno mwthangnai. Ang bórokno kiphilwi tubunai, tamni hwn ba ang bórokno khairok kha, ang bórokno uáisabo yakar ya hai wngnai; tamni hwn ba ang bórokni Subraiyung Kaitor ang bórokni surimano khnanai.

⁷Ephraimni bororok khe sengkrakrok hai phan gwnang wngnai, tei bórokni bwkha angur bwtwi nungjak borok hai tongthoknai. Bórokni bwsa-bẃtẃirok abono nugwi bwkha tongthoknai, Subraini thani bórok bwkha phurwi bársanai.

⁸Ang ani bororokno ringwi thansa khe buthup khlainai, tamni hwn ba ang bórokno phiyók kha, hakhe bórok swkangni hai kwbángma wngnai.

⁹Ang bórokno dopharokni bisingo oroi-poroi khlai phano, hakchalo tongwi bórok ano muitu khlainai, bórok bórokni bwsa-bẃtẃirokno naikolwi kiphilnai.

¹⁰Ang bórokno ha Ijip bai ha Asiriyani nogo kiphil rwui tubunai; ang bórokno tongthai pung súk ya sak Giliad bai Lebanonni tubunai.

¹¹Bórok tektoni twijlang tẃi lái phuru twijlangni twi aphalno methepnai, tei kuthukma Nil twimano phwrannai. Asiriya kung chukma bom rwjaknai ha Ijip[6] bini phan kwmanai.

¹²Ang bórokno Subraiyungni jarwi kwrak khlainai, tei bórok bini mung bai tongnai hwnwi Subraiyung sa-o.