Read Kok Borok MATHAI 22 Bible Online

MATHAI 22 - Kok Borok bible

MATHAI 22

¹Jisu bororokno hai’-no hai rwngthoma bai sa khua.

²“Kaitorni ha wng kha omo hai se: bugra khoroksa bwslano káina hwnwi panda khlai kha.

³Bo bini selengrokno kobokjaknairokno sauina bagwi rohor kha, tamo khe bórok phaina nai li ya.

⁴Aboni bagwi bo tei selengrokno hai hwnwi kók kwchárwi rohor kha, kobokjaknairokno hai hwnwi sa di, ‘Ani panda tabuk tiyar wng kha; musuk chwlarok bai dega kuphungrokno rathar kha, bebak wng bai kha, kái lai panda-o phai bai si di.’

⁵Yang le kái lai panda-o kobokjaknairok khunju se kan li ya gwja! Bórok sak sakni samungo tháng bai kha, khoroksa khe bini kheto, tei khoroksa khe bini phalnogo,

⁶baksa khe a selengrokno rom kha, hakhe bu-ui buthar bai kha.

⁷Hakhe bugra belai jolijagwi bini sengkrakrokno rohor kha, a butharnairokno a sengkrakrok butharwi kha, bórokni taunbo sókchaui rw lai kha.

⁸Hakhe bugra bini selengrokno ringwi hai hwnwi sa kha, ‘Ani kái lai pandani panda tiyar wng bai kha, tamo khe ang kobokma bororok oro phaina chúk ya.

⁹Tabuk norok lama kotoro tháng di, hakhe borok nukmasingno kobok di.’

¹⁰Hakhe selengrok lama-o thángwi kaham hamya joto borok nukmasing thumwi tubu kha, hakhe kái lai pandani nokni borok kupulung wng kha.

¹¹“Bugra kái lai panda-o phainairokno naina tháng kha, hakhe kái lai pandani rí kanwi phai ya khoroksano nuk kha.

¹²‘Takhuk, kái lai pandani rí kan yaui bahai khe nwng oro phai lang de?’ hwnwi bugra bono sẃng kha. Hakhe a borok tháisa phano pung li ya.

¹³Aphuru bugra selengrokno hai hwnwi sa kha, ‘O borokno yakung yak khaui phataro mwnakma-o khiklai rw di. Aro bo ua hului ma kap anw.’ ”

¹⁴Jisu hai hwnwi saui kók mwthak kha, “Kobokjaknai le kwbángma, tamo khe chongjaknai se kisa.”

¹⁵Pharisairok tháng lai kha, hakhe Jisuno kók bai khẃi-o kwcha rwna hwnwi kók chap lai kha.

¹⁶Bórok bórokni sagrirokni bere baksano tei Herodni bororokni bere baksano Jisuni thani rohor kha. A rohorjaknairok Jisuno hai hwnwi sa kha, “Hodakra, chwng saui mano nwng kók kubui sa-o. Bororok tamo hwn hwn ya abono uansuk yaui nwng Kaitorni lamani kókno sói khe phrwngo, tamni hwn khe nwng keboni bumukhang naisik ya.

¹⁷Chwngno sa di, nwng tamo hwn? Rumni bugra kotorno teks rwmani abo chini Kerong swbaima da klai?”

¹⁸Jisu bórokni bwkha sitrano saui manẃi hai hwnwi sa kha, “Phatrarok! Norok tamo wngwi ano khẃi-o kwcha rwna nai lai?

¹⁹Teks rwjaknai rangno ano phunuk phai di.” Hakhe bórok bini thani rang tubu kha.

²⁰“Omo saboni bumukhang? O bumung saboni?” hwnwi bo sẃng kha.

²¹“Bugra kotorni,” hwnwi bórok sa kha. Hakhe Jisu bórokno hai hwnwi sa kha, “Hakhe ba bugra kotorni manthaino bono rw di, Kaitorni manthaino Kaitorno rw di.”

²²O kókno khnaui bórok uanama chaui bini aroni tháng lai kha.

²³A salono khoroknwi khoroktham Sadukairok Jisuni thani phai kha. (Bórok kwthwirok thangwi bacha ya hwnwi sa lainairok.)

²⁴Bórok hai hwnwi sa kha, “Hodakra, Musi hai hwnwi sa lang kha, ‘Khoroksa swk bwsa man ya sini thwiwi tháng khe bini bosongno narwkna bagwi a randijwkno a borokni takhuk nok phirogwi na thung.’

²⁵Rom di, oro takhuksnirok tongmani. Okra káijagwi bwsa man ya sini’-no thwi kha, hakhe bini takhuk a randijwkno na kha.

²⁶A takhukbo hai’-kheno thwi kha, tei khoroksabo hai’-kheno thwi kha, hai khe máng a takhuksnirok thwi bai kha.

²⁷Ulo khe a bwrwibo thwi kha.

²⁸Tabuk, kwthwirok thangwi bacha phuru a bwrwi saboni bihik wngna klai? Bórok bebak’-no bono na lai kha.”

²⁹Jisu bórokno hai hwnwi sa kha, “Norok bwswk se cha ya gwja! Norok wng kha elembakni kókbo saui man ya, Kaitorni phanbo saui man ya, aboni bagwi se hai wngo.

³⁰Thangwi bachanairok bórok chuknohani suarirok hai, chwla bwrwi kebo káijak lai ya.

³¹Tabuk, kwthwirok thangwi bachana kókno ang sa anw Kaitor norokno samani abono pori ya kho diba? Bo hai hwnwi sa kha,

³²‘Ang Abrahamni Kaitor, Isakni Kaitor, Jakobni Kaitor,’ O kók wng kha hai, bo kwthangrokni Kaitor se, abo bai’-no borok thwiwi tháng phano kwthang tongo.”

³³Abono khnaui lukurok bini phrwngmano uanajak bai kha.

³⁴Sadukairokno Jisu khúk muthubwi rw kha hwnwi Pharisairok khnaui kuthum lai kha.

³⁵Hakhe bórokni bere Kerong phrwngnai khoroksa hai hwnwi sẃngwi bono khẃi-o kwcha rwna nai kha,

³⁶“Hodakra, Kerongno dagimarokni bere bubo kók kotor kuk?”

³⁷Jisu hai hwnwi sa kha, “Nwng nini Kaitor Subraino khá bai khúk bai uansukma bai hamjak súk di.’

³⁸Omono nang kukma kók kotor tei puilani dagimung.

³⁹Tei tháisa nangmani kók khe ahai, ‘Nwng sakno hamjak tẃi’-no buinobo hamjak di.’

⁴⁰Musini Kerong tei diyarirok phrwngmarok bebak’-no o kók tháinwio’-no sungchajak.”

⁴¹Pharisairok kuthum lai khe Jisu bórokno hai hwnwi sẃng kha.

⁴²“Masiani kók le norok tamo hwn sla? Bo saboni bwsa?” “Bo Daudni bwsa,” hwnwi bórok sa kha.

⁴³Jisu hai hwnwi sa kha, “Hakhe Pholani bising tẃi Daud tamo wngwi bono ‘Subrai’ hwn sla? Tamni hwn ba Daud ahai hwnwi sa lang kha,

⁴⁴“ ‘Subrai ani Subraino ahai hwnwi sa kha: Achuk di oro ani yagra bwkhak khiklai ya sak ang nini kena arirokno nini yakung yaphango.’

⁴⁵“Hakhe Daud bono ‘Subrai’ hwnwi hwn khe Masia bahai khe Daudni bwsa wngwi man?”

⁴⁶Khoroksa phano Jisuno kók tháisa phano sa phirwi man li ya. A salni simi tei khoroksa phano Jisuno tháisa phano sẃng rak li ya.