Read Kok Borok MALAKI 1 Bible Online

MALAKI 1 - Kok Borok bible

MALAKI 1

¹Omo Subraiyungni kók, Malakini[1] khúk tẃi Israilrokno sakhlaimani.

²“Ang norokno hamjak kha” hwnwi Subraiyung sa-o. Tamo khe norok hai hwnwi sa-o, “Bahai khe nwng chwngno hamjak kha ba?” “Esau bai Jakob bórok takhuknwi ya diba?” hwnwi Subraiyung sa-o. “Hai phano ang Jakobno hamjak kha

³tei Esauno khe naisler kha; ang bini hachukni kamirokno bukcha khe ton kha tei bini ha manthairokno hasinglwngni siyalrokni tongthai snam kha.”

⁴Tumungno Idomsong, “Chini kami kotorrok swbaijak phano chwng abono songcha phinai” hwnwi sa khe, Phankrak Subraiyung hai hwnwi sa phinai, “Bórokni ha borok hamyarokni ha hwnjak ya sak tei Subraiyung bai mol brúm brúm jolijagwi tongjaknai ha hwnwi hwnjak ya sak bórok songcha phano ang ahaino ahai swbai phinai.”

⁵Nwng mokol baithang abono nugwi hai hwnwi ma sa anw, “Israil hani arini phatarobo Subraiyung phan gwnang!”

⁶“Bwsla buphano tei seleng bini bugrano bórom khlai-o. Hakhe angbo norokni pha se hwn khe, hakhe norok ano bórom khlaimani le buko sla? Tei tumung ang bugra se hwn khe, buko sla norok ani thani bomwi tongmani? hwnwi Phankrak Subraiyung norokno hwno, o ochairok, ani mungno sak nangjak ya wngnairok. ‘Bahai khe chwng nini mungno hamya khlai kha ba?’ hwnwi norok hwn lai-o.

⁷Norok, ani háyá-o chámung kusum yaphar kha. ‘Chwng abono[2] buphuru sum rw lang ba?’ hwnwi norok sa lai-o, abo khe norok Subraiyungni khalaino sak nang ya khe uansuk kheno norok abono kusum khlai kha.

⁸Norok háyá-o mokol phula malrokno ratharwi yapharmani abo cha ya wng ya diba? Tei petua eba yakung hamya mal-matarok ratharmarok le aro nwng derama kwrwi da hwnwi kha ka? Abo tẃi hairokno hani tẃiphangno rwui nai di; bo abo bai bwkha de phurjakno tei nini bagwi kaham de khlaino? hwnwi kwplaisa Subraiyung sa-o.

⁹‘Hakhe tabuk norok Kaitor chwngno khairok ja si thung’ hwnwi koi lai tiro. Nini yakni omo tẃi yapharmungrokni bagwi bo nono bwkha phurjak anw hwnwi da nwng uansuk te? hwnwi kwplaisa Subraiyung sa-o.

¹⁰Norokni bere khoroksa swk noktharni duglam kholobwi rwma te ani háyá-o khoroksa phano nang-nung ya chatirok phnang ya wng kha mun! Ang norok bai bwkha ham li ya hwnwi Kwplaisa Subraiyung sa-o tei ang norokni yakrokni mungsa yapharmung phano yachak li ya.

¹¹Sal ka thaini simi sal tháng thai jora ani mung bebak dopharokni thani belai kotor tei bebak ha’-ono ani mungwi satrai sókjago tei kwthar yapharmung yapharjago; tamni hwn ba bebak dopharokni thani ani mung wng kha kotor, hwnwi kwplaisa Subraiyung sa-o.

¹²Tamo khe nwng Subraiyungni khalaino kusum hwnwi saui tei aroni chámungno sak nang ya wngwi abono mung hamya khlai kha.

¹³‘Omo tẃirok bwswk se leng rw!’ hwnwi norok sa lai-o tei ani phaising bukung surchaui tongo hwnwi Phankrak Subraiyung sa-o. Norok sekproui manmano eba yathek kwbaino eba bemuk manjakno ani thani yapharna tubu lai-o! Nini yakni ang abono ya de yachak langno? Hwnwi Subraiyung sa-o.

¹⁴Musuk-mera bodolni chúkjak chwla malno rwnani hwnwi chagwi swmai tangwi suda se bo khait gwnang malno se bo Subraiyungni thani yapharo; o bandinai bo swraimung mannai, tamni hwn ba ang wng kha bubagra, ani mung dopharok bórom khlai-o hwnwi Subraiyung Kaitor sa-o.