Read Kok Borok MARK 3 Bible Online

MARK 3 - Kok Borok bible

MARK 3

¹Ulo Jisu thumnogo kiphilwi tháng kha. Aro yak hoichajak borok khoroksa tongo.

²Aro baksa borok Jisu samung cha ya khlai khe bono majra berna naiwi tongo. Abo bai Sabat salo bo khoroksa swkno ha da ham rw no hwnwi bórok bono oiran khe naichom lai tong lai kha.

³Jisu a yak hoichajakno “Bwskango phai di,” hwnwi sa kha.

⁴Hakhe bo lukuno hai hwnwi sẃng kha, “Sabat salo tamo tamo khlaiwi man hwnwi chini Kerongo sa? Kaham da khlai di hwn hamya? Mwthang di da hwn buthar di?” Hakhe bórok tháisa phano pungwi man li ya.

⁵Jisu jolijagwi yang yang bórokno naisik kha, bórok belai khá si ya wngma bai bo bwkha hamya wngjak kha. Hakhe bo a borokno hai hwnwi sa kha, “Yak pholok di.” Bo yak pholok kheno bini yak ham phi kha.

⁶Aboni bagwino Pharisairok thumnokni tháng kheno Herodni baksa bororok bai Jisuno butharna bagwi kók chap lai kha.

⁷Jisu bini sagrirok bai Galili twibomo tháng lai kha, hakhe luku kwbángma bono rwkthar kha. Bórok wng kha Galilini, Judiani,

⁸Jerusalemni, Idumia amchoini, Jordan ayang narni amchoini, phiya Tur tei Sidon taun gana-ginini phaimani Jisu aswk samung tangwi tongmarokno khnama bagwi se a luku kwbángma bini aro phai-o.

⁹Luku kwbángma wngma bai bororok bini sago klai phai ya tẃi Jisu bini sagrirokno rung khungsa tiyar khlai di hwn kha.

¹⁰Bo borok kwbángmano ham rw kha, hakhe aswk hamyarok bono tangna hwnwi kese-rebe khe bini sago kwlái twtwi wngwi tong lai kha.

¹¹Mwtai hamya kolobjak bororok bono nuk kheno bini bwskango klaiwi “Nwng Kaitorni Sajla se!” hwnwi chirikhók lai kha.

¹²Jisu a mwtai hamyarokno bo sabo ta sa di hwnwi ragdama khe dagi kha.

¹³Ulo Jisu hathái-o kasaui tháng kha, hakhe bo naima bororokno bini thani ring kha. Bórok bini thani phai kha,

¹⁴hakhe bo borok chiknwirokno chonghor hwnwi chong kha. Bo bórokno hai hwnwi sa kha, “Ang bai tongna hwnwi ang norokno chong kha; ang norokno pírna bagwi rohor anw,

¹⁵phiya norok mwtai hamyarokno rwkhlainani phan man anw.”

¹⁶Omorok’-no wng kha bo chongmani a khorok chiknwirok: Simon (Jisu bono Pitor hwnwi mung phar kha);

¹⁷Sebedaini bwslasong Jakob bai bini takhuk Johon (Jisu bórokno Boanergi hwnwi mung phar kha, abo “Borok Phirang” hwnma se);

¹⁸Andria, Philip, Bartholomai, Mathai, Thoma, Alphaini bwsla Jakob, Thadai, Kanansa Simon,

¹⁹hwn khe Jisuno rom rwnai Judas Iskariot.

²⁰Aphuru Jisu nogo tháng kha. Haino hai luku kwbángma kuthum phaima bai Jisu bai bini sagrirok chána suda jora man li ya.

²¹Abono khnaui bini nokni bororok bono tubuna hwnwi tháng lai kha, tamni hwn khe bororok “Bo kobor kha kha,” hwnwi sa lai tong lai kha.

²²Jerusalemni phainai khoroknwi khoroktham Kerong phrwngnairok hai hwnwi sa lai tong lai kha, “Bo Belsebul bai kolobjak kha. Mwtai hamyarokni bokhorokni phan bai se bo mwtai hamya rwkhlai-o!”

²³Hakhe Jisu bororokno bini thani ringwi omo twi rwngthoma sa kha, “Soitan ba bahai khe Soitanno rwkhlainai?

²⁴Hani bororok uálai kak lai khe a ha bai thángo.

²⁵Núkhung khungsani borok uálai-kak lai khe a núkhung baiwi thángo.

²⁶Aboni bagwino Soitanni ha kak laijak hwn khe abo kwbáng dwgwi man ya, hakhe abo kwmaui thángnai.

²⁷“Phan gwnang borokno swkang baira kha ya khe bini nogo habwi manwirok segwi tubu-ui man ya; kha khe se bini nok sodro-podro khlaiwi mano.

²⁸O kókno muitu narwk di, bororok aswk sumsok khlaimarok bai Kaitorno aswk hamya samarok bebak’-no nakarjakna tongo.

²⁹Phiya Phola Kwtharno hamya sanai borok bo nakarjak glak, tamni hwn khe bini sumsokno bo ruju phlai máng ma tong sinai.”

³⁰(“Bo mwtai hamya kolobjak kha,” hwnwi baksa sama bai se Jisu-o kókno sa-o.)

³¹Aphuru Jisuni buma bai bini takhuksong phaiwi sók phai kha. Bórok phataro bachaui tong laiwi bono ring rw hor kha.

³²Luku kwbángma Jisuno rekerwi achuk laijak, hakhe bórok bono hai hwnwi sa kha, “Nahar di, nwma bai nini takhuksong phataro, bórok nono naituk lai-o.”

³³Jisu hai hwnwi sa kha, “Sabo ani ama? Sabo ani takhuksong?”

³⁴Hakhe bono rekerwi achugwi tongnai bororokno naisigwi bo hai hwnwi sa kha, “Iko, bo se ani ama, bórok se ani takhuksong!

³⁵Kaitorni muchung tẃi tongnai borok bo’ se ani takhuk, ani bukhuk, ani ama.”