Read Kok Borok MALAKI 2 Bible Online

MALAKI 2 - Kok Borok bible

MALAKI 2

¹“O ochairok, omo wng kha norokno dagimani.

²Tumung norok ani kók khna ya khe tei norok ani mungno chẃngsacha khlainani chong ya khe ang norokni saka-o swraimung rohornai tei nini hamarini saka-o bo swraimung rwnai, ang bórokni saka-o swraimung se rwui pái kha tamni hwn ba norok ani dagimarokno sak nangjak ya.

³Ang norokni bwsarokno sátoknai tei norokni ratharwi yapharmani a yabrwini bikhino norokni mwkhango silnai tei ang norokno ani bwskangni nornai.

⁴Hai khe o kókno norok saui man di, o dagimarokno ang se rw-o, omo hai khe se Lebi bosongrok bai swmai tangmani a swmai tongwi tongnai hwnwi kwplaisa Subraiyung sa-o.

⁵“Bo bai ani kók kha laimani wng kha thangnani bai tong kwchangni bagwi tei bo ano kirina bagwi ang bono rw-o; hakhe bo ano kibo kiri kha tei ani mungno bórom khlaiwi ani bwskango bacha kha.

⁶Bini búkhúk le chamani kók simi se phrwngo, bini búkhúk bai cha yano phrwng ya. Bo ang bai kwthaui samung kaham khlai-o tei bo bui kwbángmano hamyani kiphilna bagwi chuba-o.

⁷Tamni hwn ba ochairok khe Kaitorni sói phrwngmungno phrwngthai, phiya lukurok khe bini thani phrwngmung manna bagwi tháng thai, tamni hwn ba bo wng kha Phankrak Subraiyungni tẃitun.

⁸“Tamo khe nwng ani lamani phér kha; nini phrwngmung bai borok kwbángmano thutai rw kha; nwng Lebini swmairokno dera rw kha hwnwi Phankrak Subraiyung sa-o,

⁹aboni bagwi ang nono bororok bai sak nangjak ya tei mokol khujak ya khlainai, tamni hwn ba norok ani kók khna ya tei norok phrwngmung[3] babaisa khe phrwng kha.”

¹⁰Chini bebakni’-no pha kaisa ya diba? Kaitor khoroksa susuk’-no chwngno snam ya diba? Hakhe ba tamo wngwi chini bisingo poito chá lai ya wng lai tei chini chuchusongni sakni swmaino sak nang ya wng lai ba?

¹¹Juda poito swbai kha, Jerusalemo Israil khe selengmasingcha samung khlai kha; Judai hamjakmani noktharno dera rw kha tei phatar hani mwtai khulumnairokni bwrwirok bai káijak lai kha.

¹²Omo hai khlainairok phankrak Subraiyungni thani yapharmungrok tubu-ui phai phano Subraiyung bórokno Jakobni bosongni pái rw súgwi pái thung.

¹³Nwng omo haibo khlai-o: Subraiyungni háyáno nwng muktwi kochok rw-o, nwng swlwksaui kabo, tamni hwn ba nini yapharmungno bo tei sak nangjak ya phiya abono bwkha bai khe nini yakni yabo yachak ya,

¹⁴“Bo tamni bagwi yachak ya wng?” hwnwi nwng sẃngo, tamni hwn ba Subraiyung nwng sikla phuru nini hikno káijak phuru swmai tangmani sakki wng kha; bo nini mángsong wng phano se tei swmai rwui hiksong phano se nwng kók narwk ya wngwi bini poitono swbai kha.

¹⁵Chwngno ba Kaitor khoroksa susuk rangma rwui kwthang khe snam ya diba? Bo tamono muchungjak? Abo khe Kaitorno bórom khlaiwi tongnai chwrai-khonai. Aboni bagwi sak sakno naiwi nai di tei nini sikla jorani hikno bandiui poito ta swbai di.

¹⁶“Tamni hwn ba ang kak laimano belaino selengo, hwnwi Israilni Subraiyung Kaitor sa-o tei khoroksa swkni kanmung chummungno samung sitra bai khe bólnairokno ang naislero hwnwi Phankrak Subraiyung sa-o. Aboni bagwino norok sak-sak hus wng di bandiui poito swbainai ta wng di.”

¹⁷Norok kók máng saui Subraiyungno leng rw kha. Hai phano norok “Chwng bono bahai khe leng rw lang ba?” hwnwi sa lai tiro. “Samung hamya khlainairok khe Subraiyungni mokolo kaham,” hwnwi saui tei “Bujsói khlainai Kaitor buko?” hwnwi saui bono leng rw-o.