Read Kok Borok MARK 10 Bible Online

MARK 10 - Kok Borok bible

MARK 10

¹Jisu aroni kutulwi Judia amchoi-o tháng kha, Jordan twimani ayang narobo tháng kha. Lukurok haino hai bini thani kuthum phai kha, hakhe swkangrogo phrwngma hai’-no bo bórokno phrwng kha.

²Pharisai khoroknwi khoroktham bini thani phaiwi bono khẃi-o kwcha rwna nai kha. “Chwngno sa di, hikno kagwi mano hwnwi chini Kerongo sa da sa?” hwnwi bórok sẃng kha.

³Jisu hai hwnwi sẃng kha, “Musi norokno tamo hwn?”

⁴Bórok hai hwnwi sa kha, “Kaksen swiwi rw khe hikno kagwi rohorwi mano hwnwi Musi chwngno hwno.”

⁵Jisu bórokno hai hwnwi sa kha, “Norok tẃi khá siyarokno phrwngna bagwi Musi a dagimano swi klang kha.

⁶Phiya ba agi takchengjak phuru hai hwnwi sajak kha, ‘Kaitor borokno chwla bai bwrwi khe snam kha.

⁷Omoni bagwino borok buma bupha bai kagwi bihik bai thansa wngnai,

⁸hakhe a kwnwi kaisa wngnai.’ Aboni bagwino bórok tei kwnwi li ya, kaisa se.

⁹Aboni bagwino Kaitor thepamano borok ta swkak thung.”

¹⁰Bórok noksingo kiphilwi tháng khe sagrirok Jisuno aboni kók sẃng kha.

¹¹Bo bórokno hai hwnwi sa kha, “Hikno kagwi tei khoroksa bwrwi nanai bo lupcha se;

¹²abo hai’-no bwsaino kagwi tei khoroksa chwla nanai bo’-bo buitali se.”

¹³Chwrairokno tang thung hwnwi baksa borok chwrairokno Jisuni thani tubu kha. Hakhe sagrirok a bororokno ta tubu di hwnwi hwn kha.

¹⁴Jisu abono nugwi jolijak kha, hakhe bini sagrirokno hai hwnwi sa kha, “Chwrairokno ani thani rohor di, ta kasu di, omo tẃi bororokni bagwino Kaitorni ha.

¹⁵O kókno muitu narwk di, chwrai hai khe Kaitorni hano yachak ya khe khoroksa phano aro habwi se man ya.”

¹⁶Bo a chwrairokno bamwi khoroksa khoroksa khe bórokni sago yak rwui ham di hwn kha.

¹⁷Jisu lam rwna nai phuru borok khoroksa khachigwi bini bwskango yáskú sungwi klai phaiwi hai hwnwi sẃng kha, “O hoda kaham, kwthang tong phlaina bagwi ang tamo ma khlaithai klai?”

¹⁸Jisu bono hai hwnwi sẃng kha, “Nwng tamo wngwi ano kaham hwn? Kaitor simi se kaham, tei khoroksa phano kaham kwrwi.

¹⁹Nwng kerong dagimano saui mano; ‘Borok ta buthar di, buitali-buitala ta wng di, ta khok di, tatal ta sa di, ta phemlok di, buma buphano sak nang ya ta wng di.’ ”

²⁰A borok hai hwnwi sa kha, “Hodakra, chwrai phangsni simi’-no ang omorok bebak’-no rákhogwi phai kha.”

²¹Jisu bono hamjagwi naisik kha, hakhe hai hwnwi sa kha, “Nini khlaijaknai tei mungsa se tong si-o. Tháng di, nini tong kwrwi bebakno phal baiwi a rangno kwrwirokno rw di, hakhe chuknoha-o nini rang khatijak anw. Omo khlai bai khe ani logi phai di.”

²²O kók khnaui a borokni bumukhang sopsa som kha, bo khá thwijagwi tháng kha, bo le snamwi gwnang bla.

²³Jisu yang yang naisigwi sagrirokno hai hwnwi sa kha, “Gwnangrok Kaitorni ha-o hapnani bwswk se kutuk!”

²⁴Sagrirok a kók khnaui uanajak kha, tamo khe Jisu hai hwnwibo sa kha, “Chwraisarok, Kaitorni ha-o hapnani[1] bwswk se kutuk!

²⁵Suchi bwlam tẃi mangingang hapna se lai anw ba, Kaitorni ha-o gwnangrok hapnani aswk lai glak!”

²⁶Aboni bai sagrirok belai uanajagwi “Hakhe sabo mwthangjaknai sla?” hwnwi sẃng lai kha.

²⁷Jisu bórokno naisigwi hai hwnwi sa kha, “Borok omono khlai man ya phano Kaitor khlai mano; Kaitor jotono khlai mano.”

²⁸Pitor aphuru khe hai hwnwi sacha kha, “Nai di, chwng joto khibi baiwi nini logi phai kha.”

²⁹Jisu hai hwnwi sa kha, “Au, ang norokno o kók sa-o, ani bagwibo Kothoma Kahamni bagwibo nok huk, takhuk bukhuk, buma bupha, chwrai khonai tei kheto panthor khibinai borok

³⁰bo o molo aboni slái phano kwbángma mannai. Bo sa-rani bára nok huk, takhuk bukhuk, buma, chwrai khonai tei kheto-panthor mannai; aboni logi sabo sátokjaknai; phiya phainai molo bo mwthangjak phlainai.

³¹Hai phano tabukni swkangrok baksa baksa uklogo tong rwk anw, phiya tabukni uklokrok baksa swkang wng anw.”

³²Bórok aphuru Jerusalem bwkhak him laijak. Jisu sagrirokni swkang swkang himjak, sagrirok uanama hapjak; uklogo himnai bororok kirima hapjak lai kha. Jisu tei uáisa sagri chiknwirokno simi tlangwi bini sago nang phainanirokno sa kha.

³³Bo hai hwnwi sa kha, “Khna di, chwng Jerusalemo toksaui thángnai, arono Borokni Sajla ochai okrarok tei Kerong phrwngnairokni yago yapharwi rohorjaknai. Bo ma butharjakna nangnai hwnwi bórok hwnnai, hakhe bono buini bororokni yago yapharwi rohornai.

³⁴Bórok bono mwnwi lainai, khuktwi musunai, swpraknai, hakhe butharnai. Hai phano salthamni ulo bo thangwi bachanai.”

³⁵Aphuru Sebedaini bwslasong Jakob bai Johon Jisuni thani hai hwnwi sa phai kha, “Hodakra, chwng sanma hai nwng khlai thung hwnwi chwng nai-o.”

³⁶“Norok tamo nai? Ano tamo khlai di hwn?” hwnwi Jisu bórokno sẃng kha.

³⁷Bórok hai hwnwi sa kha, “Nwng chẃngsacha khe bugra wng phuru chwngno nwng bai achuk rw di, khoroksano yagra, tei khoroksano yaksi.”

³⁸Jisu bórokno hai hwnwi sa kha, “Norok tamo san abo norok saui man ya. Ang nungnanino norok nungwi da mano ba? Ang baptisma nananino norok naui da mano ba?”

³⁹“Chwng mano,” hwnwi bórok sa kha. Jisu bórokno hai hwnwi sa kha, “Ang nungnanino norok ma le ma nungnai, phiya ang baptisma nanano norok ma le ma nanai,

⁴⁰tamo khe sabono ba yaksi achuk rwnai, abo ang chongwi man ya, Kaitor se abo achuk rwnai. Bo chongwi tongmani a bororokno se aro achuk rwnai.”

⁴¹Tei sagri khorokchirok aboni khnaui Jakob bai Johonno jolijak kha.

⁴²Hakhe Jisu bórok bebak’-no bini thani ringwi hai hwnwi sa kha, “Norok saui mano habugra hwnjaknairok bororokno kók khna rwui tongo, bokhorokrokbo ahai’-no khlai-o.

⁴³Norokni hwn khe ahai ya. Norokni bere kotor wngna sadinai borok bo teirokni seleng ma khatinai,

⁴⁴phiya norokni bere bokhorok wngna sadinai borok bo jotoni seleng ma khatinai.

⁴⁵Hwm ba Borokni Sajla suda bui bai naijakna nukjakna phai ya; buino se naina nukma phai-o hakhe aswk bororokno phiyókna bagwi butharjakna se phai-o.”

⁴⁶Bórok Jeriko sók phai kha, Bini sagrirok bai tei aswk bororok bai Jisu aroni kutul phuru Timaini bwsla Bartimai hwnwi phula khoroksa lama gana achugwi bírwi tongo.

⁴⁷Bo abo Nasaretni Jisu hwnwi khna khe’-no hai hwnwi chirikhókna chengsa kha, “O Jisu, Daudni sajla! Nwng ano kháirok jaba di!”

⁴⁸Aswk bororok bono “Ta kutuk di!” hwnwi damrok rwrwk bo teibo sotonwi “O Jisu, Daudni Sajla! Nwng ano kháirok jaba di!” hwnwi chirikhók rwrwk.

⁴⁹Jisu bathagwi hai hwnwi sa kha, “Ring di bono.” Hakhe bórok a phulano ringwi hai hwnwi sa kha, “Ta uana di. Bacha di, bo nono ringo.”

⁵⁰Bo bini dulai khugwi bathrong bárwi Jisuni thani phai kha.

⁵¹Jisu bono hai hwnwi sẃng kha, “Nwng tamo nai? Ano tamo khlai di hwn?” “Hoda, ang mokol nuk phina muchungo,” hwnwi bo sa kha.

⁵²“Tháng si di, nini poito nono ham rw kha,” hwnwi Jisu bono sa kha. Bo logi logi’-no mokol nuk kha, hakhe lama-o Jisuni logi tháng kha.