Read Kok Borok MATHAI 12 Bible Online

MATHAI 12 - Kok Borok bible

MATHAI 12

¹Aboni ulo Sabat salo Jisu gom bwlwng kwchar tẃi himwi thángmani. Bini sagrirok ok khuijagwi gom bwtang cherwi chána cheng lai kha.

²Pharisairok abono nugwi Jisuno hai hwnwi sa kha, “Nai di, nini sagrirok Sabat salo abo hai khlaimani abo chini Kerongno swbaima klai-o.”

³Jisu hai hwnwi sa kha, “Daud bai bini logisongrok ok khuijak phuru tamo khlai kha abo norok poriui nai ya kho diba?

⁴Bo Kaitorni nogo hap kha, hakhe Kaitorni thani barokmani a ruti bo bai bini logisongrok chá lai kha; aile ochairok simi se a ruti cháui mano, bui chá khe Kerong swbaima klai-o.

⁵Eba khe Sabat brúm brúm noktharni ochairok Sabat salni kerongno swbai phano majra klai ya, abono norok Musini Kerongo ma pori ya kho diba?

⁶Ang norokno o kók sa-o, oro noktharni slái phano mungsa kotor tongo.

⁷‘Ang pun tok nai ya, khairokma se nai-o,’ hwnwi elembakni o kókno norok saui man sukma te norok majra klai ya borokno majra ber glak kha mun;

⁸tamni hwn khe Borokni Sajla wng kha Sabat salni bokhorok.”

⁹Jisu aroni kutulwi thángwi bórokni thumnogo tháng kha.

¹⁰Aro yak hoichajak borok khoroksa tongo. Aro baksa borok Jisu samung cha ya khlai khe bono majra berna naiwi tongo. Hakhe bórok bono hai hwnwi sẃng kha, “Sabat salo ham rwmani abo Kerong swbaima da klai?”

¹¹Jisu hai hwnwi sa kha, “Norokni bere khoroksa swkni mera masa Sabat salo hakhoro klai khe bo abono tisa anw bla?

¹²Merani slái borok tor kugo! Aboni bagwino Sabat salo chubana samung khlai mano hwnwi chini Kerong sa-o,”

¹³Hakhe bo a borokno “Yak pholok di,” hwnwi sa kha. Bo yak pholok kheno tei kongsa yak hai’-no a yakbo ham phi kha.

¹⁴Pharisairok tháng laiwi Jisuno butharna bagwi kók chap lai kha.

¹⁵Omono khna kheno Jisu aroni tháng kha, hakhe borok kwbángma bono rwkthar kha. Bo bebak hamyano ham rw kha,

¹⁶hakhe bini kókno buino ta sa di hwnwi bórokno sa kha.

¹⁷Omo tẃi khe Jisaia diyarini khúk tẃi Kaitor hai hwnwi samani abo nang phai-o,

¹⁸“Iko, ani seleng, bono’-no ang chongmani, bono’-no ang hamjago, bo bai’-no ang khá kochomo. Bono’-no ang ani Phola rwnai hakhe bo bebak bororokni thani ang buj thumna hwnmano sanai.

¹⁹Bo uálai glak, chiri-mokorok wng glak, bo lama lama sotonwi kók sa glak.

²⁰kahamno kwplai khlai ya sak bo nol-khagra swbai glak, chati thwi muru muru buthar glak;

²¹phiya bebak dophano bono khá tung anw.”

²²Aphuru borok khoroksa Jisuni thani tubujak kha, a borok mwtai hamya kolobjakma bai mokolbo nuk ya, kókbo man ya. Jisu bono ham rw kha, hakhe bo mokolbo nuk kha, kókbo saui man kha.

²³Lukurok uanajagwi “Bo Daudni Sajla ya wng glak diba?” hwnwi sa lai kha.

²⁴Omono khnaui Pharisairok hai kwnwi sa kha, “Mwtai hamyarokni bokhorok Belsebulni phan bai se bo mwtai hamya rwkhlai-o.”

²⁵Bórok uansukma kókno Jisu saui manẃi bórokno hai hwnwi sa kha, “Hani bororok uálai kak lai khe a ha tong glak; taun khungsani bororok eba khe núkhung khungsani bororok uálai-kak lai khe abo’-bo bái thángnai.

²⁶Abo hai’-no Soitanni ha-o dolsa tei dolsa bai uálai khe abo kak laima se klai-o, hakhe a ha dakti’-no bái thángnai.

²⁷Belsebul rwmani phan bai se ang mwtai hamya rwkhlai-o hwnwi norok sa lai-o. Hai hwn khe norokni bororokno mwtai hamya rwkhlainani phan sabo rw sla? Norokni bororokno norokni o kókno cha ya hwnwi phunugo.

²⁸Ahai ya, Kaitorni Phola se ano mwtai hamya rwkhlainani phan rw-o, abo’-no Kaitorni ha norokni thani sók phai kha hwnwi sijak rw-o.

²⁹“Phan gwnang borokno swkang baira kha ya khe bini nogo habwi manwirok segwi tubu-ui man ya; kha khe se bini nok sodro-podro khlai mano.

³⁰“Ani bwkhak tong ya borok bo ani kena ari se; ang bai thumchru ya khe a borok piring-poroi se khlai-o.

³¹Aboni bagwino ang norokno o kók sa-o: bororok jesa sumsok khlaimani, jesa kók hamya samani abo nakarjakna tongo; tamo khe Phola Kwtharno hamya sanai borok bo nakarjak glak.

³²Borokni Sajlano hamya sanai borok bo nakarjakna tongo, tamo khe Phola Kwtharno hamya sanai borok bo nakarjak glak; tabuk buya, ulo buya.”

³³“Bwthái kaham manna khe buphang kaham wngna nango; buphang hamya khe bwthái hamya mannai, Buphang bini bwthái bai’-no sinijago.

³⁴Norok chibukrok; norok hamya twtwi bahai khe norok kók kaham saui man? Bwkha-o kupulung wngwi tongma hai’-no borok búkhúk bai sa-o.

³⁵Borok kaham bwkha-o kaham chu-ui tongmani aroni kaham tikhlai-o; borok hamya ba hamya chu-ui tonmani aroni hamya tikhlai-o.

³⁶“Ang norokno o kók sa-o: Jerani salo joto kók nang ya saui phaimani aboni isap ma rw anw.

³⁷Nwng majra gwnang da majra kwrwi abo nini kók bai’-no nwng manjak anw.”

³⁸Aphuru khoroknwi khoroktham Kerong phrwngnairok bai Pharisairok hai hwnwi sacha kha, “Hodakra, nwng soidomni samung khlaimani chwng kisa naina muchungo.”

³⁹Jisu hai hwnwi hwn kha, “Tabukni bororok bwswk se chengta gwja! Kaitorno bwswk se kiri ya gwja! Norok ano soidom phunuk di hwn kho. I’nhi, Jona diyarini a soidomno karwi tei mungsa soidom phano norok phunukjak glak.

⁴⁰Jona á kotorni bohok bisingo saltham hortham tongma tẃi’-no Borokni Sajlabo saltham hortham ha tola-o tong anw.

⁴¹Jerani salo Ninobini bororok bachaui norokno majra ber anw, tamni hwn khe bórok Jona kók samano khnaui sumsok yakar kha. Ang norokno o kók sa-o, oro Jonani sláibo teibo mungsa kotor tongo.

⁴²Jerani salo ha salgrabaini isiri bachaui norokno majra ber anw, tamni hwn khe Solomonni kók elemi khnanani hwnwi bo ha buchukni phai kha; ang norokno o kók sa-o, oro Solomonni sláibo teibo mungsa kotor tongo.”

⁴³“Borok khoroksa swkni sakni mwtai hamya ongkhor khe, bo ha kwrano himgurungwi bathakthai naituk gra-o. Ulo kwrẃngsa phano nuk ya khe

⁴⁴‘Ang ongkhorwi phaima a nogo tháng phir anw,’ hwnwi bo khá bising bising sa-o. Hakhe bo kiphilwi thángwi a nokno bukcha, pharjak-sipjak tei thiti nugwi-o.

⁴⁵Abono nugwi thángwi bo bini slái chengta mwtai hamya tei maksnino ringwi tubu-ui arono aro tong phai-o. Hakhe a borok swkangni slái teibo digi-sigi wngo. Tabukni borok hamyarokbo abo hai’-no wngnai.”

⁴⁶Jisu bororok bai kók saui tong phuru bini buma bai bini takhuksong phaiwi sók phai kha, Bo bai kók sa laina hwnwi bórok phataro bachaui tong lai kha.

⁴⁷Hakhe aroni borok khoroksa bono hai hwnwi sa kha, “Nahar di ayang, nini nwma bai nini takhuksong nwng bai kók sa laina hwnwi phataro bacha laijak.”[1]

⁴⁸Jisu a kók sanaino hai hwnwi sa kha, “Sabo ani ama? Sabo ani takhuksong?”

⁴⁹Hakhe bo bini sagrirokno yasi surwi hai hwnwi sa kha, “Iko, bo se ani ama, bórok se ani takhuksong!

⁵⁰Chuknohani Aphani muchung tẃi tongnai borok bo’ se ani takhuk, ani bukhuk, ani ama.”