Read Kok Borok MARK 5 Bible Online

MARK 5 - Kok Borok bible

MARK 5

¹Bórok Galili twibom ayang naro Gerasenrokni amchoi-o phai lai kha.

²Jisu rungni ongkhorma logi’-no simalwngni ongkhorwi phainai borok khoroksa bini thani sók phai kha.

³O borok wng kha mwtai hamya kolobjak, hakhe bo simalwngo tongo. Khoroksa phano bono sorni dwkhwi khaui tei narwgwi man ya;

⁴bono yakung yak khaui máng se ma tono, phiya kha brúm brúm’-no bo sorni dwkhwi sachu-ui khibi-o, yakungni sorni hatrainobo swbai khibi-o, khoroksa phano bono kók khna rwui man ya.

⁵Hopung sapung bo chirikhók twtwi bini bwsakno holongsiki bai rokpra twtwi simalwngo tei hatháirogo himgurungo.

⁶Hakchalo tong twtwi’-no bo Jisuno nuhurwi khachigwi bini bwskango yakung yaphango burungsa khe klai rw phai kha.

⁷Hakhe bo sotonwi hai hwnwi chirikhók kha, “O Kaitor Kotorni Sajla Jisu! Nwng ang bai tamo nangjak? Kaitorni mungwi ang nono duai rw ja-o, ano ta sátok jaba di!”

⁸(“O mwtai hamya, nwng o borokni bisingni ongkhorwi phai di,” hwnwi Jisu sama bai se a borok o kókno sa-o.)

⁹Hakhe Jisu bono “Nini mung tamo?” hwnwi sẃng kha. A borok hai hwnwi sa kha, “Ani mung Kwbángma; chwng oro kwbángma se!”

¹⁰Hakhe bo a mwtai hamyarokno a amchoini ta rohor ja di hwnwi Jisuno belai khe koi kha.

¹¹Aro hadugo uak kwbángma ada chá laiwi tongmani.

¹²A mwtairok Jisuno hai hwnwi koi kha, “U uakrokni bisingo habwi manna tẃi khe chwngno bórokni thani rohor ja di.”

¹³Bo bórokno rohor kha, hakhe mwtai hamyarok a borokni sakni ongkhorwi a uakrokni bisingo habwi kha. Hakhe aswk uak bebak’-no harwbra tẃi ongkhor klaiwi twibomo kwlwgwi thwi bai kha. Aro bebagwi uak mak nwisai swk wng anw.

¹⁴Abono nugwi uak mwrwknairok khárwi tháng bai kha, hakhe a wngmano tauno tei kamirogo saui rw bai kha. Hakhe bororok tamo wng kha hwnwi naina tháng lai kha.

¹⁵Bórok Jisuni thani phaiwi a mwtai hamyarok bai kolobjakno nuk phai kha; bo rí-chum kanjak khe kwchang kwchang kheno aro achukjak, hakhe bórok bebak’-no kirijak bai kha.

¹⁶A mwtai hamyarok kolobjaknai borok bo tamo wng kha abono nuknairok bororokno saui bai kha, uakrokni kókbo saui bai kha.

¹⁷Aboni bagwi bórok Jisuno a amchoini tháng di hwn lai kha.

¹⁸Jisu rungo kasaui phuru a mwtai hamya kolobjaknai borok bono hai hwnwi koi kha, “Ano nini logi tẃi ja di.”

¹⁹Jisu bono tẃina nai li ya, tamo khe hai hwnwi sa kha, “Nogo tháng di, Subrai bwswk khairokjagwi nini bagwi aswk samung khlaimarokno nini nokni bororokno saui di.”

²⁰Aboni bagwi a borok taun khungchi-o thángwi Jisu bini bagwi tamo khlai kha abono saui bai kha; hakhe abono khnanairok jotono uanajak bai kha.

²¹Jisu twibom ayang naro kiphilwi phai kha. Aro twibom rukungo luku kwbángma bini thani kuthum phai kha.

²²Aphuru Jair hwnwi thumnokni hoda khoroksa phai kha, bo Jisuno nugwi bini yakungo klaiwi

²³hai hwnwi belai khe koiwi sa kha, “Ani chwrai bwrwima hamya klaiwi thwi tẃi thwi tẃi wngwi tong kha. Phai jaba di, bo hamna tẃi khe bini sago nwng yak bera phai ja di.”

²⁴Jisu hakhe bo bai tháng kha. Aswk borok kwbángma bo bai baksa tháng lai kha, hakhe kese-rebe khe bini sago klai twtwi wngwi tong lai kha.

²⁵Aro nokha bisi chiknwi rí súma thak ya wngwi sak tekto manẃi tongnai bwrwi khoroksa tongo.

²⁶Bo ochai-khama kwbángma bai naijagwi rang-rí tong-kwrwi báijak bai kha, hamna le thu-ui se tong di, teibo se dera si-o.

²⁷Bo Jisuni kókno khnaui bororokni bising tẃi bini uklogo phai kha, hakhe bo bini sakni ríno tang kha.

²⁸Bo hai hwnwi uansuk kha, “Bini sakni rí simi phano ma tang khe ang hamwi thángo.”

²⁹Aboni logi’-no thẃi thak kha, bini hamya hammani bo saui man kha.

³⁰Aboni logi’-no Jisu bini aroni phan ongkhorwi thángmani saui manẃi luku bwkhak uphilwi hai hwnwi sẃng kha, “Ani sakni rí sabo tang?”

³¹Bini sagrirok bono hai hwnwi sa kha, “Aswk bororok nono kese-rebe khe tongma nugwi suda se ‘Ano sabo tang?’ hwnwi nwng hwnwi tong kho.”

³²Abo sabo hai khe tang kha naina bagwi Jisu yang yang naisik kha

³³Tamo khe a bwrwima bini tamo wng kha abo saui manẃi kirima bai kwlwi twtwi bini bwskango phaiwi burung khe klaiwi rw phai kha, hakhe bebak kókno bono sa kha.

³⁴Jisu bono hai hwnwi sa kha, “Bwrwima, nini poito nono ham rw kha. Kwchang kwchang khe tháng di, kaham kwrwng khe tongwi di.”

³⁵Jisu kók saui tong phuru thumnokni hoda Jairni nokni borok khoroknwi khoroktham phaiwi hai hwnwi sa phai kha, “Nwsajwk thwi kha, hodakrano tei tamni leng rwna nai tong si?”

³⁶Bórok samano khunju rw yaui Jisu bono hai hwnwi sa kha, “Ta kiri di, poito simi khlai di.”

³⁷Hakhe bo Pitor bai Jakobno tei Jakobni takhuk Johonno karwi tei khoroksano phano bini logi tháng rw li ya.

³⁸Bórok thumnokni hodani nogo sók phai phuru khe Jisu aro bororokno kutuk laijak, sotonwi kap lai-kok lai wng laijak nugwi kha.

³⁹Bo noksingo habwi hai hwnwi sa kha, “Norok tamo wngwi kutuk lai? Tamo wngwi kap lai? O chwrai thwi ya; thu-ui se tongo!”

⁴⁰Hakhe bórok bono mwnwi lai tong kha. Tamo khe bo bórok bebak’-no phataro rohorwi chwraini buma bupha bai bini sagri khorokthamno tlangwi a chwrai tong thani-o habwi tháng kha.

⁴¹Bo chwraini yak romwi bono hai hwnwi sa kha, “Talitha kum.” (Abo “O bwrwima, ang sa-o bacha di,” hwnwi hwnma se.)

⁴²Hakhe a bwrwima doropsa bachaui him kha. (Bo nokha bisi chiknwini borok). Aboni bagwino bórok belai uanajak bai kha.

⁴³“Kebono ta sa di,” hwnwi bórokno ragdama khlaiwi Jisu hai hwnwi sa kha, “Bono mungsa swk chána rw gra di.”