Read Kok Borok SAKARIA 4 Bible Online

SAKARIA 4 - Kok Borok bible

SAKARIA 4

¹Ang bai kók sanai suari phai phiu kha, hakhe ano muktrwi thángjak borokno sochama hai khe socha phai kha.

²“Nwng tamo nuk?” Hwnwi bo ano sẃng khe ang hai hwnwi sa kha, “Rangchak kahamni thopna buchugo khuri gwnang ang nugo. Aro thopna tháichi tei dosibo twngchi tongo.

³Aro olib buphang phangnwi tongo, kaisa khe yaksi tei kaisa khe yagra-o.”

⁴Ang bai kók sanai suarino ang hai hwnwi sẃng kha, “Bugra abórok tamo?”

⁵Aphuru khe suari hai hwnwi sa kha, “Nwng abórok tamo si ya da?” “I’nhi, ang si ya bubagra,” hwnwi ang sa kha.

⁶Hakhe bo ano hai hwnwi sa kha, “Omo khe Serubabelno Subraiyung kók rwmani se: Nwng phan bai buya, seng bai buya tamo khe ani Phola bai se, hwnwi kwplaisa Subraiyung sa-o.

⁷O hachuk kotorma, nwng tamo? Serubabelni bwskango nwng haphar ma wngnai tei kuchuk kukni holongthaino milik rwnai abo ‘Naithothok, naithok hwnwi hwnjaknai!’ ”

⁸Tei uáisa Subraiyungni kók ani thani sók phai kha,

⁹bo hai hwnwi sa kha, “Serubabel nokni thongla kái kha tei abono snamwi pái rwnai. Abo hai wng khe bororok Ang se nono bórokni thani rohoro hwnwi saui mannai.

¹⁰“Bororok samung kotoirokno sak nang ya ta wng thung. Bórok Serubabelno nokthar tisanani tangjaknai manwirok tẃijak nuk khe tongthoknai.” “Omo kaisni wng kha Subraiyungni mokolrok, abórok swngchar gwnangwi naichomwi tongo.”

¹¹Hakhe ang bono hai hwnwi sẃng kha, “Thopnani yagra bai yaksi-o tongnai olib buphang phangnwirok ba tamo?”

¹²Ang bono tei uáisa hai hwnwi sẃng kha, “O thok[1] lumani rangchakni uásúng kainwi gana-o tongnai Olib buphangni bedek deknwirok ba tamo?”

¹³Bo ano hai hwnwi sẃng kha, “Nwng abórok tamo saui man ya de?” “I’nhi, ang saui man ya bubagra” hwnwi ang sa kha.

¹⁴Hakhe bo hai hwnwi sa kha, “Omo wng kha chongthar chongjak khoroknwirok, bórok’-no swngcharni wngwi Subraiyungno monnanirok.”