Read Kok Borok MATHAI 21 Bible Online

MATHAI 21 - Kok Borok bible

MATHAI 21

¹Bórok Jerusalemo sók phai twtwi wng khe Tháistwi Hatháini Betphagi-o tháng lai kha.

²Jisu aro sagri khoroknwino hai hwnwi saui rohor gra kha, “Bwskangni u kami-o tháng di. Aro sógwi khe’-no korai chirka bwsa masa buma bai baksa khajak nuk anw. Abórokno khengwi ani thani tubu di.

³Khoroksa swk sẃng khe ‘Hoda omorokno samung nangjago,’ hwnwi sa di. Aboni logi’-no bo rohor anw.”

⁴A diyari hai hwnwi sa langmani abo nang phaina bagwi se omo wngo,

⁵“Siyon taunno sa di: Nahar di, nini bugra nini thani phai-o bo borok kwchang se, bo korai chirka-o kajak, korai chirka bwsa-o kajak.”

⁶A sagrirok swkang baira tháng gra kha, hakhe Jisu khlai di hwnma hai’-no khlai lai kha.

⁷Bórok a korai chirka bwsano buma bai baksa tubu-ui abórokni saka-o bórokni rí phinwi rw kha, hakhe Jisu kasa kha.

⁸Luku kwbángma bórokni rí lama-o boui rw lai kha, baksa ba buphang bedekrok tanwi lama-o beraui rw lai kha.

⁹Jisuni bwskangni bororok bai uklokni bororok hai hwnwi chirikhóksa lai kha, “Daudni Sajlano lob di! Subraini mungwi phainaino Kaitor hamari rw thung; Kaitor lobjak thung!”[8]

¹⁰Jisu Jerusalemo hap kheno taun gwnangwi uphla káphla nang kha, “O borok sabo?” hwnwi bororok sẃng kha.

¹¹“O borok Galilini Nasaretni Jisu diyari,” hwnwi lukurok sa kha.

¹²Jisu noktharo habwi aroni painairokno phalnairokno bebakno rwkhlai rw bai kha. Bo rang sláinairokni tebul bai pharuk phalnairokni tulrokno philwi rw bai kha,

¹³hakhe bórokno hai hwnwi sa kha, “ ‘Ani nok suri sanjaknai nok hwnjaknai,’ hwnwi Kaitor samani o kók elembago swijak tongo, yang norok le omono dagait bothop se khlai si-o!”

¹⁴Phularok bai komparok bini thani noktharo phai kha, hakhe bo bórokno ham rw kha.

¹⁵Bono uanamasingcha samung khlaima nugwi, phiya “Daudni Bwslano lob di!”[9] hwnwi chwrairokno noktharo chirikhók laima khnaui ochai okrarok tei Kerong phrwngnairok jolijak lai kha.

¹⁶“Bórok tamo sa laiwi tong abono nwng khw da khna kha?” hwnwi bórok Jisuno sẃng kha. Jisu hai hwnwi sa kha, “I’n, khna-o. Norok uáisa phano elembakni o kók pori ya kho diba? ‘Nwng chwrai khonairokno Kaitorno kaham khe lobna phrwng kha.’ ”

¹⁷Jisu bórok bai kagwi taunni kutulwi Bethania-o tháng kha; horo bo arono tong kha.

¹⁸Teini phungo aisirisiri Jisu tauno kiphilwi phai phuru ok khuijak kha.

¹⁹Bo lama gana-o khwichang buphang phangsa nugwi aro tháng kha, tamo khe mungsa phano nuk li ya, bwlái simi se. Hakhe bo a khwichang buphangno hai hwnwi hwn kha, “Nwng tei bwthái thái glak!” Logi logi’-no a buphang kóróui tháng kha.

²⁰Sagrirok abono nugwi belai uanajak lai kha. “Tamo khe o khwichang buphang aswk dakti’-no kóróui tháng sla?” hwnwi bórok sẃng kha.

²¹Jisu hai hwnwi sa kha, “O kókno muitu narwk di, norok udru mudru wng yaui poito khlai khe ang o khwichang buphangno khlaima tẃi’-no norokbo khlai mannai; omo simi ya, norok u hatháino ‘Tháng di, nwng twijlango klai di,’ hwn khe a hatháibo abo hai wngnai.

²²Norok poito khlai khe norok suri sanmano’-no mannai.”

²³Jisu noktharo kiphilwi phai kha; bo aro phrwngwi tong phuru ochai okrarok bai okra chakrarok bini thani phaiwi hai hwnwi sẃng phai kha, “Nwng bu phan bai omo tẃirokno khlai? Nono sabo o phan rw kha?”

²⁴Jisu bórokno hai hwnwi sa kha, “Angbo norokno kók tháisa sẃngnai. Norok abono sa khe bu phan bai omo tẃirokno khlai angbo norokno sanai.

²⁵Johon baptisma rwmani phan le Kaitorni aroni da, borokni aroni?” Hakhe bórok kiching bórok hai hwnwi sẃng lai kha, “Chwng tamo sanai? ‘Kaitorni aroni,’ hwnwi sa khebo ‘Norok tamo wngwi hai khe Johonno poito khlai ya sla?’ hwnwi bo chwngno sẃngnai.

²⁶Phiya ‘Borokni aroni’ hwnwi sa khebo bororok chwngno tamo khlai langno abo kiri-o, tamni hwn khe bórok bebak’-no Johonno diyari hwnwi tong lai-o.”

²⁷Aboni bagwino bórok Jisuno “Chwng saui man ya,” hwnwi sa kha. Bo hai hwnwi sa kha, “Bu phan bai ang omo tẃirokno khlai angbo hai khe norokno sa ya.”

²⁸“Tabuk norok tamo hwn sla? Borok khoroksani bwsla khoroknwi tongmani. Bo okrani thani thángwi hai hwnwi saui kha, ‘Aphu, tháng di, tini angur bari tangwi di.’

²⁹‘I’nhi, ang tang ya,’ hwnwi bo sa kha, ulo khe bo uansuk phirwi angur bari-o tháng kha.

³⁰Hakhe bupha kusuni thani thángwi a kók’-no kók saui kha. ‘Au, tháng anw Apha,’ hwnwi bo sa kha, tamo khe tháng li ya.

³¹Khoroknwini bere sabo buphani kók khna kha sla?” “Bwsla okra ta,” hwnwi bórok sa kha. Jisu bórokno hai hwnwi sa kha, “Ang norokno o kókbo sa-o, teks romnairok bai baliknairok se norokni slái swkang Kaitorni ha-o hap kha.

³²Tamni hwn khe baptisma rwnai Johon phaiwi norokno lama soui phunuk kha, hai phano norok bono poito khlai li ya; teks romnairok bai baliknairok se bono poito khlai si-o. Abono nugwi suda se norok uansuk phirwi bono poito khlai li ya.”

³³Jisu hai hwnwi sa kha, “Tei tháisa rwngthoma khna di. Nokphang khoroksa angur káimani. Bo a angur bari bera dúm bai kha, angur sebna bagwi holongdabo hakhor khur kha, phiya mwrwkna bagwi garing tang kha. Hakhe bo a barino munirokni yago klangwi beraina tháng kha.

³⁴Angurni jora phuru bini banta angur na rw horna hwnwi bo bini selengrokno a munirokni thani rohor kha.

³⁵Munirok bini selengrokno rom lai kha, khoroksano bu kha, tei khoroksano buthar kha, tei khoroksano holong khitar kha.

³⁶A borok swkangni slái teibo selengrokno rohor khua, hakhe munirok bóroknobo abo hai khlai khua.

³⁷Ulo khe bo bini bwslano rohor kha. ‘Angslano le bórok sak nang ya wng glak,’ hwnwi bo khá ka kha.

³⁸Yang le munirok bini bwslano nuk khe’-no hai hwnwi sa lai kha, ‘Omo nokphangni bwsla se bla. Phai di, chwng bono buthar lai anw, hakhe buphani sompoti chwng man anw!’

³⁹Hakhe bórok bono romwi bari phataro kariui buthar lai kha.

⁴⁰“Tabuk, angur barini nokphang phai khe bo a munirokno tamo khlai no?” hwnwi Jisu sẃng kha.

⁴¹Borok hai hwnwi sa kha, “Bo a borok hamyarokno kirimasingcha khe butharnai; hakhe angurni jora bini bantano rwnai abo tẃi munirokni yago bo bini bari rw anw.”

⁴²Jisu bórokno hai hwnwi sa kha, “Elembago samani o kókno norok uáisa phano pori ya kho diba? “ ‘Nok tangnairok samung nang ya hwnwi khibi rwmani holongthai abo’-no wng phai kha nok busuni holongthai Subrai khlai kha o samungno chwngbo uana kha nugwi abono!’ ”

⁴³Jisu kók manju-ui hai hwnwi sa kha, “Aboni bagwino ang norokno o kók sa-o, Kaitorni ha norokni yakni tlangjak anw, hakhe bwthái kaham thái rwnai bororokni yago rwjak anw.”

⁴⁴[O holongthai-o khlainai borok bo phindrik phandrak wngnai; phiya o holongthai khoroksa swkni saka-o klai khe a borok kepeknai.]

⁴⁵Ochai okrarok bai Pharisairok Jisuni rwngthomarokno khnaui bo bórokni kók se sa-o hwnwi saui man kha.

⁴⁶Aboni bagwino bórok bono romna nai lai kha, phiya ba lukurok Jisuno diyari hwnma bai bórok kirijak lai kha.