Read Kok Borok MARK 1 Bible Online

MARK 1 - Kok Borok bible

MARK 1

¹Omono Kaitorni Sajla Jisu Khristoni Kothoma Kaham.

²Omo Jisaia diyari hai hwnwi swiwi klangma hai khe chengsajak kha: “Kaitor hai hwnwi sa-o, ‘Iko, omono ang rohormani a borok, ang bono nini lama hokna bagwi nini slái swkang rohor anw.’

³Hasing panthoro khoroksa hai hwnwi chirikhókjak, ‘Subraini bagwi lahar snam di, bo himnani lamano kepleng khe ton di!’ ”

⁴A kók hai’-no Johon hasing panthoro nukjak phai kha. Bororokno baptisma rw twtwi bo hai hwnwi sa kha, “Sumsok yakar di, yakarwi baptisma wng di, hakhe Kaitor norokni sumsok nakar anw.”

⁵Judia amchoi bai Jerusalem taunni joto borok Johonni thani tháng bai kha. Bórok sak sakni sumsokno gosi kha, hakhe bo bórokno Jordan twima-o baptisma rw kha.

⁶Johon mangingang buikhumuni rí kano, bukur bai bwchang kha-o, bo kúkthora bai bolongni piya modu chá-o.

⁷Bo hai hwnwi sa kha, “Ani slái ulo phainai bo ani slái kwplai kuk; ang bomsonwi bini yaklap sokokna suda chúk ya.

⁸Ang norokno twi bai se baptisma rw-o, bo le norokno Phola Kwthar bai se baptisma rwnai.”

⁹Aphuru Jisu Galili amchoini Nasaretni phai kha, hakhe Johon bono Jordano baptisma rw kha.

¹⁰Jisu twini kasama logi’-no bo nokha phiyokjakma nuk kha, phiya Pholano pharuk hai khe bini sago birkhlai phaima nuk kha.

¹¹Hakhe chuknohani kók hai hwnwi sakhlaijak kha, “Nwng ani khájani Sajla. Ang nono’-no belai khe hamjago.”

¹²Aboni logi logi’-no Phola bono hasing panthoro rohor kha.

¹³Bo aro nokha sal brwichi ma tong kha, aphuru bo Soitan bai belokjak kha. Aro bolongni uak-tokrok tongo, hai phano suarirok bono chuba phai kha.

¹⁴Johon alongo klai bai khe Jisu Galili-o thángwi Kaitorni aroni Kothoma Kaham hai hwnwi pír kha,

¹⁵“Mol sók phai kha, Kaitorni ha sampha kha. Sumsok yakar di, hakhe Kothoma kahamno poito khlai di!”

¹⁶Jisu Galili twibom rukungo himwi tong phuru Simon bai bini takhuk Andria-o gabor khoroknwino twibomo chei bu-ui tongma nuhur kha.

¹⁷Jisu bórokno hai hwnwi sa kha, “Ani logi phai di, ang norokno borok romna phrwng anw.”

¹⁸Logi logi’-no bórok chei yakarwi bini logi tháng lai kha.

¹⁹Bo bwskango tei kisa him khe tei takhuknwirokno nuhur kha, bórok wng kha Sebedaini bwsarok Jakob bai Johon. Bórok rungo chei snamwi tong lai-o.

²⁰Nuhurma logi’-no Jisu bórokno ring kha, hakhe bórok munirok bai bupha Sebedaino rungo klangwi Jisuni logi tháng lai kha.

²¹Bórok Kapharnaumo phai lai kha, hakhe bwskangni Sabat salo Jisu thumnogo habwi phrwngwi kha.

²²Bo phrwngmano khnanairok uanajak bai kha. Bo Kerong phrwngnairok hai phrwng ya, suar gwnang khe se phrwngo.

²³Aphuruno mwtai hamya kolobjak khoroksa a thumnogo habwi hai hwnwi chirikhók kha,

²⁴“O Nasaretni Jisu, nwng chwng bai tamo nangjak? Nwng chwngno sokomorna da phai? Nwng sabo ang saui mano. Nwng Kaitorni aroni borok kwthar!”

²⁵Jisu a mwtaino hai hwnwi damrok kha, “Siringcha wng di! O borok bisingni ongkhorwi phai di!”

²⁶Hakhe a mwtai a borokno leng rwui sotonwi chirikhók kha, hakhe bini bisingni ongkhorwi phai kha.

²⁷Bebak bororok aswk khe uanajak bai kha, hakhe hai hwnwi sa lai kha, “Omo tamo? Bo phrwngmani omo tail juda ya da? Bo kwplai khe mwtai hamyarokno suda dagi-o, bo dagimano bórokbo ma khna-o!”

²⁸Aboni bagwino Jisuni kók Galili amchoi gwnangwi dakti pírjak kha.

²⁹Bórok thumnokni khe uáisa bai’-no Simon bai Andriani nogo tháng lai kha, Jakob bai Johonbo logi tháng kha.

³⁰Simonni bwkrajwk aphuru lumui klaijak, hakhe Jisu aro sógwi kheno bini kók saui khna rwjak kha.

³¹Jisu bini thani thángwi yak romwi socha kha. Kulum swraui tháng kha, hakhe bo bórokno chá rw kha khan rw kha.

³²Sal habwi sanja wngwi phai kheno bororok Jisuni aro bebak hamyarok bai mwtai kolobjakrokno tubu kha.

³³Taunni bebak bororok nok bwskango kuthum phai bai kha.

³⁴Jisu podrepot bemuk gwnang aswk hamyarokno ham rw kha, phiya aswk mwtai hamyaroknobo rwkhlai kha. Bo mwtai hamyarokno kók tháisa phano sa rw li ya, tamni hwn khe bo sabo hwnwi bórok saui mano.

³⁵Teini phungo belai aisirisiri sal pa ya sini Jisu bachaui nokni ongkhorwi tháng kha; bo taunni ongkhorwi siring siring kwrẃngsa-o thángwi suri sanwi kha.

³⁶Simon bini logisongrok bai baksa bono naitukna bagwi ongkhorwi tháng lai kha.

³⁷Bórok bono nuk khe’-no hai hwnwi sa kha, “Jotono nono naitugwi tong kha.”

³⁸Hakhe Jisu hai hwnwi sa kha, “Phai di, chwng gana-gini kamirogo tháng anw. Arobo ang pír thai klai-o; omoni bagwino ang phai-o.”

³⁹Aboni bagwino bo Galili gwnangwi thumnokrogobo pír kha, mwtai hamyaroknobo rwkhlai kha.

⁴⁰Biyadi chájak khoroksa Jisuni thani phai kha, bo yáskú sungwi hai hwnwi koi phai kha, “Nwng ano ham rwna khe ham rwui mano.”

⁴¹Jisu khairokjagwi yak phologwi bono tang kha. “Ham di, ang nai-o,” hwnwi bo sa kha.

⁴²Logi logi’-no a borokni biyadi kwmaui tháng kha, hakhe bo ham kha.

⁴³Hakhe Jisu bono ragdama khe hai hwnwi saui logi logi’-no rohor kha, “Khna di, o kókno kebono ta sa di. Tháng di, ochaino thángwi phunugui di. Nwng tabuk ham kha hwnwi lukuno phunukna bagwi Musi rathar di hwnwi dagima hai’-no ratharwi di.”

⁴⁵Aile a borok le thángwi se o kókno yang yang pírsaui rwui kha. Bo aswk sama bai Jisu tei pháng-pháng khe tauno thángwi man li ya. Aphuru bo phataro siring siring kwrẃngsa-o se tongwi si-o, hakhe yang yangni bororok bini thani phai kha.