Read Kok Borok MARK 9 Bible Online

MARK 9 - Kok Borok bible

MARK 9

¹Hakhe bo teibo hai hwnwi sa kha, “O kókno muitu narwk di, oro baksa tongo Kaitorni ha kwplai khe phaimano nuk ya sak thwi glak.”

²Nokha saldokni ulo Pitor, Jakob tei Johonno simi tlangwi Jisu hathái kuchugo tháng kha. Bórok naisigwi tong twtwi’-no bo mul philwi tháng kha;

³hakhe bini rírok chẃngsaui phurchaui phai kha, aswk khe phur kha o swngcharo abo ahai khe kebo rí sú-ui mannai kwrwi.

⁴Aphuru a sagri khorokthamrok Elia bai Musino Jisu bai kók sa lai tongma nuk kha.

⁵Pitor Jisuno hai hwnwi sacha kha, “Hoda chwng oro tongmani abo kaham’-no. Chwng oro basai khungtham tang anw, nini khungsa Musini khungsa, tei khungsa Eliani.”

⁶Pitor bai teirok aswk kirima hapjak kha tamo sana nangno bo abo saui man li ya.

⁷Aphuru chumui dolasa bórokno kobol phai kha, hakhe a chumui bisingni o kók sajak kha, “Bo ani khájani Sajla; bini kók khna di!”

⁸Sagrirok yang yang naharwi achomsa kebono nuk li ya, Jisu simi se bórok bai bachajak.

⁹Bórok hatháini ongkhorwi phai phuru Jisu bórokno hai hwnwi ragdama khlai kha, “Borokni Sajla kwthwini thangwi bacha ya sak norok o nukmano kebono ta sa di.”

¹⁰Bórok bini ragdama khlaimano khna kha, tamo khe “O kwthwini thangwi bachana hwnmani abo tamni kók?” hwnwi bórok kiching bórok sa lai tong lai kha.

¹¹Hakhe bórok Jisuno hai hwnwi sẃng lai kha, “Elia se swkang ma phai granai hwnwi tamo wngwi Kerong phrwngnairok saui tong sla?”

¹²Bo hai hwnwi sa kha, “I’n, joto thiti khlaina bagwi Elia swkang phai granai. Hakhe Borokni Sajla panjalwino sátokjagwi norjaknai hwnwi Elembago tamo wngwi sajak sla?

¹³Hai phano ang norokno o kók sa-o, Elia phaiwi tháng kha, hakhe bini bagwi Elembago sama hai’-no bororok bórokni muchung tẃi bono khlai kha.”

¹⁴Bórok tei sagrirokni aro kiphilwi phaiwi luku kwbángma nuk phai kha. Kerong phrwngnai khoroknwi khoroktham sagrirok bai tokra rw lai tong lai kha.

¹⁵Bororok Jisuno nukma logi’-no belai uanajak bai kha, hakhe bini thani khachik laiwi bono khulum lai kha.

¹⁶Jisu bini sagrirokno hai hwnwi sẃng kha, “Norok bórok bai tamni tokra rw lai?”

¹⁷Luku bisingni borok khoroksa hai hwnwi sa kha, “Hodakra, angslano ang nini thani tubu kha; mwtai hamya bono kolobwi tongo, hakhe bo kók saui man ya.

¹⁸A mwtai hamya bono kolob brúm brúm ha-o songraui rw-o, hakhe bo khuktwi phena tikhlai-o, bua hulo, phiya bini bwsak raksaui phai-o. Ang nini sagrirokno a mwtai hamyano rwkhlai di hwnmani bórok man li ya.”

¹⁹Jisu bórokno hai hwnwi sa kha, “Norok bwswk se poito kwrwi gwja! Norok bai ang tei sal bwswk ma tongna nangno? Tei sal bwswk norokno khá ma lokna nangno? Tubu di a chwraino.”

²⁰Hakhe bórok Jisuni thani bono tubu kha. A mwtai hamya Jisuno nukma logi’-no a chwraino leng rw kha, hakhe bo ha-o klaiwi khuktwi phena tikhlai twtwi pra-pra wngwi tong kha.

²¹“Bo ahai wngmani bwswk balok kha?” hwnwi Jisu buphano sẃng kha. “Chwrai phangsni simi’-no.” hwnwi bo sa kha.

²²“A mwtai hamya hór bai twi-o khiklaiwi bono kwbángma’-no butharna nai kha. Nwng man khe ba chwngno khairogwi chuba ja di!”

²³“I’n, nwng man khe ba!” hwnwi Jisu bono sa kha. “Poito gwnangni thani jotono wngwi mano.”

²⁴Bupha logi logi’-no chirikhógwi muktwi khiklai kabwi hai hwnwi sa kha, “Subrai, ang poito khlai ma le khlai-o, tamo khe rak tha ya ba; abono rak rw di!”

²⁵Jisu nai ba bororok jabirwi phai rwrwgo, hakhe bo a mwtai hamyano hai hwnwi damrok kha, “O nathong bai bobani mwtai hamya, ang nono dagi-o, o chwraini bisingni ongkhorwi phai di. Bini bisingo nwng tei ta hap si di!”

²⁶A mwtai hamya chirikhógwi a chwraino belai khe leng rwui ongkhorwi phai kha. A chwrai kwthwi hai wng súk kha, hakhe bororok “Bo thwi se thwi kha!” hwnwi sa lai kha.

²⁷Tamo khe Jisu a chwraini yak romwi bacha rw kha, hakhe bo bacha kha.

²⁸Jisu nok bisingo habwi tháng kheno bini sagrirok tepsa khe bono hai hwnwi sẃng kha, “Chwng tamo wngwi abono rwkhlai man li ya sla?”

²⁹“Suri san khe simi se omo hai’-no rwkhlai mano, tei mungsabo man ya,” hwnwi Jisu sa kha.

³⁰Bórok aroni kutulwi Galili bising tẃi tháng kha. Bo buro tong abo Jisu kebono saui man rw ya khe tonna nai-o,

³¹tamni hwn khe bo aphuru sagrirokno hai hwnwi phrwngwi tongo, “Borokni Sajla bororokni yago yapharwi rohorjaknai, hakhe bórok bono butharnai, ahai phano salthamni ulo bo thangwi bachanai.”

³²Bórok o kókno romwi man li ya, bono swbo sẃng rak li ya.

³³Bórok Kapharnaumo phai kha, hakhe noksingo hap kheno Jisu sagrirokno hai hwnwi sẃng kha, “Lama-o norok tamni tokra rw lai?”

³⁴Lama-o bórok sabo tor kuk hwnwi tokra rw lai phaima bai tháisa phano pungwi man li ya.

³⁵Hakhe Jisu achugwi sagri chiknwirokno ringwi hai hwnwi sa kha, “Swkang wngna muchungnai borok bo jotoni ulobo ma tong rwknai, jotoni selengbo ma wngnai.”

³⁶Bo chwrai khoroksano naharwi bórokni kwcharo bacha rw kha. Hakhe a chwraino kwbagwi bo bórokno hai hwnwi sa kha,

³⁷“Omo hai chwraino yachaknai borok bo ano’-no yachago; phiya ano yachaknai borok bo ano simi ya, ano rohornainobo yachago.”

³⁸Johon bono hai hwnwi sa kha, “Hodakra, nini mungwi khoroksano mwtai hamyarok rwkhlaimani chwng nuk kha. Chini borok ya hwnwi chwng bono ahai ta khlai di hwn kha.”

³⁹Jisu hai hwnwi sa kha, “Hai ta hwn di, tamni hwn khe ani mungwi ha-o nuk ya samung tangnai bo doro-khoro ano hamya saui man glak.

⁴⁰Chwngno kebeng ya borok bo chini bwkhak se.

⁴¹O kókno muitu narwk di, Khristoni borok hwnwi norokno twi khopsa phano khan rwnai borok bo bini sokat ma se mannai.”

⁴²“Tumungno khoroksa swk ano poito khlai tongnai o chwrai basrarokni bere khorok swkno sumsogo khiklai khe a borokno totra-o holongdap kotorma khaui twijlango khiklai rwma se ham kugo.

⁴³Hakhe nini yak nono sumsogo khiklai khe abono tansu-ui khibi di. Yak kongnwi gwnang khe morke-o thwi phlai ya hóro hapmani slái nwng yak kongsa kwrwi khe mwthangjakma se ham kugo.

⁴⁴[Aro ‘bórokni bwsago yóng klai phlai máng tongnai, phiya hórbo thwi phlai ya máng tongnai.’]

⁴⁵Phiya nini yakung nono sumsogo khiklai khe abono tansu-ui khibi di. Yakung kongnwi gwnang khe morke-o khiklaijakmani slái nwng yakung kongsa kwrwi khe mwthangjakma se ham kugo.

⁴⁶[Aro ‘bórokni bwsago yóng klai phlai máng tongnai, Phiya hórbo thwi phlai ya máng tongnai.’]

⁴⁷Phiya nini mokol nono sumsogo khiklai khe abono ekhregwi khibi di. Mokol kolnwi gwnang khe morke-o khiklaijakmani slái nwng mokol kolsa kwrwi khe Kaitorni ha-o hapmani se ham kugo.

⁴⁸Aro ‘bórokni bwsago yóng klai phlaiwi máng tongnai, phiya hórbo thwi phlai ya máng tongnai.’

⁴⁹“Hór bai jotono mui-o sóm rwjak hai khlaijaknai

⁵⁰“Sóm manwi kaham’-no, tamo khe pab ya wngwi tháng khe norok abono bahai khe hai’-no hai pab rw phinai? “Norok sóm nangjak wng di, norok kwchang kwchang khe tong lai di.”