Read Kok Borok MATHAI 17 Bible Online

MATHAI 17 - Kok Borok bible

MATHAI 17

¹Nokha saldokni ulo Pitor tei Jakob bai bini takhuk Johonno simi tlangwi Jisu hathái kuchugo tháng kha.

²Bórok naisigwi tong twtwi’-no bo mul philwi tháng kha, bini mwkhang sal hai chẃng kha, bini rírok pohor hai kwchẃng wng kha.

³Aphuru a sagri khorokthamrok Elia bai Musino Jisu bai kók sa laiwi tongma nuk kha.

⁴Hakhe Pitor Jisuno hai hwnwi sacha kha, “Subrai, chwng oro tongmani abo kahamno, nwng hwn khe ang oro basai khungtham tang anw, nini khungsa, Musini khungsa, tei khungsa Eliani.”

⁵Bo kók saui tong phuru chumui kwchẃng dolasa bórokno kobol phai kha, hakhe chumui bisingni o kók sajak kha, “Omo ani khájani Sajla. Ang bono’-no belai khe hamjago; bini kók khna di!”

⁶Sagrirok o kók khnaui belai kirijak lai kha, hakhe ha-o klai bom lai tong kha.

⁷Jisu phaiwi borokno tangwi “Bacha di, ta kiri di,” hwnwi hwn kha.

⁸Hakhe bórok naisigwi khoroksano phano nuk li ya, Jisuno simi se nuk si-o.

⁹Bórok hatháini ongkhorwi phai phuru Jisu bórokno hai hwnwi ragdama khe sa kha, “Borokni Sajla kwthwini mwthangwi tisajak ya sak norok o nukmano kebono ta sa di.”

¹⁰Hakhe sagrirok Jisuno hai hwnwi sẃng kha “Elia se swkang ma phai granai hwnwi tamo wngwi Kerong phrwngnairok saui tong sla?”

¹¹Jisu hai hwnwi sa kha, “I’n, Elia swkang phai granai, hakhe bo joto thiti khlainai.

¹²Tamo khe ang norokno o kók sa-o, Elia phaiwi tháng kha, tamo khe bororok bono sini li ya, bórok bono khlaina muchung tẃino khlai kha. Abo hai’-no Borokni Sajlabo bórok bai sátokjaknai.”

¹³Aphuru khe bo bórokno baptisma rwnai Johonni kók se sa-o hwnwi sagrirok saui man kha.

¹⁴Bórok lukuni thani kiphil khe borok khoroksa phaiwi Jisuni yakung yaphango klai

¹⁵hai hwnwi sa kha, “Hodasa, angslano kisa khairok ja di. Bo mirka gwnang, hakhe belai lengma bai uáisa uisu hórrogobo twirogobo klai trwngo.

¹⁶Ang bono nini sagrirokni thani tubu kha, hai phano bórok bono ham rwui man li ya.”

¹⁷Jisu hai hwnwi sa kha, “Norok bwswk se poito kwrwi gwja! Norok bwswk se cha ya gwja! Norok bai ang tei sal bwswk ma tongna nangno? Tei sal bwswk norokno khá ma lokna nangno? A chwraino oro tubu di.”

¹⁸Jisu a mwtai hamyano damrok khe abo ongkhorwi tháng kha, hakhe a chwrai logi logi’-no ham kha.

¹⁹Aphuru sagrirok tepsa khe phaiwi Jisuno hai hwnwi sẃng phai kha, “Chwng tamo wngwi a mwtai hamyano rwkhlai man li ya sla?”

²⁰Jisu hai hwnwi sa kha, “Norokni poito kwrwi sukni bagwi se abo hai wngo. O kókno muitu narwk di, horua bwchlwi swk phano norokni poito tong khe norok o hatháino ‘Oroni uro tháng di!’ hwn khe abo thabo thángnai. Norok khlai man ya abo tẃi mungsa phano tong glak.

²¹[Ubas khe suri san khe simi se omo tẃino rwkhlai mano, tei mungsabo man ya.]”

²²Sagrirok bebak’-no Galili-o kuthum lai khe Jisu bórokno hai hwnwi sa kha, “Borokni Sajla bororokni yago yapharjakna kasu kha.

²³Bórok bono butharnai, hai phano bo salthamni salo mwthangwi tisajaknai.” Hakhe sagrirok khá hamya wngjak bai kha.

²⁴Jisu bini sagrirok bai Kapharnaumo phai khe noktharni teks romnairok phaiwi Pitorno hai hwnwi sẃng phai kha, “Norokni hodakra noktharni teks da rw?”

²⁵“I’n, rw-o,” hwnwi Pitor sa kha. Pitor noksingo hap khe Jisu hai hwnwi sẃng sok kha, “Simon, nwng le tamo hwn sla? O swngcharni bugrarok le saboni thani teksrok masulrok rom sla? Hani borokni thani da, phatarni borokni thani da?”

²⁶“Phatarni borokni thani,” hwnwi Pitor sa kha. Jisu hai hwnwi sa kha, “Hakhe ba hani bororok khe teks rwna se nang ya bla!

²⁷Hai phano chwng o bororokno kwcha rwna nai ya, aboni bagwi twibomo thángwi bosoi karwi di. Puila nangmani áno tisa di, hakhe bini bukhuk phiyok khe nwng rang man anw, abo nini bai ani noktharni teks rwna chúk anw; abono naui chini teksno rwui di.”