Read Kok Borok SAKARIA 2 Bible Online

SAKARIA 2 - Kok Borok bible

SAKARIA 2

¹Ang nai ba borok khoroksani yago sujaknai buduk tẃijak nuk kha!

²Hakhe ang bono hai hwnwi sẃng kha, “Nwng biyango thángnai?” Bo ano hai hwnwi sa kha, “Jerusalemno su-ui aboni kebeng-kuar nainani.”

³Hakhe ang bai kók saui tongnai suari bwskango sederwi phai kha tei khoroksa suaribo bo bai malaina phaiwi

⁴hai hwnwi sa kha, “Khachigwi a siklano saui di: ‘Jerusalem chokdeual kwrwi kami hai khe bororok bai tei mal-matarok bai kupulung wngnai.’

⁵Tamni hwn ba ang abono hórni chokdeual wngwi khobwi tongnai, hwnwi Subraiyung sa-o, ang bórokni bisingo chẃngsacha wngwi tongnai.”

⁶Subraiyung hai hwnwi sa-o, “Do di, do di! Salsibai hani khár di, tamni hwn ba ang norokno nokhani babaibrwi-o nokbar hai khe kobon rw kha.”

⁷Do di, norok tabuk Babilono tongnairok Siyono kiphil di.

⁸Phan gwnang Kwplaisa Subraiyung hai hwnwi sa-o, “Chẃngsacha khlaimani ulo bo ano tanthar-súthar khlainai dopharokni thani ano rohor kha, tamni hwn ba norokno kosonwi dera rwnairok bini hamjakma manwirokno se dera rwma klai-o.”

⁹Nai di, ang bórokni saka-o ani yak tisanai tei bórok bórokni selengrok bai tanthar-súthar khlaijaknai. Hakhe nwng phan gwnang Subraiyung se ano rohoro hwnwi saui mannai.

¹⁰“O Siyonni sajwk, tongthogwi rwchap di! Tamni hwn ba ang phaiwi norok bai pal tongnai,” hwnwi Subraiyung sa-o.

¹¹A salo kwbángma dopharok Subraiyungni thani phainai, hakhe bórok bini borok wng bainai; tei ang norok bai pal tongnai. Hakhe Subraiyung se ano rohoro hwnwi norok saui mannai.

¹²Subraiyung Judano kwthar ha-o bini banta hwnwi gosiui na phinai tei Jerusalemno saiwi na phinai.

¹³O bororok, Subraiyungni bwskango Siring sorok wng di, tamni hwn ba bo bini tongthai kwtharni bachaui phai kha.