Read Kok Borok SAKARIA 12 Bible Online

SAKARIA 12 - Kok Borok bible

SAKARIA 12

¹Israilni bagwi Subraiyungni kók: Nokharokno phehelnai tei o hano snamnai, bororokno rangma rwnai Subraiyung hai hwnwi sa-o.

²Nai di, Ang Jerusalemno bono kitingwi tong bainai dopharokni bagwi arakni khuri hai khlainai; abórok Judano kebengwi phaisanai tei Jerusalembo sekjaknai.

³A salo ang Jerusalemno bororokni thani hilikma holongdap hai khlainai; abono tisana nainairok bórok sak sak se dukhu man bainai. Tei ha gwnangwini dopharok pal khe bo bai nang laina phainai.

⁴A salo ang bebak bórokni korairokno sikirinai, hakhe abono kasanairok kobor ma chanai. Tamo khe bororokno tei korairokno mokol phula khlai phuru ang Judaino khe mokol kaiwi tongnai.

⁵Hakhe Judani bosongrok bórok bai bórok hai hwnwi sa lai anw, “Jerusalemo tong bainai bororok Subraiyung bórokni Phan gwnang Kaitorni phan bai rak kha.”

⁶A salo ang Judani bosongno bolongni hórjlai hai khlai anw, panthorni chẃngsanai homchang hai khlainai; Jerusalem haino hai bachaui phai phuru bo bini yaksi-yagra kitingwi tongnai bororokno monogwi pái bainai.

⁷Subraiyung Judani sengkrakrokno swkang kwplai khlai granai, hakhe Jerusalem tei aroni bororok, Judani slái chẃngsacha wngwi man ya tẃi khe abo hai wngnai.

⁸A salo Subraiyung Jerusalemo tongnairokno kati rwui tonnai, bórokni bisingo kebel kuk se Daud hai wngnai, Daudni bosong Kaitor hai, Subraiyungni suari bórokni bokhorogo tongwi suari hai wngnai.

⁹Hakhe ang a salo Jerusalemno kebengwi sokomorna nainai dopharokno sokomornai.

¹⁰Ang Daudni bosong bai Jerusalemni bororokno khairokmani tei surimani phola supungwi rwnai, hakhe bórok yophlamani bororokno khoroksa tei khoroksa naisigwi sakni songdari sajla thwijakma hai khe swlwksaui kap lai anw.

¹¹A salo Jerusalemo kap laimani haphar Megidoni Hadad-rimonni bagwi kap laimani slái tor kuknai.

¹²Ha, núkhung matheno kap lainai, Daud bosongni núkhungrok, bórokni hiksong; Nathan bosongni núkhungrok tei bórokni hiksong kap lainai;

¹³Lebi bosongni núkhungrok, bórokni hiksong; Simei bosongni núkhungrok tei bórokni hiksong;

¹⁴tei karwi klangjak núkhungrok tei bórokni hiksong kap lainai.