Read Kok Borok SAKARIA 13 Bible Online

SAKARIA 13 - Kok Borok bible

SAKARIA 13

¹A salo Daudni bosong bai Jerusalemni bororokni cha yarokno tei sumsok súna bagwi twimuk phiyogwi rwjaknai.

²Kwplaisa Subrai sa-o, a salo, ang o hani mwtairokni mungno hu-ui khibinai, hakhe kebo bórokno man glak tei a hani diyarirok bai mwtai hamyarokno nornai.

³Khoroksa swk diyari hwnwi gosi phai khe bini buma bai bupha hai hwnwi sa anw, “Nwng Subraiyungni mungwi tatal sa kha, hakhe nwng butharjakna nangnai”; hakhe bono ogo chunai buma tei bupha bo kók diyari hwnwi saui tong phuru yophlaui butharnai.

⁴A salo diyarirok bórokni kók diyarirok tei bórokni imang-mukthangni kókrokni bagwi lachimung man anw; buino bandina bagwi tei diyarini chummano chum glak;

⁵Tamo khe bórok hai hwnwi sa lai anw, “Ang diyari ya, tangwi chánai ja se; chwrai phangsinini simi ang abo hai.”

⁶“Nini khaklabo o kwsarok tamo khe cha lang?” hwnwi tumung khoroksa swk bono sẃng khe, bo hai hwnwi sa anw, “Ani kichingni nogo se a kwsarok cha-o.”

⁷Phan gwnang Kaitor hai hwnwi sa-o, “Bacha di, o seng, ani mera mwrwknaino tei kichingsongno buthar di, hakhe merarok oroi-poroi wng bainai; ani borokno kebengwi ang kosonnai.

⁸Subraiyung sa-o, ha gwnangwi khakthamni khaknwi bororok thwi bainai tei khakthamni khaksa khe yakarwi klangjaknai.

⁹Ang o khakthamno hóro rukphaino sókmani hai khe sóknai tei rangchakno khlaima hai khe khlainai. Bórok ani mungwi surinai tei ang bórokni surima khnanai. Ang hai hwnwi sa anw, ‘Bórok ani borok;’ tei bórok khe, ‘Subraiyung se ani Kaitor’ hwnwi sa anw.”