Read Kok Borok SAKARIA 8 Bible Online

SAKARIA 8 - Kok Borok bible

SAKARIA 8

¹Subraiyung ano hai hwnwi sa kha:

²Kwplaisa Subraiyung hai hwnwi sa-o: “Ang Jerusalemni Siyonni bagwi belai risi nang kha tei risi nangwi thamchi ka kha.

³Subraiyung hai hwnwi sa-o: Ang Jerusalemo kiphilwi aro tongwinai; abo kók narwknai kamiyung hwnjaknai tei hatháirok kwplaisa Subraiyungni hathái hwnwi nungjak anw.

⁴Kwplaisa Subraiyung hai hwnwi sa-o: Tei uáisa chakrajwk bwrwi tei chwlarok kamiyungni lahar bupra-o yago latha sung twtwi achugwi tongnai

⁵tei lahar kupulung khe bwrwi bwsarok bai chwla bwsarok thwng laiwi tong bai phinai.

⁶Kwplaisa Subraiyung hai hwnwi sa-o: Tong rwknairokni thani a jora abo wngwi manthothok ya wng phano, abo ani bagwi wngwi man glak diba? Hwnwi phan gwnang Subraiyung Kaitor sa-o.

⁷Kwplaisa Subraiyung hai hwnwi sa-o: Ang ani bororokno salkabai hani tei salthángbai hani phiyógwi tubunai;

⁸tei ang bórokno Jerusalemo kiphilwi tubunai. Bórok ani borok wng bainai tei ang khe bórokno sói khe kók narwgwi bórokno tẃitherwi tongwi bórokni Kaitor wngnai.”

⁹Kwplaisa Subraiyung hai hwnwi sa-o: “Kisa swkang Jerusalemo Phan gwnang Subraiyungni nok tang phirjak phuru diyarirokni khukni kók khnanairok norokni yakrokno kwrak khlai si di.

¹⁰A salrokni swkang borokni bagwi eba mal-matarokni bagwi manthairok rwjak ya, aroni ongkhorwi phainai tei aro hap phainairok kebengnai arirokni yakni yógwi tongna lamabo kwrwi, ang bórokno khoroksa tei khoroksano kebeng rwui nang lai rw kha.

¹¹Tamo khe ang yógwi tong rwk bainai bororokno swkango khlaima hai khlai glak, hwnwi kwplaisa Subraiyung sa-o.

¹²Bórok kwchang kwchang khe maichwlwi ma sarnai; angurrok tháinai, ha-o mai-khul wngnai tei nokhani uatwibo uanai; ang o tong rwknai, ani bororokno o hamarirok rwnai.

¹³O Judia bai Israil bosong, norok dopharokni bisingo swraimung nangjak wngwi tong kha, ang norokno phiyógwi hamari rwnai. Ta kiri di, phankrak se wng di.”

¹⁴Tamni hwn khe Kwplaisa Subraiyung hai hwnwi sa-o: “Norokni chuchusong ano joli rw khe ang bórokno sátok kha, ang ani bwkhano slái li ya, Phan gwnang Subraiyung hai hwnwi sa-o,

¹⁵hakhe ang tabuk Jerusalem bai Judiano hamari rwnani chong phi kha; aboni bagwi ta kiri di.

¹⁶Oborok se norok ma khlaithai: khoroksa tei khoroksano kók kubui sa di, bujsói bai khe kwchang kwchang khe buj thum lai di,

¹⁷khoroksa tei khoroksani hamya khlaina ta chap lai di, ereng swmai tangmano ta hamjak di, tamni hwn ba abo bebakno Ang naislero, hwnwi Subraiyung sa-o.”

¹⁸Kwplaisa Subraiyung ano hai hwnwi sa kha:

¹⁹“Phan gwnang Subraiyung hai hwnwi sa-o: Talbrwi, talba, talsni, talchi talrogo ubas tongmani abo Judasongni bagwi tongthokma tei bwkha phurma ter wngnai: Aboni bagwi norok kubui tei khakchangmano hamjak di.

²⁰“Kwplaisa Subraiyung sa-o: kamiyung kwbángma-o tong bainai bororok Jerusalemo phaiwi tong phai bainai;

²¹kamiyung khungsa-o tongnairok tei khungsa kamiyungo thángwi hai hwnwi saui lainai; ‘Hwm tho, chwng thángwi Subraiyungno koi lainai tei kwplaisa Subraiyungno hamari sanwi suri san lai anw; angbo tháng anw.’

²²Kwbángma phan gwnang dophani bororok Jerusalemo phaiwi ano khulumnani tei khairokmung sanwi surinai.

²³Aphuru kwbángma kókni tei dophani borok khorokchi khoroksa Judaisani rí phanchlai romwi hai hwnwi sa anw; ‘Hwm tho, chwng nwng bai baksa thángnai, tamni hwn ba Kaitor norok bai pal tongo hwnwi chwng khna kha,’ hwnwi Phankrak Subraiyung sa-o.’ ”