Read Kok Borok MARK 4 Bible Online

MARK 4 - Kok Borok bible

MARK 4

¹Jisu haino hai Galili twibom rukungo phrwng khua. Bini thani aswk borok kwbángma kuthum phaima bai bo rung khungsa-o kasaui achugwi kha, hakhe rung twi kwcharo sógwi kha, yang khe aswk borok twi rukungo bacha laijak.

²Bo bórokno kwbángma phrwngna bagwi rwngthomarok sa kha, hakhe phrwng twtwi bo hai hwnwi sa kha.

³“Khna di! Borok khoroksa maichlwi sarna hwnwi tháng kha.

⁴Sar phuru baksa maichlwi lama-o klai kha, hakhe toksa-toktẃirok phaiwi cháui khibi kha.

⁵Baksa ba ha kwrwi thani holongsiki-o klai kha. Ha báng thayani bagwi maichlwi dakti’-no bumuk per kha.

⁶Ulo sal kasaui phai phuru khe a bumuk kwlwi khampraui tháng kha, hakhe yarwng kwbáng sukhlai man yani bai dakti’-no hoichaui tháng kha.

⁷Baksa ba busulwngo klai kha; busurok torsaui a bumukno kobolwi khibi kha, hakhe abo bwthái thái li ya.

⁸Baksa ba ha kahamo klai kha, bumuk per kha, tor kha lok kha, hakhe bwthái thái kha, baksa kwthamchi, baksa dokchi, baksa ba sara thái kha.”

⁹Jisu hai hwnwi saui kók mwthak kha, “Khunju tong khe ba o kókno khna di.”

¹⁰Jisu saichung tongma jora khnanairokni bere khoroknwi khoroktham borok bai sagri chiknwirok bono a rwngthomarokno swbai sa di hwn lai kha.

¹¹“Kaitorni hani bisingni kókno norokno saui man rw kha,” hwnwi Jisu sa kha. “Phiya buino khe rwngthoma tẃi bebak kókno khna rwjak kha,

¹²hakhe “ ‘Bórok mokol kaichomwi naisik anw, hai phano nuk glak; bórok khunju kaichomwi khna anw hai phano romwi man glak. Wng ya khe bórok Kaitorni phaising kiphil kha mun, hakhe bo bórokno nakar kha mun.’ ”

¹³Aphuru Jisu bórokno hai hwnwi sẃng kha, “Norok o rwngthomano romwi man li ya diba? Hakhe norok bahai khe tei rwngthomarokno romwi mannai sla?

¹⁴A sarnai bo Kaitorni kókno se saro.

¹⁵Baksa a kókno khna-o, khnama logi’-no Soitan bórokni bisingni a kók sarjakno tlang phai-o. Omo twi bororokno lama-o klainai a maichlwi.

¹⁶Baksa ba a kókno khna kheno khápang srangjagwi abono khá-o chobo.

¹⁷Tamo khe abo bórokni bwkha-o hap súk yani bagwi bórok kwbáng dwgwi tongwi man ya. Aboni bagwino a kókni bagwi tekto man phuru khe, eba sátokjak phuru khe bórok phatsa uslu-o. Omo tẃi bororokno holongsiki-o klainai a maichlwi.

¹⁸Baksa ba a kókno khna-o, tamo khe bórok swngcharni kók uansugo, rang-ríno mokol chẃngo, phiya podrepot muchungjago, abo bai’-no a kók koboljagwi thángo, hakhe bwthái thái ya wngo. Omo tẃi bororok’-no busulwngo sarjaknai a maichlwi.

²⁰Baksa ba a kókno khnaui khá-o chobo, hakhe bwthái tháijago, baksa kwthamchi, baksa dokchi, baksa ba sara. Omo tẃi bororokno ha kahamo sarjaknai a maichlwi.”

²¹Jisu hai hwnwibo sa kha, “Kebo chatino twk bisingo eba khe chuki tola tonna bagwi tu da tubu? Bo thopnao’-no ton ya da?

²²Huijak tonmarok tikhlai phunukjak anw, kholopjakrok phiyokjak anw.

²³Khunju tong khe ba o kókno khna di.”

²⁴Bo bórokno hai hwnwibo sa kha, “Norok khnamano khunju kai di. Norok buino rwma swkno norokbo rwjaknai, teibo se kwbáng rwjaknai.

²⁵Gwnang teibo rwjaknai, phiya kwrwi hwn khe kisa tongma phano bini yakni najaknai.”

²⁶Jisu hai hwnwi teibo sa kha, “Kaitorni ha wng kha borok khoroksa bini kheto maichlwi sarma hai se.

²⁷A borok horo thu-o, salo sicha-o, hakhe asani a maichlwi bumuk perwi torwi phai-o abo bahai khe wng bo saui man ya.

²⁸A ha buphangrokno ahai’-no tor rw-o, bwtháibo thái rw-o; swkang bumuk, ulo bosok, aboni ulo sói maitang.

²⁹Mai munui phai kheno ranani jora phai kha hwnwi a borok chekhra bai mai ra-o.”

³⁰“Kaitorni hano chwng bahai hwnwi sanai?” hwnwi Jisu sẃng kha. “Abono si rwna bagwi bu rwngthoma chwng sanai?

³¹Omo swngcharni jotoni slái kotoi horua bwchlwi hai se. A bwchlwino kái khe

³²ulo abo achai-o, hakhe aswk samphangrokni slái bo se tor kugo. Abo bedek bupra aswk kotor khe jaksaro toksa-toktẃirok bini bedek saklomo bothop thum phai bai-o.”

³³Jisu omo hai khe aswk rwngthomarokno lukuno sa saui bini kókno pír kha; a samano romwi manna tẃi khe bo sa-o.

³⁴Rwngthoma baiyasa bo bórokno tháisa phano sa ya; phiya bini sagrirok simi phuru bórokno joto kókno swbai sa-o.

³⁵A salni sarigo Jisu bini sagrirokno hai hwnwi sa kha, “Hwm tho, chwng twibom ayang naro tháng anw.”

³⁶Hakhe bórok lukuno khibi tháng lai kha. Jisu achukmani rungo’-no sagrirokbo kasaui kha, hakhe bono bórok bai tlang kha. Tei rungrokbo aro tongo.

³⁷Nokbar kotor belai khe sipchaui phai kha, hakhe twi aphal rungo bu phaijagwi tongma bai rungo twi pungna naiwi tong kha.

³⁸Jisu kobongo bokhorok beraui rung uklogo thu-ui tongo. Sagrirok bono sochaui hai hwnwi sa kha, “Hodakra, chwng thwina naiwi tongmani nwng uana ya diba?”

³⁹Jisu bachaui nokbarno hai hwnwi damrok kha, “Siringcha wng di!” Hakhe bo twi aphalrokno hai hwnwi sa kha, “Thak si di!” Nokbar thak kha, hakhe kwchang kwchang wng kha.

⁴⁰Jisu aphuru sagrirokno hai hwnwi sa kha, “Norok tamo swk aswk kirijak? Tamo swk norok poito kwrwi wng bai?”

⁴¹Hakhe bórok kirima habwi hai hwnwi sa lai kha, “Hakhe o borok sabo? Nokbar bai twirok suda bini kók khnaui ma tongo!”