Read Kok Borok SAKARIA 3 Bible Online

SAKARIA 3 - Kok Borok bible

SAKARIA 3

¹Hakhe bo ano ochaiyung Josuano Subraiyungni suarini bwskango bachajak nuk kha tei Soitan bini yagra bwkhak bachaui bini cha yano yasi kaina nai tongma nuk kha.

²Subraiyung Soitanno hai hwnwi sa kha, “O Soitan, Jerusalemno chongnai Subraiyung nono kul anw! A borok hórni ekhregwi narwkjaknai bol hai ya diba?”

³Aro khe Josua suarini bwskango rí tena kanwi bachajak.

⁴Hakhe suari bini bwskango bachaui tongnairokno hai hwnwi sa kha, “Bini rí tenano khuk di.” Hakhe bo bono hai hwnwi sa kha, “Nai di ang nini cha yarokno tlang kha tei nono naithok rí kan rwnai.”

⁵Hakhe ang hai hwnwi sa kha, “Bini bokhorogo rí kuphur sórwi rw di.” Hakhe bórok bini bokhorogo rí kuphur sórwi rw kha tei Subraiyungni suari aro bachaui tong kha.

⁶Aphuru Subraiyungni Suari Josuano hai hwnwi sa kha,

⁷“Kwplaisa Subraiyung hai hwnwi sa-o: Tumung nwng ani kók khna khe tei ang tholmani samungrok tang khe, nwng thak phlai ya khe ani nok kwtharrokni barja mannai. Ang oro bachaui tongnai suarirokno nwng bai baksa khe tong rwnai.

⁸Khna di, ochaiyung Josua, nwng tei nwng bai achuknai nini ochai palrok! bórok khe tamo wngna naiwi tong aboni swkangni phunukmari se. Ang ani selengno tubunai, bo Berdum hwnjaknai.

⁹Ang Josuani bwskango holong dulsa bera kha, aboni mwkhang khaksni tongo. Ang aro tankhurwi kók swinai,’ hwnwi Kwplaisa Subraiyung sa-o. Tei salsani salo’-no o hani sumsokno hu-ui khibinai.

¹⁰A salo Phan gwnang Subraiyung hai hwnwi sa-o, nwng nini noksa-nok arirokno ringwi tubu-ui nini angur tei khwichang buphang gana-o phai lai di.”