Read Kok Borok MATHAI 20 Bible Online

MATHAI 20 - Kok Borok bible

MATHAI 20

¹“Kaitorni ha wng kha omo hai se: angur barini bubagra khoroksa asirisiri’-no bini bari tang rwna hwnwi muni naina tháng kha.

²Bo salo rang khoksa [7] khe rwna hwnwi sa laiwi bórokno bini angur bari tangna rohor kha.

³Bo hai’-no hai phungni diboro bajaro thángwi borok khoroknwi khorokthamno mungsa phano tang yaui bachaui tong laijak nuk kha.

⁴Hakhe bo bórokno hai hwnwi sa kha, ‘Norokbo thángwi angur bari tangwi di. Ang norokno rang kwbángno rw anw.’

⁵Hakhe bórok tháng kha. Bo diborobo teibo muni rohor kha, sarigobo rohor kha.

⁶Sal tháng twtwi-o bo bajaro thángwi teibo bororok aro bachaui tong laijak nuk kha. ‘Norok tamo wngwi mungsa phano tang yaui oro sal buthar lai kha sla?’ hwnwi bo sẃng kha.

⁷‘Chwngno khoroksa phano tlangnai kwrwi,’ hwnwi bórok sa kha. Hakhe bo bórokno ‘Norokbo thángwi angur bari tangwi di,’ hwnwi sa kha.

⁸“Sanja wng kheno bubagra bini borokno hai hwnwi sa kha, ‘Munirokno ring di, bórokno yagulni rang rw di, ulo phainairokno rw graui swkang phainairokno ulo rw di.’

⁹Sal tháng twtwi-o tangna phainairok rang nanani phaiwi khoksa khoksa khe rwjak bai kha.

¹⁰Hakhe swkang tangna phainairok rang nanani phaiwi chwng rang kwbáng man anw hwnwi khá ka kha; aile bórok suda rang khoksa khoksa khe rwjak kha.

¹¹Bórok rang naui bubagrano jolijagwi hai hwnwi sa lai kha,

¹²‘Ulo tangna phainairok srapsa se samung tango, chwng le satung kwprabo sapung tangma se nwng bórokno rwma swk’-no chwngnobo rw-o!’

¹³Bubagra bórokni bere khoroksano hai hwnwi sa kha, ‘Takhuk nai di, ang nono bandi ya. Nwngba rang khoksa bai’-no sapung tangna gosijak bla!

¹⁴Rang naui nogo tháng di. Nono rwma swkno o ulo tangna phainainobo ang rwna khá chongo.

¹⁵Ani rangno ang muchung tẃino khlai man ya diba? Ang yak kuar hwnwi da nwng ano músú?’ ”

¹⁶Jisu hai hwnwi saui kók mwthak kha, “Uklokrok swkang wng anw, phiya swkangrok uklogo tong rwk anw.”

¹⁷Jisu Jerusalemo toksaui tháng phuru sagri chiknwirokno simi tlangwi lama-o hai hwnwi sa kha,

¹⁸“Khna di, chwng Jerusalemo toksaui thángnai, arono Borokni Sajla ochai okrarok tei Kerong phrwngnairokni yago yapharwi rohorjaknai. Bo ma butharjakna nangnai hwnwi bórok hwnnai,

¹⁹hakhe bono buini bororokni yago yapharwi rohornai. Bórok bono mwnwinai, swpraknai, phiya kruso kanta bunai; hai phano salthamni salo bo mwthangwi tisajaknai.”

²⁰Sebedaini bihik bwsarokno tẃiwi Jisuni thani phai kha, hakhe bo khulumui “Ano khairok ja di,” hwnwi sa kha.

²¹“Nwng tamo nai?” hwnwi Jisu bono sẃng kha. Bo hai hwnwi sa kha, “Nwng bugra wng phuru ani o bwsa khoroknwirokno khoroksano nini yagra, tei khoroksano nini yaksi achuk rw anw hwnwi kók rw di.”

²²Jisu hai hwnwi sa kha, “Norok tamo san abo norokno saui man ya. Ang nungna naimano norok nungwi da mano ba?” “Chwng mano,” hwnwi bórok sa kha.

²³Jisu hai hwnwi sa kha, “Ang nungmano’-no norok ma le ma nungnai, hai phano sabono ani yagra achuk rwnai, sabono ba yaksi achuk rwnai abo ang chongwi man ya. Apha chongwi tongmani a bororok se aro achuknai.”

²⁴Tei sagri khorokchirok abono khnaui a takhuknwino jolijak kha.

²⁵Hakhe Jisu bórok bebak’-no bini thani ringwi hai hwnwi sa kha, “Norok saui mano bugrarok bororokno kók khna rwui tono bokhorokrokbo abo hai’-no khlai-o.

²⁶Norokni hwn khe hai ya. Norokni bere kotor wngna sadinai borok bo teirokni seleng ma khatinai.

²⁷Norokni bere bokhorok wngna sadinai borok bo Borokni Sajla hai norokni seleng ma khatinai. Borokni Sajla bui bai naijakna nukjakna phai ya, buino se naina nukna phai-o, hakhe aswk bororokno phiyókna bagwi butharjakna se phai-o.”

²⁹Bórok Jerikoni tháng phuru luku kwbángma Jisuno rwkthar kha.

³⁰Lama gana achuk laijak phula khoroknwirok Jisuno ayang tẃi lái-o hwnwi khna kheno hai hwnwi chirikhók lai kha, “O Daudni Sajla! Hodasa, chwngno khairok jaba di!”

³¹Lukurok bórokno “Ta kutuk di,” hwnwi damrok rwrwk bórok teibo sotonwi “O Daudni Sajla! Hodasa, chwngno khairok jaba di!” hwnwi chirikhók rwrwk.

³²Jisu bathagwi bórokno phai di hwnwi ring kha. “Norok tamo nai? Ano tamo khlai di hwn? hwnwi bo sẃng kha.

³³“Hodasa, chwngno nuk rw ja di,” hwnwi bórok sa kha.

³⁴Jisu bórokno khairokjagwi bórokni mokol tang kha. Logi logi’-no bórok mokol nuk kha, hakhe bini logi tháng kha.