Read Kok Borok MATHAI 3 Bible Online

MATHAI 3 - Kok Borok bible

MATHAI 3

¹Aphuru baptisma rwnai Johon Judia hasing panthoro phaiwi

²“Sumsok yakar di, Kaitorni ha sampha kha!” hwnwi pír phai kha.

³Johon wng kha Jisaia diyari ahai hwnwi sa langmani a borok se, “Hasing panthoro khoroksa hai hwnwi chirikhókjak: ‘Subraini bagwi lahar snam di; bo himnani lamano kepleng khe ton di!’ ”

⁴Johonni rí mangingang buikhumuni takjak; bo bukur bai bwchang kha-o, kúkthora bai bolongni piya modu se bo chá-o.

⁵Jerusalemni bororok bini thani phai kha, Judia angkor gwnangwi tei Jordan twimani gana-ginini ha gwnangwini bororok bini thani phai kha.

⁶Bórok sak sakni sumsokno gosi kha, hakhe bo bórokno Jordan twima-o baptisma rw kha.

⁷Johon kwbángma Pharisai tei Sadukairokno bini thani baptisma wngna phaima nuk khe bo bórokno hai hwnwi sa kha, “Chibukni bosongrok, Kaitor yagul suna naiwi tongmani yakni khárwi yók di hwnwi sabo norokno uansuk rw lang?

⁸Norok sumsok yakar kha hwnwi sijakna tẃi khe tong di.

⁹‘Abrahamno chini apha,’ hwnwi saui norok yók anw abo khá ta ka di. Ang norokno o kók sa-o, Kaitor o holongroknibo Abrahamni bwsa tikhlai mano.

¹⁰Buphang yaphango rua harjak; bwthái kaham thái ya buphangno tanwi hóro khiklai sókjaknai.

¹¹Norok sumsok yakar kha hwnwi ang norokno twi bai baptisma rw-o; tamo khe ani slái ulo phainai bo le norokno Phola Kwthar tei hór bai se baptisma rwnai. Bo ani slái kwplai kuk; ang bini yaklap tẃinani suda se chúk ya.

¹²Khamparni bebak gomno chokna bagwi baling bini yago’-no tongo; bo gomno thumwi gula-o da bainai, gundakno khe thwi phlai ya hóro sógwi khibi bainai.”

¹³Aphuru Jisu Galilini Jordano tháng kha, hakhe baptisma wngna hwnwi Johonni thani phai kha.

¹⁴Johon bono kiphil rwna nai kha. “Ang se nwng bai baptisma wngthai bla! Ahai twtwi bahai khe nwng ani thani phai?” hwnwi bo sa kha.

¹⁵Phiya Jisu bono hai hwnwi sa kha “Tabuk omo wng gra si thung, tamni hwn khe Kaitor naima tẃi’-no chwng omo hai kheno ma khlainai.” Hakhe Johon soi kha

¹⁶Jisu baptisma wng bai kheno twini kasa kha. Aphuru bini bagwi nokha phiyokjak kha, hakhe bo Kaitorni Pholano pharuk hai khe birkhlai bini sago bá phaima nuk kha.

¹⁷Aphuru chuknohani hai hwnwi sakhlaijak kha, “Omono ani khájani Sajla, ang bono’-no belai khe hamjago.”