Read Kok Borok MARK 14 Bible Online

MARK 14 - Kok Borok bible

MARK 14

¹Yókma ter bai Auang bángla ter nokha salnwi se tong si-o. Ochai okrarok tei Kerong phrwngnairok bising bising Jisuno romwi butharna lama naitugwi tong lai kha.

²“Chwng bono o terni bisingo romna kók kwrwi, wng ya khe bororok udru mudru phnangnai se,” hwnwi bórok sa lai kha.

³Jisu Bethania-o biyadi chájak Simonni nogo tongmani; bo cháui tong phuru bwrwi khoroksa holong kuphurni sisi-o khe nard kahamni snamjak belai morok thok motom tubu-ui phai kha. Bo a sisi swbaiwi Jisuni bokhorogo thok motom luproui rw kha.

⁴Aroni baksa bororok jolijagwi hai hwnwi sa lai kha, “O thok motomno tamo wngwi ahai’-no khibi lang?

⁵Abono rang thamra khe phalwi kwrwirokno se rwui man kha mun bla!” Hakhe bórok bono rak kheno biskara sa lai kha.

⁶Hakhe Jisu hai hwnwi sa kha, “Ta sa lai si di! Norok tamo wngwi bono tekto rw? Ani bagwi bo samung kaham’-no tang kha.

⁷Kwrwirok ba norok bai máng tong bla, norokni muchung tẃi kheno bórokno chubaui man bla. Ang le norok bai máng tong glak.

⁸O bwrwima manma jora tẃi bo khlai kha. Ang phobjakna swkang’-no ani bwsakno tiyar khlaina bagwi bo ano thok motom lukhlai kha.

⁹Hakhe o kókno muitu narwk di, swngchar gwnangwi Kothoma Kaham pírjak thani’-no bono muitu khlaiwi bo o samung khlaimano sajaknai.”

¹⁰Aphuru Judas Iskariot hwnwi sagri chiknwirokni bere khoroksa kagwi Jisuno rom rwui rohorna bagwi ochai okrarokni aro tháng kha.

¹¹Bo samano khnaui bórok snamwi’-no tongthokjak kha, hakhe bono rang rwna hwnwi kók rw kha. Aboni bagwino Juda Jisuno rom rwui rohornani lama máng rutugwi tong kha.

¹²Auang bángla terni puilani salo, Yókma terni pandani bagwi mera bwsa ratharma salo, Jisuni sagrirok bono hai hwnwi sẃng kha, “Yókma terni panda khlaina bagwi nwng chwngno buro tháng di hwn sla?”

¹³Hakhe Jisu bórokni bere khoroknwino hai hwnwi saui rohor kha, “Tháng di, tauno habwi di, hakhe twi gola tẃijak borok khoroksa norok bai malai anw. Bo bai thangwi

¹⁴bo hapmani nokni nokphangno hai hwnwi saui di, ‘Hodakra bini sagrirok bai bu khotolo Yókma Terni panda khlainai hwnwi nono sẃng rwhoro.’

¹⁵Bo hakhe tiyar khe chithijak sakani khotol kotor kaisa norokno phunuk anw. Aro’-no chini bagwi bebak khlai sok di.”

¹⁶Sagrirok kak laiwi tauno thángwi Jisu saui rohorma hai’-no nugwi kha, hakhe bórok aro Yókma terni panda khlai kha.

¹⁷Sanja wng kheno Jisu sagri chiknwirok bai phai lai kha.

¹⁸Bórok chá lai tong lai phuru Jisu hai hwnwi sa kha, “Ang norokno o kók sa-o, norokni bere khoroksa ano rom rwnai-bo oro ang bai cháui tongo.”

¹⁹Sagrirok belai khá hamya wngwi khoroksa khoroksa khe bono “Abo ang ya na bla?” hwnwi sẃng lai kha.

²⁰Jisu hai hwnwi sa kha, “A borok norok chiknwirokni bere’-no, mairango ang bai baksa ruti chomsanai abo’-no.

²¹Elembago sama hai’-no Borokni Sajla ma thwinai; tamo khe Borokni Sajlano rom rwnai a borok bwswk sw hamya sitra no! Achai ya khe se bo ham kuk kha mun.”

²²Bórok chá lai tong phuru Jisu ruti naui Kaitorno hambai rw kha, hakhe abono swkagwi bini sagrirokno rw kha. “Hi’n, na di, omo ani bahan,” hwnwi bo sa kha.

²³Hakhe bo khuri naui Kaitorno hambai rwui abono bórokno yapharwi rw kha, hakhe bórok bebakno nung lai kha.

²⁴Jisu hai hwnwi sa kha, “Omo wng kha aswk bororokni bagwi kochok rwmani ani thẃi, Kaitor ani o thẃi bai swmai tang kha.

²⁵Ang norokno o kók sa-o, Kaitorni ha-o angur bwtwi kwtal nung ya sak ang tei o angur bwtwi nung glak.”

²⁶Hakhe bórok rwchapmung tángsa rwchap laiwi Tháistwi hathái-o tháng lai kha.

²⁷Jisu bórokno hai hwnwi sa kha, “Norok bebak’-no ano khibi khár bai anw, tamni hwn khe elembago hai hwnwi sa-o, ‘Kaitor mera mwrwknaino butharnai, hakhe bebak merarok piring-poroi wng bainai.’

²⁸Tamo khe ang mwthangwi tisajak baiwi norokni slái swkang Galili-o tháng anw.”

²⁹Pitor hai hwnwi sa kha, “Bui bebak khibiui tháng phano ang le nono khibi tháng glak!”

³⁰Jisu Pitorno hai hwnwi sa kha, “O kókno muitu narwk di, tini horo’-no tokla khuknwi kokchik ya sini nwng ano sini ya hwnwi uáitham sa anw.”

³¹Pitor teibo sotonwi hai hwnwi sa kha, “Nwng bai baksa butharjakna se gosi anw ba, nono sini ya hwnwi le ang sa se sa glak ta!” Bebak sagrirokbo a kókno kók sa kha.

³²Bórok Getsimani hwnwi kwrẃngsa-o phai lai kha, hakhe Jisu sagrirokno hai hwnwi sa kha, “Suri san bai ya sak norok oro achugwi tong lai di.”

³³Hakhe bo Pitor, Jakob tei Johonno bini logi tlang kha. Aphuru bo khábo khákhamjak kha, ámang-chímangbo wng kha,

³⁴hakhe bo bórokno hai hwnwi sa kha, “Ang belai khe khákham kha, abo thwi phano pok glak. Oro sichaui tong di.”

³⁵Bo tei kisa bwskango thángwi ha-o klaiwi suri san kha, wng khe ba bo sátokjaknani mol manjak ya tẃi khe suri san kha.

³⁶Bo hai hwnwi suri san kha, “O Apha, ani Apha, nwng jotono khlai mano. O khurino ani oroni nor di, omobo ani muchung tẃi ya, nini muchung tẃino wng thung.”

³⁷Aphuru bo kiphilwi a sagri khorokthamno muktrwi thángjak nuk kha, hakhe Pitorno hai hwnwi sa kha, “Simon nwng muktrwi thángjak da? Nwng damsa phano sichaui tongwi man li ya diba?”

³⁸Hakhe bo bórokno hai hwnwi sa kha, “Sichaui tong di, belokjak ya tẃi khe suri sanwi tong di. Bwkha le kwrakno, bwsak se kebel.”

³⁹Bo tei uáisa thángwi a kókno kók saui suri san kha.

⁴⁰Hakhe bo kiphilwi sagrirokno muktrwi thángjak nuk phai kha; bórok mokol phiyogwi tongwi man li ya. Hakhe bono tamo sanai bórok saui man li ya.

⁴¹Bo tei uáisa kiphilwi phaima jora bórokno hai hwnwi sa kha, “Norok tabuk phano muktrwi thángwi lenglaui tong kho, hai da? Belai se wng kha! Mol sók phai kha! Nai di, sumsok gwnangrokni yago Borokni Sajla tabuk yapharwi rohorjaknai.

⁴²Bacha di, him di tho. Iko, nahar di, ano rom rwnaino!”

⁴³Jisu kók saui tong phuru Judas aro sók phai kha, sagri chiknwirokni bere bo’-bo khoroksa. Bini logi borok kwbángma seng bai tokphung tẃi laijak; bórok ochai okrarok, Kerong phrwngnairok tei okra chakrarok bai rohorjakmani.

⁴⁴A rom rwnaisa a bororokno hai hwnwi phrwngwi tubu kha, “Ang motom sumani abono a borok. Bono romwi jai khe tlang di.”

⁴⁵Judas sók phaima logi’-no Jisuni gana thángwi “Hodakra,” hwnwi saui bono motom su kha.

⁴⁶Hakhe bórok Jisuno romwi kha lai kha.

⁴⁷Aphuru aro bachaui tongnai khoroksa seng sotroui achai bokhorokni selengni khunju tankhlai rw kha.

⁴⁸Hakhe Jisu bórokno hai hwnwi sacha kha, “Ang dagait da, sengrok tokphungrok bai khe norok ano romna phai ba?

⁴⁹Ang sal brúm brúm noktharo phrwng tw tẃi ang norok bai máng se, aphuru norok ano rom ya. Hai kheno Elembakni kók ma nang phainai ba.”

⁵⁰Aphuru bebak sagrirok bono khibi khár bai kha.

⁵¹Rítrak simi chumjak khe sikla khoroksa Jisuno rwkthar kha. Bórok bono romna nai lai kha,

⁵²hakhe bo rítrak khibi klangwi sak lánga khe khár lang kha.

⁵³Bórok Jisuno ochai bokhorokni nogo tlang lai kha, aro bebak ochai okrarok, okra chakrarok tei Kerong phrwngnairok kuthum laijak

⁵⁴Pitor hakchalo tong tw tẃi bono rwkthar kha, hakhe ochai bokhorokni nokhla-o tháng kha. Bo aro sebukrok bai baksa achugwi hór tongwi kha.

⁵⁵Ochai bokhorok bai bebak Kaunsil Jisuno butharna bagwi bini majra phunukna nai lai kha, tamo khe majra mungsa phano phunugui man li ya.

⁵⁶Borok kwbángma kók tatal saui bono majra ber lai kha, aile bórok aswk samani dalo klai li ya.

⁵⁷Aphuru borok khoroknwi khoroktham bachaui hai hwnwi tatal saui Jisuno majra ber lai kha,

⁵⁸“Chwng bono hai hwnwi sama khna kha, ‘Borok tisamani o noktharno ang swbainai, phiya salthamni ulo ang tei khungsa tisanai, abo borok tisama ya.’ ”

⁵⁹Hai phano bórok sama suda dalo klai li ya.

⁶⁰Ochai bokhorok bebakni bwskango bachaui Jisuno hai hwnwi sẃng kha, “Nini tháisa phano kók sana kwrwi da? O bororok nini mungwi majra bermani abo tamo?”

⁶¹Hai phano Jisu siring siring khe tong kha, kók tháisa phano sa li ya. Ochai bokhorok tei uáisa hai hwnwi sẃng kha, “Nwng Masia da, lobjaknai Kaitorni Sajla?”

⁶²Jisu hai hwnwi sa kha, “I’n, ang’-no bo. Hakhe norok Borokni Sajlano Kwplaisa Kaitorni yagra bwkhak achukjak nuk anw, phiya nokhani chumui-o khe phaima nuk anw.”

⁶³Ochai bokhorok bini rí sichigwi hai hwnwi sa kha, “Chini tei sakki samung kwrwi kha!

⁶⁴Bo Kaitorno hamya samano norok khna bai kha. Tamo hwn bai? “Bo majra gwnang, hakhe butharjakna nangnai,” hwnwi bórok bebak’-no sa bai kha.

⁶⁵Bórokni bere baksa bono khuktwi musu kha, phiya mokol khapungwi bu kha. “Nono sabo bu sa di.” hwnwi bórok sẃng kha. Hakhe sebukrok bono tlangwi thapra rw lai kha.

⁶⁶Pitor nokhla-o si kho, aphuru ochai bokhorokni selengjwk khoroksa abo tẃi phai kha.

⁶⁷Bo Pitorno hór tongjak nugwi bono naisigwi hai hwnwi sa kha, “Nwng’-bo Nasaretni Jisuni logini borok’-no.”

⁶⁸Hakhe bo o kókno gosi li ya. “Ang saui man ya...nwng tamni kók sa abo romwi man ya,” hwnwi saui bo lama-o ongkhorwi tháng kha; hai kheno tokla kokchigwi rw kha.

⁶⁹A selengjwk bono nugwi aro bachaui tongnairokno hai’-no hai hai hwnwi sa khua, “Bórokni bere bo’-bo khoroksa.”

⁷⁰Pitor abono tei uáisa gosi ya wng khua. Tei kisa tongwi aro bachaui tongnairok Pitorno hai’-no hai hai hwnwi hwn lai kha, “Nwng sói’-no bórokni bere khoroksa, tamni hwn khe nwng’-bo Galilini borok.”

⁷¹Hakhe Pitor swmai tangwi hai hwnwi sa kha, “Ang kubui sa ya khe Kaitor ano swrai thung! Nwng samani a borokno ang sini ya!”

⁷²Aphuru kheno tokla kokchikmani khuknwi wng kha, hakhe “Tokla khuknwi kokchik ya sini nwng ano sini ya hwnwi uáitham sa anw,” hwnwi Jisu bono samano Pitor muitu manjak kha. Hakhe bo khá nangwi kap kha.