Read Kok Borok MATHAI 6 Bible Online

MATHAI 6 - Kok Borok bible

MATHAI 6

¹“Hus wng di, bui nukna tẃi norok lukuni bwskango samung kaham ta khlai di. Norok abo hai khlai khe chuknohani norokni Phani aroni mungsa phano sokat man glak.

²“Aboni bagwi phatrarok thumnokrogo tei lamarogo khlai tẃi kwrwirokno rw phuru nwng kham ta bu di. Bororok bórokno kaham hwn anw hwnwi se bórok abo khlai-o. O kókno muitu narwk di, bórok sokat manẃi pái kha.

³Tamo khe nwng kwrwino rw phuru nini yagra yak tamo khlai nini yaksi yak suda saui ta man rw di,

⁴hakhe omo tepsa khe khlaijaknai se. Hakhe nwng tepsa khe khlaimano nuknai Nwpha nono sokat rwnai.”

⁵“Nwng suri san phuru khe phatrarok hai ta wng di. Bui nuk thung hwnwi bórok thumnokrogo tei lama buprarogo bachaui suri sanna hamjago. O kókno muitu narwk di, bórok sokat manẃi pái kha.

⁶Nwng suri san phuru khe nini nok bisingo habwi dugar soui nukjak ya Nwphani thani suri san di. Hakhe nwng tepsa khe khlaimano nuknai Nwpha nono sokat rwnai.

⁷“Norok suri san phuru bui sa tẃi kók nang ya kwbángma ta sa di. Bórok tángma tángsa suri sanma bai Kaitor khna anw hwnwi bórok khá ka-o.

⁸Bórok hai ta wng di; norok san ya sini’-no norokni tamo nang nang ya abo norokni Pha saui mano.

⁹Aboni bagwi norok omo tẃi khe suri san di: Chuknohani o chini Apha, nini mung kwthar surijak thung;

¹⁰nini ha phai thung; nini muchung tẃi chuknoha-o wngma hai o ha-obo ahai’-no wng thung.

¹¹Tinini nangmani chámung chwngno rw di.

¹²Bui chini hamya khlaimano chwng nakar tẃi nwngbo chwng hamya khlaimano nakar di.

¹³Chwngno belai khe ta amjok di, phiya Hamyani yakni kati rw di. [Tei tamni hwn khe ha phankrak tei chẃngsacha mol brúm brúm bebak nini máng se. Amen.]

¹⁴“Bui norokni hamya khlaimano norok nakar khe chuknohani norokni Phabo norokno nakarnai.

¹⁵Phiya bui hamya khlaimani norok nakar ya khe chuknohani norokni Phabo norok hamya khlaimano nakar glak.”

¹⁶“Norok ubas tong phuru phatrarok tong tẃi mwkhang mokjak khe ta tong di. Bórok ubas tongo hwnwi bui saui manna tẃi khe bórok mwkhang kosom khe tongo. O kókno muitu narwk di, bórok sokat manẃi pái kha.

¹⁷Nwng ubas tong phuru mwkhang sú di, bwkhnai-o thok phul di;

¹⁸hakhe nwng ubas tongo hwnwi bui saui man glak; nukjak ya Nwpha simi saui man anw. Hakhe nwng tepsa khe khlaimano nuknai Nwpha nono sokat rwnai.”

¹⁹“Norok o swngcharo rang-rí ta khati di, oro kurumabo khunti-o, sorbo khi-o, sikhokbo habwi khogo.

²⁰Aboni slái chuknoha-o se rang-rí khati di, aro kurumabo khunti ya, sorbo khi ya, sikhokbo habwi khogwi man ya.

²¹Tamni hwn khe rang-rí tong thani’-no norokni bwkhabo tongo.”

²²“Mokol wng kha bwsakni chati. Nini naisikma kepleng khe bwsak gwnangwi chẃngnai;

²³phiya nini naisikma bejua khe bwsak mwnaknai. Aboni bagwino nini bisingni pohor chẃng ya khe abo bwswk kirimasingcha khe mwnak no!”

²⁴“Khoroksa phano nokphang khoroknwini seleng wngwi man ya; bo khoroksano naisler khe tei khoroksano hamjaknai, eba khe khoroksano khá súk khe tei khoroksano samung nangjak glak. Nwng Kaitorni seleng twtwi rang-ríni seleng wngwi man ya.

²⁵“Aboni bagwino ang norokno o kók sa-o, tamono cháui nungwi thangnai hwnwi ta uana di, phiya tamono kannai, tamono chumnai hwnwibo ta uana di. Chámungni slái langma tor kuk ya diba? Phiya rí-chumni slái bwsak tor kuk ya diba?

²⁶Nokhani toksa-toktẃirokno nahar di: bórok maibo sar ya, rabo ra ya, mayamobo da ya; chuknohani norokni Pha bórokno naiwi tongo. Norok toksa-toktẃirokni slái tor kuk ya diba?

²⁷Norokni bere sabo uansugui ayukni bára tei salsa swk thangwi mannai tong?

²⁸“Rí-chumni bagwi tamni uana? Khumrok bahai khe tor lok nahar di: bórok samungbo tang ya, ríbo tak ya.

²⁹Hai phano ang norokno o kók sa-o, Solomon jolma jolsa gwnang phano omorokni barsani slái se aswk naithogwi man lang ya.

³⁰Charani jabra-tini tong khe khwna kwrwi, thapa-o sókjaknai; abono se Kaitor aswk naithok rwui ton khe bo norokno naithok rw glak diba? Norok bwswk se poito kisa gwja!

³¹Aboni bagwino tamono chánai, tamono nungnai, tamono kannai-chumnai, abono ta uana di.

³²(Poito kwrwirok’-no omorokno manna nai-o.) Omorok bebak norokni samung nango hwnwi chuknohani norokni Pha saui mano.

³³Tamo khe nwng Kaitorni hani bagwi se uansuk gra di, bo naima tẃino tongna bagwi se uansuk gra di; hakhe bo norokno aswk manwirokno rw anw.

³⁴Aboni bagwino khwnani bagwi ta uana di, khwnani khwna uansukjak anw. Tini tangmani tinini wngo.”