Read Kok Borok MATHAI 7 Bible Online

MATHAI 7 - Kok Borok bible

MATHAI 7

¹“Kaitor norokno majra ber ya tẃi khe norok buino majra ta ber di,

²tamni hwn khe norok buino majra ber tẃi’-no Kaitorbo norokno majra bernai. Norok buino khlai tẃi’-no Kaitorbo norokno abo hai khlainai.

³Hakhe tamni nini takhukni mokolo buphang biphiring tongma simi nwng nuk? Nini mokolni buphang bokocho le tamni nuk ya sla?

⁴Nini mokolo buphang bokocho tongtwtẃi nwng bahai khe nini takhukno ‘Phai di, nini mokolni buphang biphiring tikhlai grana,’ hwnwi sa rak de?

⁵O phatra, nini mokolni buphang bokocho tikhlai gra di, hakhe nini takhukni mokolni buphang biphiring kaham khe nuk anw; aphuru nwng tikhlai man anw.

⁶“Sẃirokno manwi kwtharno ta rw di; rw khe bórok kiphilwi se norokno riphrik phir anw; norokni muktanobo uakrokni bwskango ta rw di; rw khe bórok abórokno ká simi se kádul anw.”

⁷“San di, hakhe norok mannai; naituk di, hakhe norok nuknai; dugar bu di, hakhe norok phiyogwi rwjaknai.

⁸Tamni hwn khe sannai borok bo mano, naituknai borok bo nugo, dugar bunai borok bo phiyogwi rwjago.

⁹Bwsla ruti san khe holongsiki rwnai abo tẃi bupha norokni bisingo sabo tong?

¹⁰Eba khe á san khe chibuk rwnai sabo tong?

¹¹Norok aswk hamya twtwi se norokni bwsarokno manwi kahamno rwna siui tongo. Hakhe chuknohani norokni Phani thani sannairokno bo manwi kaham rwnai o kók bwswk se kubui!

¹²“Norok bui bai khlaijakna muchung tẃi norokbo buino khlai di: o kók khe Musini Kerong bai diyarirok phrwngma kók se.”

¹³“Dugar kesep tẃi hap di, tamni hwn khe morke lamani dugar wng kha kuar, lamabo kotor, hakhe borok kwbángma’-no abo tẃi himo.

¹⁴Thangnani lamani dugar wng kha kesep, lamabo kutuk, hakhe kisa bororok’-no abono saui mano.

¹⁵“Diyari phatrarok bai hus khe tong di; bórok saka saka mera hai khe norokni thani phai-o, phiya khá bisingo le bórok thamchi kutung geguma hai se.

¹⁶Bórokni samung bai’-no norok bórokno sini anw. Busulwngo angur thái ya, raisoklwngobo khwichang thái ya.

¹⁷Buphang kaham bwthái kaham thái-o, buphang hamyabo bwthái hamya thái-o.

¹⁸Buphang kaham khe bwthái hamya thái man ya; buphang hamyabo bwthái kaham thái man ya.

¹⁹Bwthái kaham thái ya buphang khe tanwi hóro khiklai sókjago.

²⁰Hakhe aboni bagwino norokbo diyari phatrarokno bórokni samung bai’-no sini anw.”

²¹“Ano ‘Subrai, Subrai!’ hwnnairok bórok bebak’-no Kaitorni ha-o habwi man glak, tamo khe chuknohani Aphani muchung tẃi tongnairok simi se habwi man anw.

²²A Salo borok kwbángma’-no ano hai hwnwi hwn anw, ‘Subrai, Subrai! Nini mungwi chwng Kaitorni kók sa kha, nini mung bai chwng mwtai hamya kwbángmano rwkhlai kha, nini mung bai uanamasingcha samung kwbángma’-no khlai kha!’

²³Ang aphuru khe bórokno hai hwnwi sa anw, ‘Ang norokno si se sini ya. Ani oroni tháng di chengtarok!’ ”

²⁴“Hakhe tabuk, ani o kókrok khnaui abo hai’-no tongnai borok bo holongdap saka nok tangnai siyan kwrwng borok hai.

²⁵Uatwi lukhlai kha, twisarokbo lom bai kha, nokbar kotorbo phai kha, hai phano a nok bái li ya, abo holongdap saka tangjak.

²⁶“Phiya ani o kókrok khnaui abo hai tong ya borok bo hasingcha saka nok tangnai siyan kwrwi borok hai.

²⁷Uatwi lukhlai kha, twisarokbo lom bai kha, nokbar kotorbo phai kha, hakhe a nok báiwi tháng kha. A nok báimani bwswk bwkha korom rere.”

²⁸Jisu omorokno sa bai khe lukurok bo phrwngmano uanajak kha.

²⁹Bo bórokni Kerong phrwngnairok hai phrwng ya, suar gwnang khe se phrwngo.