Read Kok Borok SAKARIA 14 Bible Online

SAKARIA 14 - Kok Borok bible

SAKARIA 14

¹Nai di, Subraini sal sók phai tongo, aphuru segwi tlangnairok manwirokno norokni bwskango banta khlai lainai.

²Ang bebak dopharokno Jerusalem bai choba nang lainani bagwi thumnai, kamiyung sekjaknai, nokni manwirok tlangjak bainai tei bwrwirok romphrejak bainai, kamiyungni khaksa bororok buini ha-o tlangjak bainai, tamo khe teirok khe kamiyungni tlangjak bai glak.

³Hakhe Subraiyung swkangwi a dopharok bai choba nang lainani bagwi ongkhorwi thángnai tei bo chobani salo nang lai tẃi khe nang lai anw.

⁴Bo a salo Jerusalemni salkabai-o tongma tháistwi hathái-o bini yakung bai bachanai; tei tháistwi hathái salka-o kaisa tei salthángbai-o kaisa khe kagwi thángnai hakhe kwcharo harung kuar kaisa wngnai; hatháini khaksa khe salsibai bwkhak tei khaksa khe salgrabai bwkhak norjagwi thángnai.

⁵Subraiyungni hachuk kakjak harung tẃi nwng ma khárnai, ha Judani habugra Ujiani molo bangla kotorma phai phuru ma khár laima hai norokbo ma khárnai. Hakhe Subraiyung ani Kaitor bini suari kwtharrokno logi tubu-ui phainai.

⁶A salo kwbo kwchang glak, tubo tung glak.[8]

⁷Aphuru sal máng wng phlai tongnai (abo Subraiyung saui manjak), hor buya sal buya, sanja-o se pohor wngwi tongnai.

⁸A salo Jerusalemni twi kwthang boui phainai, khaksa khe salkabaini twijlango tei khaksa khe salthángbai-o kochogwi thángnai; Abo sachlang bai masingo bo yorwi tongnai.

⁹Hakhe Subraiyung se bebak hani bugra wngnai; a salo Subraiyung simi, bini mung simi se wngnai.

¹⁰Bebak ha salsibai Gebani simi Jerusalemni salgrabai Rimon jora haphar wngwi thángnai. Phiya ba Jerusalem khe kuchukno tongnai; Benjaminni duglamni simi duglam kwcham jora, busupni duglam jora tei Hananelni nok kuchukni simi habugrani angur bwtwi khlaimani jora abo hai tongnai.

¹¹Aro bororok tongwi tongnai, tamni hwn ba abo tei sokomorjak glak; Jerusalem kati rwjak khe tongnai.

¹²Jerusalem bai choba nangnai dopharokno Subraiyung omo hai khe kosonwi yagul sunai: Bórokni bacha bacha’-no bahan sogwi kwrainai; mukchlwi’-ono bórokni mokol sogwi páinai tei búkhúgo’-no bwslairokbo sogwi tháng bainai.

¹³A salo Subraiyung bororokno achomsa kiri rwui ámang-chímang khlainai, hakhe khoroksa bai tei khoroksa yak tisa lainai tei khoroksa bai tei khoroksa nang lainai.

¹⁴Jerusalemni bagwi Juda suda se choba khlainai. Tei gana-ginini dopharokni rang rí, rangchak, rukphai, gwina-ganthirok kwbángma thumjaknai;

¹⁵kirimasingcha khe bok nangwi korairok, bwrwi korairok, mangingangrok, koraichirkarok tei a bathamrokni bebak mal-matarok thwi bainai.

¹⁶Hakhe Jerusalemno kebengnai dopharokni bisingo kwthang tong rwknairok bisi brúm brúm Phan gwnang Subraiyungno, habugra hai khe khulumna thángnai tei Kainok terni pandarok khlainai.

¹⁷O karwi klangjak dopharokni bere tumung kaisa swk phan gwnang Kaitorno khulumnani tháng ya khe bórokni a ha-o uatwi ua glak.

¹⁸Tumungno Ijipni bororok thángwi abo hai khlai ya khe, kubun dopharokno Kainok terni panda khlai yani bagwi bemuk manjak rwma hai Subraiyung bóroknobo abo hai manjak rwnai.

¹⁹Omo tẃi kheno Ijipno tei kubun dopharokno aro thángwi kainok terni pandarok khlai ya khe sátokjaknai.

²⁰A salo korairokni kotokni kotrong pungnai manwibo “Subraiyungni thani Kwthar” hwnwi swijak tongnai. Subraiyungni nokni sóngmani manwirokbo háyá kwthar bwskangni dangai hai kwthar wngnai;

²¹Jerusalem bai Judani sóngmani manwirok Phan gwnang Subraiyungni thani kwthar wngnai, hakhe yapharnai bororok abórokno muihan rukma samungo phnangnai. Phan gwnang Subraiyungni nogo pai-phal khlainairok tong glak.