Read Kok Borok MATHAI 23 Bible Online

MATHAI 23 - Kok Borok bible

MATHAI 23

¹Aphuru Jisu lukurokno tei bini sagrirokno hai hwnwi sa kha,

²“Kerong phrwngnairok bai Pharisairok Musini Kerongno swbai sanani chongjak.

³Aboni bagwino bórok sama tẃi’-no norok khwbo khan di, tobo tong di, hai phano bórok tong tẃi le ta tong di, tamni hwn khe bórok kók sama tẃi tong ya.

⁴Bórok poja kotor khaui buini phikungo bogwi rw-o, bórok khe abo yasichuk bai suda érwi nai ya.

⁵Bororokno phunukna bagwi simi se bórok samung khlai-o. Naisik di, bórokni kwpal bai yaktwkrogo Elembakni kók bwswk kotor kotor khe khatrojak! Naisik di, bórokni rí bwswk se liling lala!

⁶Bórok panda-o achukthai kaham nai-o; thumnogobo buini slái bwskango achukna nai-o;

⁷bórok hati-haba-o khulumjakna nai-o, bórok ‘Hodakra’ hwnjakna nai-o.

⁸Hai phano norok ‘Hodakra’ ta hwnjak di, tamni hwn khe norok kiching norok bebak’-no takhuk klai lai-o, khoroksa simi se norokni Hodakra.

⁹Norok o swngcharo hodarokni bere kebono ‘Apha’ ta hwn di, tamni hwn khe norokni Pha khoroksa se, bo chuknoha-o tongo.

¹⁰Norok ‘Bokhorok’ ta hwnjak di, tamni hwn khe norokni bokhorok khoroksa se, bo wng kha Masia.

¹¹Norokni bere kotor hwnjaknai bo norokni seleng ma khatinai.

¹²Kotor wngna sadinai borok bo kotoi snamjaknai, phiya kotoi wngna sadinai borok bo kotor snamjaknai.”

¹³“Kerong phrwngnairok bai Pharisairok, phatrarok! Norok bwswk se hamya sitra no! Norok bororokni mokol bwskango chuknohani duglam soui rw-o, norokbo bisingo hap ya, hapna nainairoknobo hap rw ya.

¹⁴[“Kerong phrwngnairok bai Pharisairok, phatrarok! Norok bwswk se hamya sitra no! Norok randijwkrokni nok-huk monok baiwi saka saka simi tángma tángsa khe suri sanwi phunugo. Aboni bagwino norok teibo belai khe yagul sujaknai.]

¹⁵“Kerong phrwngnairok bai Pharisairok, phatrarok! Norok bwswk se hamya sitra no! Norok khoroksa khoroksano norokni bisingo hap rwna bagwi twi gwnangwi ha gwnangwi beraiwi nai lai-o; khoroksa swkno norokni bisingo hap rwui man khe norokni slái teibo bono morke-o[10] khiklaijaknai borok snamo

¹⁶“Mokol nuk ya lama sonairok, norok bwswk se hamya sitra no! Norok hai hwnwi sa-o, ‘Khoroksa swk noktharni mungwi swmai tang khe mungsa buya, tamo khe noktharni rangchakno romwi swmai tang khe le nango hwno,’

¹⁷Nuk ya siyarok! Rangchak da tor kuk, rangchakno kwthar khlainai nokthar da tor kuk; bubo tor kuk?

¹⁸Norok hai hwnwibo sa-o, ‘Khoroksa swk háyáno romwi swmai tang khe mungsa buya, tamo khe a saka bokmanino romwi swmai tang khe le nango hwno.’

¹⁹Norok bwswk nuk ya gwja! Háyá-o bokmani abo da tor kuk, bokmanino kwthar khlainai háyá da tor kuk; bubo tor kuk?

²⁰Hakhe khoroksa háyáno romwi swmai tang khe bo a saka bokmani bebak’-no romma klai-o;

²¹phiya khoroksa swk noktharno romwi swmai tang khe bo abonobo romma klai-o, aro tongnai Kaitornobo romma klai-o;

²²phiya khoroksa swk chuknohani mungwi swmai tang khe bo Kaitorni achukthayungnobo romma klai-o, aro achuknainobo romma klai-o.

²³“Kerong phrwngnairok bai Pharisairok, phatrarok! Norok bwswk se hamya sitra no! Norok Kaitorno banta, khundrupui, jirarokno kaichi-o kaisa rwui tongo, tamo khe ‘Buino sói khe nai di, buino maya chá di, kaham khe tong di,’ hwnwi Kerongo samani omo tẃi nangmani kókrokno le samung nangjak ya. Abo tẃirokno khlaiwi’-no omo hai khe tongthai klai-o.

²⁴Mokol nuk ya lama sonairok! Norok twini yóngno khe sakiui khibi-o, tamo khe mangingangno monogo!

²⁵“Kerong phrwngnairok bai Pharisairok, phatrarok! Norok bwswk se hamya sitra no! Norok lota mairangno saka saka simi hu-o, bisingo khe norok segwi tei khámaiwi manmani manwirok máng se kupulung.

²⁶Nuk ya Pharisai! Lota bisingno hu gra di, hakhe sakabo hujaknai.

²⁷“Kerong phrwngnairok bai Pharisairok, phatrarok! Norok bwswk se hamya sitra no! Norok chwndwi phuljak holongdapni mangkhor hai, saka nai khe kaham, bisingo khe bekreng kurung karang tei selengmasingcha máng se.

²⁸Omo hai’-no norokbo saka saka kaham, bisingo khe norok sói sumsok gwnang phatra se.”

²⁹“Kerong phrwngnairok bai Pharisairok, phatrarok! Norok bwswk se hamya sitra no! Norok diyarirokni mangkhor naithok khlai-o, agi phuru kaham khe tongnairokni holong mukumu chithi-o;

³⁰hakhe norok hai hwnwi sa-o, ‘Agi phuru chini chuchusong tongma jora-o chwng tongma te chwng bórok bai baksa diyarirokni thẃi kochok rw glak kha mun.’

³¹Hakhe norok a diyarirokno butharnairokni bosong hwnwi gosiui tongo.

³²Hakhe tháng di, norokni chuchusong khlai bai lang ya samungno khlai pái di.

³³Chibukrok, chibukrokni bwsarok! Norok morke-o khiklaijak glak hwnwi bahai khe uansuk?

³⁴Abo bai’-no ang norokno o kók sa-o, ang norokni thani diyarirokno, elem gwnangrokno, phrwngnairokno rohor anw; bórokni bere baksano norok buthar anw, baksano norok kruso kanta bu anw, baksano norok thumnogo swpragwi o taunni u tauno rwkhlai anw.

³⁵Aboni bagwino bebak borok kahamrokno butharmani aboni majra norokni sago klai anw, Abel borok kahamni simi mareui nokthar bai háyá kwcharo norok butharmani Barakiani bwsla Sakariani jora joto borok kahamrokni thẃi kochok rwmani aboni majra norokni sago klai anw.

³⁶Ang norokno sói kókno sa-o, omorokni bebak majra tabukni bororokni sago klai anw.”

³⁷“O Jerusalem, Jerusalem, diyarirokno nwng butharo, nini thani Kaitor bai rohorjaknairokno holong khitaro! Tokma bini bwkrang tola toksarokno koroui tonma hai ang bwswk se nini borokno yak kwbagwi tonna nai kha; nwng abo hai khlai rw li ya.

³⁸Tabuk norokni nok khibijak súk’-anw.

³⁹Ang norokno o kók sa-o, ‘Subraini mungwi phainaino Kaitor hamari rw thung,’ hwnwi sa ya sak norok ano tei nuk glak.”