Read Kok Borok MARK 12 Bible Online

MARK 12 - Kok Borok bible

MARK 12

¹Aphuru Jisu bórokno rwngthoma bai hai hwnwi sa kha, “Borok khoroksa angur káimani. Bo a angur bari bera dúm bai kha, angur sepna bagwi holongdabo hakhor khur kha, phiya mwrwkna bagwi garing tang kha. Hakhe bo a barino munirokni yago klangwi beraina tháng kha.

²Angurni jora phuru bo bini banta na rw horna hwnwi seleng khoroksano a munirokni thani rohor kha.

³Yang le munirok a selengno romwi bu laiwi yak bukcha khe kiphilwi rohor kha.

⁴Nokphang hakhe tei khoroksa selengno rohor khua. A munirok bono bokhorogo bu laiwi lachimasingcha khlai kha.

⁵Nokphang hakhe tei khoroksa selengno rohor khua, bórok bono buthar kha; bórok teibo kwbángmanobo abo hai khlai kha, baksano bu kha, baksano ba buthar kha.

⁶Ulo rohorjaknai khoroksa se tong si-o, abo wng kha a borokni khájani bwsla. Hakhe bo bwslano a munirokni thani rohor kha. ‘Angslano le bórok sak nang ya wng glak,’ hwnwi bo sa kha.

⁷Yang le a munirok hai hwnwi sa lai kha, ‘Omo nokphangni bwsla se bla. Phai di, chwng bono buthar lai anw, hakhe buphani sompoti chini yago klai anw!’

⁸Aboni bagwino bórok bono romwi buthar lai kha, hakhe angur barini bono kariui rohor lai kha.

⁹“Hakhe nokphang tamo khlaino?” hwnwi Jisu sẃng kha. “Bo phaiwi a munirokno buthar baiwi buini yago angur bari rw anw.

¹⁰Norok Elembakni o kókno suda pori ya kho diba? “ ‘Nok tangnairok samung nang ya hwnwi khibiui rwmani holongthai abono wng phai kha nok busuni holongthai.

¹¹Subrai khlai kha o samungno; chwngbo uana kha nugwi abono.’ ”

¹²Judai hodarok Jisuno romna nai lai kha, tamni hwnwi khe o rwngthoma bai bo bórokno kók khitarwi sa-o hwnwi bórok saui man kha. Hai phano bórok lukurokno kirijakma bai bono yakarwi tháng kha.

¹³Jisuno kók sẃngwi khẃi-o kwcha rwna bagwi baksa Pharisairok bai Herodni baksa bororok rohorjak kha.

¹⁴Bórok bini thani phaiwi hai hwnwi sa kha, “Hodakra, chwng saui mano nwng kók kubui sa-o. Bororok tamo hwn hwn ya abono nwng uansuk yaui tongo, tamni hwn khe keboni bumukhang naisik yaui nwng Kaitorni lamani kókno sói khe phrwngo. Hakhe chwngno sa di, Rumni habugra kotorno teks rwmani abo chini Kerong swbaima da klai? Chwng ba rwma da cha no?”

¹⁵Jisu bórokni phemlokmano saui manẃi hai hwnwi sa kha, “Norok tamo wngwi ano khẃi-o kwcha rwna nai lai? Rukphaini rang kaisa tubu-ui ano phunuk phai di.”

¹⁶Bórok abono tubu khe bo hai hwnwi sẃng kha, “Omo saboni bumukhang? O bumung saboni?” “Habugra kotorni,” hwnwi bórok sa kha.

¹⁷Hakhe Jisu hai hwnwi sa kha, “Hakhe ba habugra kotorni manthaino bono rw di, Kaitorni manthaino Kaitorno rw di.” Hakhe bórok bono uanama chajak kha.

¹⁸Sadukai khoroknwi khoroktham Jisuni thani phai kha. (Bórok kwthwirok thangwi bacha ya hwnwi sa lainairok.) Bórok bono hai hwnwi sẃng kha,

¹⁹“Hodakra, Musi chini bagwi Kerongo hai hwnwi swiwi klang kha: ‘Khoroksa swk bwsa man ya sini bihikno klangwi thwiwi tháng khe bini bosongno narwkna bagwi a randijwkno a borokni buphayung nok phirogwi na thung.’

²⁰Rom di, takhuksnirok tongmani. Okra káijagwi bwsa man yaui’-no thwi kha.

²¹Hakhe tei takhuksa a bwrwino naui bwsa man yaui’-no thwi kha. Tei takhuksani jorabo ahai’-no wng kha.

²²Abo hai khe máng bórok takhuksni a bwrwino naui bwsa man yaui’-no thwiwi tháng bai kha. Ulo khe a bwrwibo thwi kha.

²³Tabuk, kwthwirok thangwi bacha phuru a salo a bwrwi saboni bihik wngna klai? Bórok takhuksni’-no bono na lai kha.”

²⁴Jisu bórokno hai hwnwi sa kha, “Norok bwswk se cha ya gwja! Tamni saui da man? Norok wng kha elembakni kókbo saui man ya, Kaitorni phanbo saui man ya.

²⁵Kwthwini thangwi bachanairok bórok chuknohani suarirok hai, chwla bwrwi kebo káijak lai ya.

²⁶Tabuk, kwthwirok thangwi bachanani kókno ang sa anw; norok Musini bijabo satasuta khamwi tongmani kókno pori ya kho diba? Aro Kaitor Musino hai hwnwi sa kha, ‘Ang Abrahamni Kaitor, Isakni Kaitor, Jakobni Kaitor.’

²⁷O kók wng kha ahai, bo kwthangrokni Kaitor se, aboni bagwino borok thwiwi tháng phano kwthang tongo. Norok belai cha ya gwja!”

²⁸Kerong phrwngnai khoroksa aro tongmani, bo a sa laimano khna kha, Jisu a Sadukairokno kaham khe samano bo nuk kha, hakhe bo bono hai hwnwi sẃng phai kha, “Kerongni bu kók jotoni slái kotor kuk?”

²⁹Jisu hai hwnwi sa kha, “Omo se jotoni slái kotor kuk, ‘O Israilrok, khna di! Subraino chini Kaitor, bo simi se Subrai.

³⁰Hakhe nini Kaitor Subraino khá bai khúk bai yak bai uansukma bai hamjak súk di.’

³¹Tei tháisa kók kotor khe ahai, ‘Nwng sakno hamjak tẃi’-no buinobo hamjak di.’ O kók tháinwino karwi tei kók kotor kwrwi.”

³²A Kerong phrwngnai Jisuno hai hwnwi sa kha, “Hodakra, abo kók kaham’-no! Subrai simi se Kaitor, phiya bono karwi tei Kaitor kwrwi hwnwi nwng samani abo sóino.

³³Hakhe borok Kaitorno khá bai khúk bai yak bai hamjak sukna nangnai, phiya sakno hamjak tẃi’-no buinobo hamjakna nangnai. Pun tok ratharwi Kaitorni thani barokmani slái o kók tháinwino se khnathai klai-o.”

³⁴A borokno kaham khe uansugui kók sama nugwi Jisu hai hwnwi sa kha, “Nwng Kaitorni ha bai chal tha li ya.” Aboni ulo Jisuno tei khoroksa phano kók sẃng rak li ya.

³⁵Jisu noktharo phrwngwi tong phuru o kókno hai hwnwi sẃng kha. “Masia Daudni bwsa hwnwi Kerong phrwngnairok bahai kha se lai bai?

³⁶Phola Kwtharni bising tẃi Daud sakphang’-no hai hwnwi sa lang kha, “ ‘Subrai ani Subraino ahai hwnwi sa kha: Achuk di oro ani yagra bwkhak, khiklai ya sak ang nini kena arirokno nini yakung yaphango.’

³⁷“Daud sakphang se bono ‘Subrai;’ hwnwi hwn khe Masia bahai khe Daudni bwsa wngwi mannai?” Luku kwbángma Jisuni kókno khápang srangwi khna kha.

³⁸Bórokno phrwng phuru bo hai hwnwi sa kha, “Kerong phrwngnairok bai hus khe tong di. Bórok liling lala kanna nai-o; hati-haba-o khulumjakna nai-o;

³⁹thumnokrogo buini slái bwskango achukna nai-o, panda-o achukthai kahamo achukna nai-o.

⁴⁰Bórok randijwkrokni nok huk monok baiwi saka saka simi tángma-tángsa khe suri sanwi phunugo. Bórok teibo belai khe yagul sujaknai.”

⁴¹Jisu noktharni rang tonjaknai japani bwskango achuk tw tẃi bororok rang rwui tongmano naharwi tongmani. Aswk gwnangrok rang kwbángma rwui tongo.

⁴²Aphuru bigra randijwk khoroksa phaiwi lepnwi rw phai kha, abo puisa lepnwi bai baksa.

⁴³Hakhe Jisu sagrirokno kwrẃngsa khe ringwi hai hwnwi sa kha, “Ang norokno o kók sa-o, o bigra randijwk se bebakni slái rang tonjaknai japa-o rang rw kuk kha.

⁴⁴Bui le kwbángmani se mukhi swk khái rw-o, o randijwk le kwrwi tw tẃi chána ajimano se bebak rw bai kha.”