Read Kok Borok MATHAI 4 Bible Online

MATHAI 4 - Kok Borok bible

MATHAI 4

¹Aphuru Phola Jisuno Soitan bai belok rwjakna hwnwi hasing panthoro tubu kha.

²Nokha sal brwichi hor brwichi chá yaui tong khe Jisu ok khuijak kha.

³Soitan bini thani phaiwi bono hai hwnwi sa kha, “Nwng Kaitorni Sajla khe o holongrokno ruti wng di hwn di.”

⁴Jisu hai hwnwi sa kha, “Elembago o kók tongo, ‘Borok ruti bai simi thangwi man ya, Kaitorni búkhúkni bebak kók bai se thangnai.’ ”

⁵Aphuru Soitan Jisuno Taun Kwtharo tlangwi noktharni bosok kuchugo bacha rwui

⁶bono hai hwnwi sa kha, “Nwng Kaitorni Sajla khe ha-o bakhlai di; tamni hwn khe Elembago o kók tongo, “ ‘Kaitor bini suarirokno nini bagwi dagi anw; nini yakung holong nang ya tẃi khe bórok nono yak bai yachak sok anw.’ ”

⁷Jisu bono hai hwnwi sa kha, “Elembago o kókbo tongo, ‘Nini Kaitor Subraino nwng ta potali di,’ ”

⁸Hakhe Soitan bono hathái kuchukma kaisa-o tlangwi swngcharni aswk ha bai jolma jolsarokno phunugui

⁹hai hwnwi sa kha, “Nwng ano yáskú sungwi khulum khe omorok bebakno’-no ang nono rw bainai.”

¹⁰Hakhe Jisu hai hwnwi sa kha, “Tháng di Soitan! Elembago o kók tongo, ‘Nini Kaitor Subraino simi se suriui khulum di.’ ”

¹¹Aphuru Soitan bono yakarwi tháng kha, hakhe suarirok phaiwi Jisuno chuba phai kha.

¹²Johonno alongo klai kha hwnwi khna khe Jisu Galili-o tháng kha.

¹³Bo Nasareto tong yaui Jebulun bai Naptalini amchoi-o Galili twibom rukungni Kapharnaumo thángwi tongwi kha.

¹⁴Jisaia diyari hai hwnwi sa langmani abo nang phaina bagwi se omo wngo,

¹⁵“O ha Jebulun, o ha Naptali, twijlang bwkhak Jordanni ayang nar, buini bororokni Galili!

¹⁶Mwnakma-o tongnairok bórok belai pohor nuknai, kwthwirokni ha-o mwnakma-o tongnairok bórokni aro pohor wngnai.”

¹⁷Aphuruni simi Jisu bini kók pírna cheng kha tei sa kha, “Norok sumsok yakar di, Kaitorni ha sampha kha!”

¹⁸Jisu Galili twibom rukungo himwi tong phuru gabor takhuknwino twibomo chei bu-ui tongma nuhur kha. A takhuknwi wng kha Simon bai Andria (Simonno Pitorbo hwno).

¹⁹Jisu bórokno hai hwnwi sa kha, “Ani logi phai di, ang norokno borok romna phrwng anw.”

²⁰Logi logi’-no bórok chei yakarwi bini logi tháng lai kha.

²¹Tháng te tháng te bo tei takhuknwirokno nuhur kha, bórok wng kha Sebedaini bwsarok Jakob bai Johon. Bórok bupha Sebedai bai rungo chei snamwi tong lai-o. Jisu bórokno ring kha;

²²logi logi’-no bórok rungbo klangwi buphanobo klangwi Jisuni logi tháng lai kha.

²³Jisu Galili gwnangwi tháng kha, thumnokrogo phrwngwi kha, Kaitorni hani Kothoma Kaham pírwi kha, bebak bemuk gwnang hamyarokno ham rw kha.

²⁴Bini kók ha Siriya gwnangwi pírjak kha, aboni bagwi bororok bini thani podrepot bemukrokno, podrepot hamyarokno tubu kha. Bórok mwtai hamya kolobjakrokno, mirka gwnangrokno, yakung yak man yarokno tubu kha hakhe Jisu bórok bebakno’-no ham rw kha.

²⁵Galilini tei Taun khungchini, Jerusalemni Judiani tei Jordan ayang narni borok kwbángma bono rwkthar kha.