Read Kok Borok MARK 6 Bible Online

MARK 6 - Kok Borok bible

MARK 6

¹Ulo Jisu aroni thángwi bini ha-o phai kha, bini sagrirok bo bai baksa tháng lai kha.

²Sabat salo bo thumnogo phrwngwi kha. Aswk bororok bini a phrwngmano khnaui uanajak bai kha, hakhe hai hwnwi sa lai kha, “O borok omorokno biyangni man? Bo aswk elem kwrwng wngma ba abo tamo? Bini yak tẃi ha-o nuk ya samungrok omorok ba tamo?

³O borok a mistri ya diba? Bo Mariamni a bwsla, Jakob, Josi, Juda tei Simonni takhuk ya diba? Bini bahanokjwksong chwng bai baksa oro tong ya diba?” Hakhe bórok bono gwnda khlai li ya.

⁴Jisu bórokno hai hwnwi sa kha, “Diyari joto jaga-o bórijago, bini ha bai, sandai-masak bai tei nokni bororok bai simi se bórijak ya.”

⁵Hakhe bo khoroknwi khoroktham hamyarokni saka yak beraui ham rwma karwi aro tei mungsa phano ha-o nuk ya samung khlaiwi man li ya.

⁶Bórok poito khlai ya wngmano nugwi bo uanajak kha. Hakhe Jisu kami brúm brúm thángwi bororokno phrwng kha.

⁷Aphuru bo a sagri chiknwirokno ringwi khoroknwi khoroknwi khe rohor bai kha. Bo bórokno mwtai hamyarokno rwkhlainani phan rwui

⁸hai hwnwi sa kha, “Lama him thani raidang kongsa karwi tei mungsa phano ta twi di, ruti buya, bogol buya, sola-o rang buya.

⁹Yakungo yaklap ká di, tamo khe kamchlwi kangsani bára ta chum di.”

¹⁰Bo bórokno hai hwnwibo sa kha, “Kwrẃngsa-o sógwi aroni kutul ya sak norok kasa rwjakmani a nogo’-no tong di.

¹¹Kwrẃngsa swkni bororok norokno yachak sok ya khe, eba norokni kókno khna ya khe aroni kutulwi yakung hadlwi bupraui kabu di. Omo bórokno hus khe kabuma se. Ang norokno sóino sa-o, buj thummani salo Sodom bai Gomora se a kamiyungrokni slái teisa hama lok rwi naijak anw.

¹²“Hakhe bórok tháng kha, thángwi bororok sumsok yakar thung hwnwi pírwi kha.

¹³Bórok mwtai hamya kwbángma rwkhlai kha, phiya hamya kwbángmano thok phulwi ham rw kha.

¹⁴Habugra Herod abono khna kha, tamni hwn khe Jisuni mung pírjak rwrwgo. Baksa hai hwnwi sa lai-o, “Baptisma rwnai Johon thangcha phiro. Aboni bagwino bini bisingo omo tẃi samung khlainani phan tongo.”

¹⁵Baksa ba “Bo Elia se.” hwnwi sa lai-o. Baksa ba “Agini diyarirok hai bo’-bo haino diyari,” hwnwi sa lai-o.

¹⁶Herod abono khna kheno hai hwnwi sa kha, “Omo baptisma rwnai Johon. Ang ba bini bokhorok tan rw kha bla. Bo thangcha phi kha!”

¹⁷Herod sak baithang Johonno rom rwui alongo chop kha. Bini takhuk Philipni bihik Herodiani bagwi se Herod omo khlai-o, bini takhukni bihik phano Herod bono hik snam kha.

¹⁸Tamo wngwi hwn khe baptisma rwnai Johon Herodno hai hwnwi sama tongo, “Nini takhukni hikno namani abo nini cha ya.”

¹⁹Hakhe Herodia Johonno naislerjagwi bono butharna naiwi tongo, tamo khe bo abono man ya wngwi tongo,

²⁰tamni hwn khe Herod Johonno borok kaham tei borok kwthar hwnwi saui manẃi bono kirijago, hakhe bono mungsabo hamya khlai ya wngwi tongo. Bo kók samano khna brúm brúm bo belai uanama klai jago, hai phano bini kókno bo khápang srangjagwi khna-o.

²¹Salsa Herodni achaima sal pálai phuru naikolphangni tangphang kotorrokno, sengkrak okrarokno tei Galilini kolok-kotorrokno tẃiwi Herod panda chá lai phuru Herodia bwlam manjak kha.

²²Herodiani bwsajwk phaiwi mwsa kha, hakhe Herod bai bini panda phainairok bono hamjak kha. Aboni bagwino bugra a bwrwimano hai hwnwi sa kha, “Nwng tamo nai ano san di, ang abono rw anw.”

²³Bo bono hai hwnwi swmai tangwi sa kha, “Nwng jesa manwi san phano ang nono rw anw, abo ani ha khaksa phano wng thung.”

²⁴Aphuru a bwrwima phataro thángwi bumano “Ang tamo sannai?” hwnwi sẃngwi kha. Hakhe buma “Baptisma rwnai Johonni bokhorok san di,” hwnwi sa kha.

²⁵A bwrwima a logi’-no bugrani thani dodro dodro kiphilwi phai kha, hakhe hai hwnwi san kha, “Ang nai-o, tabuk’-no nwng ano baptisma rwnai Johonni bokhorok mairango khe rw phai di!”

²⁶Hakhe bugra belai khe bwkha hamya wngjak kha; tamo khe panda phainairokni bwskango swmai tangjak tongma bai Herod a bwrwimano in’-hi hwnwi rohorna nai li ya.

²⁷Hakhe logi logi’-no bugra sebuk khoroksano Johonni bokhorok tubu di hwnwi dagi rohor kha. A sebuk alongo thángwi bini bokhorok tanwi kha,

²⁸hakhe abono mairango khe a bwrwimano rw phai kha, a bwrwima khe abono bumano rwui kha.

²⁹Ulo Johonni sagrirok o kókno khna kha, hakhe bórok phaiwi bini mangno tlangwi phobwi rwi lai kha.

³⁰Chonghorrok Jisuni thani kiphilwi bórok khlaimarok bai phrwngmarokno bebak sa phai kha.

³¹Aphuru aro borok kwbángma tháng lai-o phai lai-o wngwi tongma bai Jisu bai bini sagrirok chána suda jora manjak li ya. Aboni bagwino Jisu bórokno hai hwnwi sa kha, “Hwm tho, chwng simi siring siring kwrẃngsa-o tháng anw, hakhe norokbo kisa lenglaui man anw.”

³²Hakhe bórok simi siring siring kwrẃngsa-o rung bai khe lam rw kha.

³³Hai phano luku kwbángma bórok thángmano nuk rwgwi bórokno sini rwk kha, hakhe taun brúm brúmni bororok ha tẃi khachik lai thángwi Jisu bai bini sagrirokni slái swkang aro sógwi tong lai kha.

³⁴Rungni ongkhor kheno Jisu aswk borok kwbángmano nugwi jai kheno kháirokjak kha, tamni hwn khe bórok mwrwknai kwrwi merarok hai. Hakhe bo bórokno kwbángma phrwng kha.

³⁵Ulo sal tháng twtwi wng kheno sagrirok bini thani phaiwi hai hwnwi sa kha, “Belai lerwi tháng kha, oro mungsa phano manthok ya.

³⁶Gana-gini kamirogo thángwi chámung paiwi manna tẃi khe o bororokno rohor si di.”

³⁷Tamo khe Jisu bórokno hai hwnwi sa kha, “Norok’-no chá rw di.” Hakhe bórok bono hai hwnwi sa kha, “Chwng thángwi rang nwirani ruti paiwi bórokno chá rwnai, hai da hwn?”

³⁸Hakhe Jisu bórokno hai hwnwi sa kha, “Norokni thani lep bwswk ruti tong? Thángwi naiwi di.” Bórok naiwi hai hwnwi sa phai kha, “Ruti lepba tei á maknwi tongo.”

³⁹Hakhe Jisu bebakno jabra saka buthup buthup khe achuk rw di hwnwi sagrirokno dagi kha.

⁴⁰Aboni bagwino bororok sara khe tei bachi khe bwtang bwtang khe achuk lai kha.

⁴¹Jisu a ruti lepba bai á maknwino naui nokhasa naisaui. Kaitorno hambai rw kha, hakhe a rutino swkagwi bororokno rwui di hwnwi sagrirokno rw kha. Hakhe bo bórok bebakno a á maknwinobo banta khe rw kha.

⁴²Jotono ok pungwi chá kha.

⁴³A ruti bai á bára tong rwkmano sagrirok khochamani ura khung chiknwi pung kha.

⁴⁴A ruti chánairok chwlarok khorokbasai wng anw.

⁴⁵Hakhe Jisu logi logi’-no bini sagrirokno rungo kasa rwui twibom ayang naro bini slái swkang Betsaida-o rohor kha, yang khe bo a lukurokno rohor kha.

⁴⁶Bo sagrirok bai kak laiwi suri sanna bagwi hathái-o tháng kha.

⁴⁷Sanja jora a rung wng kha twibom kwcharo, Jisu aphuru khe hakungo saichung.

⁴⁸Bo nuhur kha nokbar pail cha ya khe sipchaui tongma bagwi sagrirok rung chokthokjak ya wngwi tong kha; hakhe phungni kaitham bai kaidok kwcharo bo twi saka tẃi himwi bórokni thani phaimani. Bo bórokno láiwi thángna naimani.

⁴⁹Phiya bórok bono twi saka tẃi himwi tongma nuhurwi, “Omo ba burasa se bla!” hwnwi khá kaui chirikhók lai kha.

⁵⁰Tamni hwn khe bórok bebak’-no bono nugwi belai khe kirijak bai kha. Hakhe Jisu logi logi’-no bórok bai kók sa laiwi hai hwnwi sa kha, “Ta kiri di! Omo ang se, khá tor di!”

⁵¹Bo bórokni rungo kasaui kha, hakhe nokbar thak kha. Sagrirok belai uanajak bai kha.

⁵²Bórok a rutini kók romwi man li ya. Bórokni bwkha kha si ya.

⁵³Bórok twibom láiwi Genesaret ha-o phai sók phai kha, aro bórok rung kha lai kha.

⁵⁴Bórok rungni ongkhor kheno bororok Jisuno sini kha.

⁵⁵Hakhe bórok a amchoi gwnangwi khachigwi hamyarokno uaing bai khe Jisu tongo hwnwi khna thani-o tubu kha.

⁵⁶Hakhe Jisu thángmani kami brúm brúm’-no, taun brúm brúm’-no, khampar brúm brúm’-no bororok hamyarokno bajar kwcharo tubu lai kha, hakhe bini dulai buchuk phano hamyarokno tang rw jaba di hwnwi bono koi lai kha; phiya a tangnairok bebak’-no ham rwjak bai kha.