Read Kok Borok MATHAI 14 Bible Online

MATHAI 14 - Kok Borok bible

MATHAI 14

¹Aphuru Galilini habugra Herod Jisuni kók khna kha.

²Bo bini tangphangrokno hai hwnwi sa kha, “O borok kubui’-no baptisma rwnai Johon se thangcha phi kha. Aboni bagwino bini bisingo omo tẃi samung khlainani phan tongo.”

³Herod Johonno rom rw kha, bono kha rwui alongo chop kha; bini takhuk Philipni bihik Herodiani bagwi se Herod omo khlai-o.

⁴Tamo wngwi hwn khe baptisma rwnai Johon Herodno “O bwrwino namani bai nini cha ya!” hwnwi sama tongo.

⁵Hai kheno Herod bono butharna nai kha, tamo khe bo bororokno kirijago, bórok le Johonno diyari hwnwi hwn bla.

⁶Herodni achaima sal pálai phuru Herodiani bwsajwk aswk borokni bwskango mwsa kha, hakhe Herod belai hamjagwi

⁷bono “Nwng ano jesa phano san khe ang abono nono rw anw,” hwnwi swmai tang kha.

⁸Bini bumani kók bai bo aphuru khe hai hwnwi san kha, “Baptisma rwnai Johonni bokhorokno mairango khe aro ano rw phai di!”

⁹Bugra belai khá hamya wng kha, hai phano panda phainairokni bwskango swmai tangma bai bo sanmano rw di hwnwi dagi kha.

¹⁰Hakhe bo alongo Johonno tan rw kha.

¹¹Johonni bokhorokno mairango khe tubu-ui a bwrwimano rw phai kha, bo abono bumani thani tlang kha.

¹²Johonni sagrirok phaiwi bini mang kwthwino tlangwi phobwi kha; hakhe bórok thángwi Jisuno saui kha.

¹³A kók khna kheno Jisu aroni kutulwi rung bai siring siring kwrẃngsa-o tháng kha. Bororok abo saui manẃi taunrokni ongkhor baiwi ha tẃi bini thani tháng lai kha.

¹⁴Jisu rungni ongkhor phuru borok kwbángmano nugwi khairokjak kha, hakhe bórokni bere hamya tongnairokno ham rw kha.

¹⁵Sanja wng kheno bini sagrirok bini thani phaiwi hai hwnwi sa kha, “Belai lerwi tháng kha, oro mungsa phano manthok ya. Kamirogo thángwi chámung paiwi manna tẃi khe o bororokno rohor si di.”

¹⁶“Bórok thángna nang glak; norok’-no chá rw di,” hwnwi Jisu sa kha.

¹⁷“Chini thani bebagwi ruti lepba tei á maknwi se tongo,” hwnwi bórok sa kha.

¹⁸“Abórokno ani oro tubu di,” hwnwi Jisu sa kha.

¹⁹Bo bororokno jabra-o achuk di hwnwi hwn kha; hakhe bo ruti lepba bai á maknwino naui nokhasa naisaui Kaitorno hambai rw kha. Bo a ruti swkagwi sagrirokni yago rw kha, hakhe sagrirok a bororokno rw kha.

²⁰Jotono ok pungwi chá kha. Hakhe bára tong rwkmano sagrirok khochamani ura khung chiknwi pung kha.

²¹Chánairok bwrwirok bai chwrairokno karwi chwlarok simi’-no basai ká twtwi.

²²Hai kheno Jisu bini sagrirokno rungo kasa rwui twibom ayang naro bini slái swkang’-no rohor kha; yang khe bo lukuroknobo rohor kha.

²³Bororokno rohor bai khe bo suri sanna bagwi tepsa khe hathái-o kasaui kha. Sanja wng khe Jisu aro saichung.

²⁴Aphuru a rung twi rukung bai chalo; twi aphal bai rung didagwi tong kha, tamni hwn khe nokbar pail cha ya khe sibchajak.

²⁵Phungni kaitham bai kaidokni kwcharo Jisu twi saka tẃi himwi bórokni thani phai kha.

²⁶Sagrirok bono twi saka tẃi himwi tongma nugwi belai kirijak kha, “Omo ba burasa se bla!” hwnwi kirima cháui chirikhók lai kha.

²⁷Jisu logi logi’-no bórokno “Ta kiri di! Omo ang se, khá tor di!” hwnwi sa kha.

²⁸Aphuru khe Pitor hai hwnwi sacha kha, “Subrai omo kubui’-no nwng’-no hwn khe twi saka tẃi nini thani phai di hwnwi ano hwn di.”

²⁹“Phai di,” hwnwi Jisu sa kha. Hakhe Pitor rungni ongkhorwi Jisuni thani thángna hwnwi twi saka tẃi him kha.

³⁰Nokbar phaima nuk kheno bo kirijak kha, hakhe twi-o kwlwkna nai kha. “O Subrai, ano mwthang di!” hwnwi bo chirikhók kha.

³¹Logi logi’-no Jisu yak phologwi bono rom kha, “Nini poito bwswk se kisa! Tamo wngwi nwng bwkha udru mudru wngjak?” hwnwi bo sa kha.

³²Bórok khoroknwi’-no rungo kasa lai kha, hakhe nokbarbo thak kha.

³³Rungo tongnai sagrirok Jisuno khulum lai kha. “Nwng kubui’-no Kaitorni Sajla!” hwnwi bórok hwn lai kha.

³⁴Bórok twibom láiwi Genesaret ha-o phai sók phai kha.

³⁵Aroni bororok Jisuno sini sok kha, hakhe bórok “Hamya tongnairokno tubu-ui phai di,” hwnwi ha gwnangwi kók kwchár kha, hakhe bebak hamyarokno Jisuni thani tubu kha.

³⁶Bórok Jisuno “Hamyarokno nini dulai buchuk phano tang rw jaba di,” hwnwi koiwi lai kha. Hakhe tangnairok bebak’-no ham rwjak bai kha.