Read Kok Borok MATHAI 2 Bible Online

MATHAI 2 - Kok Borok bible

MATHAI 2

¹Herod habugra wngwi tong phuru Judia hani Betlehem tauno Jisu achai-o. Bo achai kheno salkabaini khoroknwi-khoroktham athukiri naiwi lekhanairok Jerusalemo phaiwi

²hai hwnwi sẃng phai kha, “Judairokni bugra wngna hwnwi achainai a chwrai buro wng kha? Chwng salkabai-o bini athukiri kama nuk kha, hakhe chwng bono khulumna phai-o.”

³O kókno khna kheno habugra Herod uanajak kha, Jerusalemni joto borokbo uanajak kha.

⁴Bo ochai okrarok bai Kerong phrwngnairok bebakno kwrẃngsa khe ringwi “Masia buro achaino?” hwnwi sẃng kha.

⁵Hakhe “Judiani Betlehem tauno” hwnwi bórok sa kha. “Tamni hwn ba diyari hai hwnwi swi lang kha:

⁶“ ‘O ha Judani Betlehem, nwng ha Judani tei bokhorokrokni slái kisa phano kechen ya; nini bising tẃi bokhorok khoroksa phai anw, bo ani borok Israilrokno chabwi tẃi anw.’ ”

⁷Herod salkabaini phainairokno tepsa khe ringwi a athukiri buphuru nukjak kha abono sẃngwi narwk kha.

⁸Hakhe bo bórokno hai hwnwi saui Betlehemo rohor kha, “Tháng di, a chwraino kaham khe rutuk di. Norok bono nuk khe anobo sa phai di, hakhe angbo thángwi bono khulumui anw.”

⁹O kókno khnaui bórok tháng kha. Lama-o bórok salkabai-o nukmani a athukirino nuk phi kha; abo a chwrai tong thani-o bathagwi ya sak bórokni swkang swkang wngwi tong kha.

¹⁰A athukirino nugwi bórok bwswk se bwkha srang kha, bwswk se tongthok kha!

¹¹Bórok nok bisingo habwi a chwraino bini buma Mariam bai nuk kha. Bórok yáskú sungwi bono khulum kha, hakhe bórokni bokcha khengwi bono rangchak, satrai motom tei mur belengtwi hili rw kha.

¹²Kaitor bórokno imango “Herodni aro kiphilwi ta tháng di,” hwnwi sa kha, hakhe bórok kubun lama tẃi bórokni ha-o kiphilwi tháng kha.

¹³Bórok tháng bai khe imango Subraini suari khoroksa Josepno nukjagwi hai hwnwi sa kha, “Bacha di, chwrai bai bumano tẃiwi Ijibo khár di, ang kutul di hwn ya sak nwng aro tong di. Herod o chwraino butharna hwnwi rutuknai.”

¹⁴Hakhe Josep bachaui chwrai bai bumano tẃi horni bisingo’-no Ijibo lam rw kha.

¹⁵Herod thwi ya sak bo aro tong kha. “Ang ani Sajlano Ijipni ring kha,” hwnwi Subrai bini diyarini khúk tẃi samani abo nang phaina bagwi se omo wngo.

¹⁶A salkabaini phainairok bono bandiui klang kha hwnwi saui man kheno Herod belai khe jolijak kha. A phainairok bai sajakma hai’-no a athukiri nukjakmani mol romwi bo Betlehemni tei gana-ginini bisiknwi tei bisiknwi pung ya bebak chwla bwsarokno buthar di hwnwi dagi kha.

¹⁷Omo tẃi kheno Jirimia diyari ahai hwnwi samani a kók nang phai kha:

¹⁸“Rama-o khorang khna kha, chiri-mokorok bai kap lai- kok lai khna kha. Rahel bwsarokni bagwi kabo, bo kap sini kabwi asi yókjak ya, bórok bebak’-no thwi bai kha ba.”

¹⁹Herod thwi bai khe Ijibo Subraini suari khoroksa Josepno imango nukjak phai kha,

²⁰hakhe ahai hwnwi sa kha, “Bacha di, chwrai bai bumano tẃi ha Israilo kiphilwi tháng di; o chwraino butharna nainairok thwi bai kha.”

²¹Hakhe Josep bachaui chwrai bai bumano tẃi ha Israilo kiphilwi tháng kha.

²²Arkhelano bupha Herodni yakchu-o ha Judiani bugra wngwi tongo hwnwi khnaui Josep aro thángwi tongwinani kirijak kha. Bo imango teibo sajakma bai Galili amchoi-o tháng kha,

²³hakhe Nasaret hwnwi taun khungsa-o tongwi kha. “Bo Nasaretsa hwnjaknai,” hwnwi diyarirok samani abo nang phaina bagwi se omo wngo.