Read Kok Borok MARK 11 Bible Online

MARK 11 - Kok Borok bible

MARK 11

¹Bórok Betphagi tei Bethania tauno Jerusalem gana sók phaiwi Tháistwi hathái-o phai lai kha. Jisu aphuru bini sagri khoroknwino

²hai hwnwi saui rohor gra kha, “Bwskangni u kami-o tháng di. Norok aro sógwima logi’-no khoroksa bai phano kasajak ya kho abo tẃi korai masa nugwi anw. Abo khengwi oro tubu-ui phai di.

³‘Norok tamo wngwi omo hai khlai?’ hwnwi khoroksa swk sẃng khe hai hwnwi sa di, ‘Hoda omono samung nangjago, bo dakti’-no oro kiphilwi rohoro anw.’ ”

⁴Hakhe bórok thángwi lama-o nok duglamo khajak korai masa nugwi kha. Bórok abono khengwi tong phuru

⁵aro bachaui tongnairok baksa hai hwnwi sẃng kha, “Norok tamo wngwi o koraino kheng?”

⁶Bórok Jisu saui rohorma hai kheno sa kha, hakhe a bororok bórokno rohor kha.

⁷Bórok a koraino Jisuni thani tubu-ui aboni saka bórokni rí phinwi rw kha, hakhe Jisu kasa kha.

⁸Luku kwbángma bórokni rí lama-o boui rw lai kha, baksa ba chara-o buphang bedekrok tanwi lama-o beraui rw lai kha.

⁹Bwskango himnairok bai uklogo himnairok hai hwnwi chirikhók lai kha, “Kaitorno lob di![2] Subraini mungwi phainaino Kaitor hamari rw thung!

¹⁰Subraini mungwi phaina hwnmani chini Apha Daudni a hano Kaitor hamari rw thung! Kaitor lobjak thung!”[3]

¹¹Jisu Jerusalemo habwi noktharo tháng kha, hakhe yang yang joto naisik kha. Tamo khe sal thángma bai bo aroni kutulwi sagri chiknwirok bai Bethania-o tháng kha.

¹²Teini salo bórok Bethaniani kiphilwi phai phuru Jisu ok khuijak kha.

¹³Bo hakchalo tong twtwi bwlái jaksarjak khwichang buphang phangsa nuhur kha, hakhe bo khwichang da manno hwnwi buphango thángwi nai kha; aile aro phaiwi bo bwlái simi se nuk phai si-o, aphuru khwichangni jora wng ya kho.

¹⁴Hakhe Jisu a khwichang buphangno hai hwnwi sa kha, “Khoroksa phano nini oroni khwichang ta ma chá thung!” Bini sagrirok bini o kókno khna kha.

¹⁵Bórok Jerusalemo sók phai kheno Jisu noktharo habwi aroni painairokno phalnairokno rwkhlai kha. Bo rang sláinairokni tebul bai pharuk phalnairokni tulrokno philwi rw bai kha,

¹⁶hakhe noktharni nokhla tẃi kebono mungsa phano tlang rw li ya.

¹⁷Bo aphuru bororokno hai hwnwi phrwng kha, “ ‘Ani nok bebak dophani bagwi suri sanjaknai nok hwnjaknai,’ hwnwi Kaitor samani o kók elembago swijak tongo. Yang norok le omono dagait bothop se snamwi tong kha!”

¹⁸Ochai okrarok bai Kerong phrwngnairok abono khna kha, hakhe Jisuno butharna lama naituk lai kha. Aswk lukurok bini phrwngmano uanajakma bai bórok bono kirijak kha

¹⁹Sanja wng khe Jisu bini sagrirok bai taunni kutul kha.

²⁰Teini salo phung aisirisiri a lama tẃi himwi tháng phuru bórok a khwichang buphangno nuk kha; abo yarwng gwnangwi bebak kórósajak.

²¹Pitor aphuruni kókno muitu manjagwi Jisuno hai hwnwi sa kha, “Hodakra nai di, nwng swraimani o khwichang buphang kóróui tháng kha!”

²²Jisu bórokno hai hwnwi sa kha, “O kókno muitu narwk di, norok Kaitorno poito khlai khe norok u hatháinobo ‘Tháng di, nwng twijlango klai di,’ hwnwi saui mano. Norok samani abo wngnai hwnwi bwkha dudru mudru wng yaui poito khlai khe norokni bagwi abo wngnai.

²⁴Aboni bagwino ang norokno o kók sa-o, norok suri sanwi mungsa swk san khe abono man kha hwnwi poito khlai di, hakhe norok sanmano mannai.

²⁵Phiya bachaui suri san phuru khoroksa swkno jolima tong khe a borokno nakar di, hakhe chuknohani norokni Phabo norokni sumsok nakarnai.

²⁶[Norok buino nakar ya khe chuknohani norokni Phabo norokni sumsok nakar glak.]”

²⁷Bórok Jerusalemo kiphilwi phai kha. Jisu noktharo himwi tong phuru ochai okrarok, Kerong phrwngnairok tei okra chakrarok bini thani phai kha,

²⁸hakhe bono hai hwnwi sẃng kha, “Nwng bu phan bai omo tẃirokno khlai? Omo tẃirokno khlainani phan nono sabo rw kha?”

²⁹Jisu bórokno hai hwnwi sa kha, “Angbo norokno kók tháisa sẃngnai. Norok abono sa khe bu phan bai omo tẃirokno khlai angbo norokno sanai.

³⁰Norokbo sa di, Johon baptisma rwmani phan le Kaitorni aroni da, borokni aroni?”

³¹Hakhe bórok kiching bórok hai hwnwi sẃng lai kha, “Chwng tamo sanai? ‘Kaitorni aroni,’ hwnwi sa khebo ‘Norok tamo wngwi hai khe Johonno poito khlai ya sal?’ hwnwi bo chwngbo sẃngnai.

³²Phiya ‘Borokni aroni,’ hwnwi sa khebo” (jotono Johonno diyari hwnwi tong laima bai bórok lukuno kirijago.)

³³Aboni bagwino bórok Jisuno hai hwnwi sa kha, “Chwng saui man ya.” Jisu bórokno hai hwnwi sa kha, “Bu phan bai ang omo tẃirokno khlai angbo ahai khe norokno sa ya.”