Read Kok Borok MATHAI 9 Bible Online

MATHAI 9 - Kok Borok bible

MATHAI 9

¹Jisu rungo kasaui twibom láiwi bini tauno kiphilwi phai kha.

²Borok khoroknwi khoroktham uaingo khe yakung yak man ya khoroksano balwi bini thani tubu-ui phai kha. Bórok aswk poito khlaimano nugwi Jisu a yakung yak man yano “Ta uana di, chwlasa. Nini sumsok nakarjak kha,” hwnwi sa kha.

³Hakhe Kerong phrwngnairok baksa khá bising bising hai hwnwi uansuk lai kha, “O borok ba Kaitorno se hamya sa bla!”

⁴Bórok uansukma kókno Jisu saui manẃi hai hwnwi sa kha, “Tamo wngwi norok omo hai kók hamya uansuk lai?

⁵‘Nini sumsok nakarjak kha,’ hwnwi sana da lai kuk, eba khe ‘Bachaui him gra di,’ hwnwi sana da lai kuk; bubo lai kuk?

⁶Hakhe o swngcharo Borokni Sajla sumsok nakarwi mano abono ang norokno phunuk anw.” Hakhe Jisu a yakung yak man yano “Bacha di, nini uaing khochaui nogo tháng di!” hwnwi sa kha.

⁷A borok bachaui nogo tháng kha.

⁸Abono nugwi bororok kirijak bai kha Kaitor bororokno omo tẃi phan rwma bai bórok Kaitorno lob lai kha.

⁹Jisu aroni kutulwi tháng kha, hakhe him te him te Mathai hwnwi teks romnai khoroksano bini tangnogo achugwi tongma nugwi kha. “Ani logi phai di,” hwnwi Jisu bono sa kha. Hakhe Mathai bachaui bini logi tháng kha.

¹⁰Mathaini nogo Jisu mai cháui tong phuru teks romnairok bai basijak borok kwbángma bo bai tei bini sagrirok bai baksa chá thani achuk phai kha.

¹¹Khoroknwi khoroktham Pharisairok abono nugwi bini sagrirokno hai hwnwi sẃng kha, “Norokni hodakra tamo wngwi teks romnairok bai tei basijakrok bai chá lai nung lai khlai sla?”

¹²Jisu bórokni kók khnaui hai hwnwi sa kha, “Kahamni daktor nang ya, hamyani se nango.

¹³‘Ang pun tok nai ya, khairokma se nai-o,’ hwnwi elembakni o kók tamo hwnwi sa kha thángwi nai di. Bórom gwnangrokno ang ringna phai ya, tamo khe basijakrokno se bwkha kiphil thung hwnwi ang ringna phai-o.”

¹⁴Aphuru baptisma rwnai Johonni sagrirok phaiwi Jisuno hai hwnwi sẃng kha, “Chwng bai Pharisairok ba tamo wngwi ubas tong tong lai sla? Nini sagrirok le kisa phano tong ya sla?”

¹⁵Jisu hai hwnwi sa kha “Káijaknaisa logi tong twtwi kái lai panda-o phainairok mogwi tong anw hwnwi da norok khá ka? I’nhi, ahai ya! Tamo khe omo tẃi sal phai anw, káijaknaisa bórok bai swkagwi tlangjak anw, aphuru khe bórok chá yaui ma tong anw.

¹⁶“Rí kwchamo khoroksa phano rí kwtal thap ya; omo tẃi khe thabmani abo rí kwchamno teibo kichik rwui bwlam uar rwnai.

¹⁷Eba khe khoroksa phano angur bwtwi kwtalno twk mosonjago ton ya; ton khe a twk rechek rachak wngnai, hakhe bwtwibo kwsarnai, twkbo báinai. Tamo khe angur bwtwi kwtalno twk kwtalo’-no tono, hakhe kwnwi nwi’-no kaham tong anw.”

¹⁸Jisu o kókno bórokno saui tong phuru hoda khoroksa phaiwi yáskú sungwi hai hwnwi sa kha, “Angsajwk tabuk’-no thwi dorop. Phai di, nwng bini sago yak bera kheno bo thangchanai.”

¹⁹Hakhe Jisu bachaui bini logi tháng kha bini sagrirokbo bo bai baksa tháng kha.

²⁰Bwrwima khoroksa nokha bisi chiknwi wng kha rí súma thak ya, bo uklok tẃi phaiwi Jisuni dulai buchuk tangwi rw phai kha.

²¹“Ang bini dulai buchuk tang kheno hamnai,” hwnwi bo khá bising bising uansuk kha.

²²Jisu uphilwi bono naisigwi hai hwnwi sa kha, “Bwrwima, ta uana di. Nini poito nono ham rw kha.” Aphuru’-no a bwrwima ham kha.

²³Hakhe Jisu a hodani nogo tháng kha. Kwthwini tamnairokno tei bebak borokno kutuk laijak nugwi.

²⁴Bo hai hwnwi sa kha, “Jotono ongkhorwi tháng bai di! O chwrai thwi ya; bo thu-ui se tongo!” Bui bebak’-no bono mwnwi bai kha.

²⁵A bororokno tikhlai rw bai kheno a chwrai tongma nogo Jisu habwi bini yak romwi kha, hai kheno a chwrai bacha kha.

²⁶O kók a ha gwnangwi pírjak kha.

²⁷Jisu aroni kutulwi tháng kha, hakhe himwi tong phuru mokol phula khoroknwi bono rwkthar lai kha. “O Daudni Sajla, chwngno khairok jaba di!” hwnwi bórok chirik lai kha.

²⁸Jisu nogo tháng kheno a mokol phula khoroknwirok bini thani phai kha. “Ang omo hai khlaiwi mano hwnwi norok poito da tháng?” hwnwi Jisu bórokno sẃng kha. “I’n, poito thángo, hodasa,” hwnwi bórok sa kha.

²⁹Jisu aphuru khe bórokni mokol tangwi “Norok poito tháng tẃi’-no wng thung!” hwnwi sa kha.

³⁰Hakhe bórok mokol nuk kha. “O kókno khoroksano phano ta sa di,” hwnwi Jisu bórokno ragdama khe sa kha.

³¹Bórok thángwi Jisuni kók a ha gwnangwi pír kha.

³²A borok khoroknwirok tháng kheno khoroknwi khoroktham bororok mwtai hamya kolobjak kók man ya khoroksano Jisuni thani tubu lai kha.

³³A mwtai hamya rwkhlaijak kheno a borok kók sacha kha. Jotono uanajak bai kha. “Israilrokni bisingo omo hai chwng nuk ya kho,” hwnwi bórok sa lai kha.

³⁴Pharisairok khe “Mwtai hamyarokni bokhorok bai se bo mwtai hamyarokno rwkhlai-o,” hwnwi sa lai kha.

³⁵Jisu bebak taunrogo kamirogo tháng kha. Bo bórokni thumnokrogobo phrwng kha, Kaitorni hani Kothoma Kahambo pír kha, bebak bemuk gwnang hamyaroknobo ham rw kha.

³⁶Bo lukurokno nugwi belai khairokjak kha, tamni hwn khe mwrwknai kwrwi merarok hai bórok khairok susuk piring-poroi gwja.

³⁷Aboni bagwino bo bini sagrirokno hai hwnwi sa kha, “Mai kwbángma munui tong kha, yang ranai se báng ya.

³⁸Aboni bagwino bini mai rana bagwi ‘Teibo borok rohor di,’ hwnwi nokphangsano san di.”