Read Kok Borok MATHAI 18 Bible Online

MATHAI 18 - Kok Borok bible

MATHAI 18

¹Aphuru sagrirok phaiwi Jisuno hai hwnwi sẃng phai kha, “Kaitorni ha-o sabo tor kuk?”

²Jisu chwrai khoroksano ringwi tubu-ui bórokni kwcharo bacha rwui

³hai hwnwi sa kha, “O kókno muitu narwk di, norok mul philwi chwrai hai wng ya sak Kaitorni ha-o habwi man glak.

⁴Koinene wngwi o chwrai hai wngnai borok bo se Kaitorni ha-o kotor kuk.

⁵Phiya ani mungwi omo tẃi chwraino yachaknai borok bo ano’-no yachago.”

⁶“Tumungno khoroksa swk ano poito khlai tongnai o chwrai basrarokni bere khoroksa swkno sumsogo khiklai khe[5] a borokno totra holongdap kotorma khaui twijlango khiklai rwma se ham kugo.

⁷Borokno sumsogo khiklainai abo tẃi manwirok tongmani abo swngcharni bagwi bwswk se hamya. Abo hai wng máng tong anw, tamo khe abono khlainai borok bwswk se hamya sitrano!

⁸“Hakhe nini yakung eba yak nono sumsogo khiklai khe abono tansu-ui khibi di. Yakung kongnwi yak kongnwi gwnang khe thwi phlai ya hóro khiklaijakmani slái nwng yakung kongsa eba yak kongsa kwrwi khe mwthangjakma se ham kugo.

⁹Nini mokol nono sumsogo khiklai khe abono ekhregwi khibi di. Mokol kolnwi gwnang khe morkeni hóro khiklaijakmani slái nwng mokol kolsa kwrwi khe mwthangjakma se ham kugo.”

¹⁰Hakhe norok o chwrai basrarokni bere khoroksano phano sak nang ya ta wng di. Ang norokno o kók sa-o, chuknoha-o bórokni suarirok chuknohani ani Aphani bwskango máng tongo.

¹¹[Tamni hwn ba Borokni Sajla kwmanairokno se mwthangna phai-o.]

¹²“Norok tamo hwn? Borok khoroksa swkni mera maksarani bere masa kwma khe bo tamo khlaino? Bo a mak chukuchi-chukurokno sula-o klangwi a kwmanaino rutukna tháng glak diba?

¹³Ang norokno o kók sa-o, bo abono man khe a mak chukuchichuku kwmayarokni slái o maksani bagwi belai tongthokjak anw.

¹⁴Abo tẃi kheno chuknohani norokni Pha bo omo tẃi chwrai basrarokni bere khoroksano phano kwmajakna muchungjak ya.”

¹⁵“Tumungno nini takhuk nini thani sumsok khlai khe hakhe nwng bini thani thángwi bini cha yano phunuk di. Tamo khe omo norok simi tepsa khe khlai di. Bo nini kók na khe nwng bono man phi kha.

¹⁶Phiya tumungno bo nini kók na ya khe ‘Khoroksa swkno majra berna hwn khe sakki khoroknwi eba khoroktham kók thansa wngna nang anw,’ hwnwi elembago sama hai nini logi tei borok khoroksa khoroknwino tlang di.

¹⁷Tumungno bo bórokno kók suda na ya khe hakhe mothano khupro-ui sa di. Mothani kók suda na ya khe hakhe bono buini borok hai eba teks romnai hai hwnwi rom si di.”

¹⁸“Hakhe ang norokno o kók sa-o, norok o swngcharo kwcha rwmani abo chuknoha-obo kwcha rwjaknai; norok o swngcharo yakarmani abo chuknoha-obo yakarjaknai.

¹⁹“Ang norokno o kókbo sa-o, o swngcharo norokni bere khoroknwi kók tháisa wngwi san khe chuknohani ani Apha abono rwnai.

²⁰Tamni hwn khe borok khoroknwi eba khoroktham ani mungwi kuthum khe ang aro bórok bai baksa tongo.”

²¹Hakhe Pitor Jisuni thani phaiwi hai hwnwi sẃng phai kha, “Subrai, ani takhuk ani thani uái bwswk sumsok khlai khe ang bono uái bwswk nakarnai? Uáisni da?”

²²Jisu hai hwnwi sa kha, “I’nhi, uáisni ya, uái snichi máng uáisni nakar di.

²³Tamni hwn khe Kaitorni ha wng kha omo hai se: bugra khoroksa bini selengrokni isap nainani khá chong kha.

²⁴Bo isap naui tongma jora seleng khoroksa bini thani tubujak kha, bini lakai chisai.

²⁵A lakai su bainani a selengni rang kwrwi, hakhe lakai su baina bagwi bugra hai hwnwi dagi kha, ‘Hik-sa bai tei bebak tong-kwrwi bai baksa nwng phaljak di.’

²⁶Hakhe a seleng bini bugrani yakungo klaiwi ‘Ano khá lok ja di, ang bebak’-no su-ui rw anw!’ hwnwi koi kha.

²⁷Bugra bono khairokjak kha, hakhe bini lakaino yakarwi bono phiyógwi rohor kha.

²⁸“A seleng tháng khe’-no bo hai tei khoroksa selengno malai kha bini thani a selengni kisa lakai tongo. Bo bono romwi totra sebwi ‘Nini lakaino su-ui pái di!’ hwnwi hwn kha.

²⁹A seleng ha-o klaiwi ‘Ano khá lok ja di, ang su-ui rw bai anw!’ hwnwi koi kha.

³⁰Hai phano bo gosi li ya; tamo khe lakai su bai ya sakni bagwi bono alongo chobwi ton kha.

³¹Abono nugwi tei selengrok khá hamya wng kha, hakhe bugrani thani thángwi joto kók khupro-ui saui lai kha.

³²Hakhe bugra a selengno tubu di hwn kha. Bo hai hwnwi sa kha, ‘Nwng bwswk seleng hamya! Nwng ano koima bai se ang nini bebak lakaino yakaro.

³³Ang nono khairokma hai’-no nwngbo a selengno khairokthai klaimani.’

³⁴Bugra panjalwi jolijak kha, hakhe a selengno bebak lakai su bai ya sak sátokna hwnwi alongo chop kha.”

³⁵Jisu hai hwnwi saui kók mwthak kha, “Tumungno norok jotono norokni takhukno khá bai nakar ya khe chuknohani ani Aphabo norokno omo hai khlainai.”