Read Kok Borok LUK 10 Bible Online

LUK 10 - Kok Borok bible

LUK 10

¹Aboni ulo Subrai teibo sagri khorok snichinwirokno chong kha. Bo thángna hwnwi tongma kamirogo taunrogo bórokno khoroknwi khoroknwi khe rohor gra kha.

²Bo bórokno hai hwnwi sa kha, “Mai kwbángma munui tong kha, yang le ranai se báng ya. Aboni bagwino bini mai rana bagwi teibo borok rohor di hwnwi nokphangsano san di.

³Tháng di, geguma kwcharo mera bwsano rohorma hai khe ang norokno rohor kha.

⁴Rang buya, bogol buya, yaklap buya mungsa phano ta tẃi di. Khoroksano phano khulumna bagwi lama-o ta bathak di.

⁵Nogo hap kheno ‘O nokni kaham wng thung,’ hwnwi sa gra di.

⁶Aro bwkha kaham borok tong khe norok kaham wng thung hwnmani a kók bini thani nang thung; kwrwi khe ba norokni a kók ta nang thung.

⁷A nogono tongwi bórok chána-nungna rwmano cháui tong di, tamni hwn khe samung tangnaisa bini samungni rang manthai klai-o. Nok khungsa khibiui tei khungsa-o ta tháng di.

⁸Norok habwimani taunni bororok norokno yachak sok khe bórok chána rwmano’-no chá di.

⁹A taunni hamyarokno ham rwui aroni bororokno hai hwnwi sa di, ‘Kaitorni ha norokni gana sók phai kha.’

¹⁰Phiya norok habwimani taunni bororok norokno yachak sok ya khe lama-o ongkhorwi thángwi hai hwnwi sa di,

¹¹‘Norok hus wng thung hwnwi chini yakungo norokni taunni hadlwi nangmano suda chwng hu-ui klango. Hai phano o kókno si di, Kaitorni ha norokni gana sók phai kha!’

¹²Ang norokno o kók sa-o, Jerani Salo a taunni slái phano Sodomno Kaitor maya chá kuk anw.”

¹³“O Khorasin, nwng bwswk se hamya sitrano! O Betsaida, nwngbo bwswk se hamya sitra no! Norokni bisingo ha-o nuk ya samung khlaijakma hai Tur bai Sidono khlaijakma te aroni bororok sumsok yakar kha hwnwi phunukna bagwi bumasíngo’-no pudri kanwi sago thapla phulwi achugwi tong kha mun.

¹⁴Jerani salo norokni slái phano Tur bai Sidono Kaitor maya chá kuk anw.

¹⁵Nwng la Kapharnaum! Nwng da chuknoha swk chukna naimani! Nwng morke-o khiklaijak anw!”

¹⁶Jisu bini sagrirokno hai hwnwi sa kha, “Norokni kók khunju kannai borok bo ani kókno khunju kano; norokno yachak ya borok bo ano yachak ya; ano yachak ya borok bo ano rohornaino yachak ya.”

¹⁷Sagri khoroksnichinwirok tongthokma bára khe kiphilwi hai hwnwi sa phai kha, “Subrai, chwng nini mungwi dagi khe mwtai hamyarok suda chini kók ma khna-o.”

¹⁸Jisu hai hwnwi sa kha, “Ang Soitanno nokha philikma hai khe nokha sakani klaima nuk kha.

¹⁹Khna di, ang norokno chibuk sindrai saka tẃi kachrebwi thángwi mannani phan rw kha, Soitanno mechen suknani phanbo rw kha; mungsa phano norokno hamya khlai man glak.

²⁰Hai phano mwtai hamyarok norokni kók ma khna kha hwnwi ta tongthok di; tamo khe chuknoha-o norokni mung swijak kha hwnwi se tongthok di.”

²¹Jisu aphuru’-no Phola Kwthar bai khápang srang rwjagwi hai hwnwi sa kha, “O chuknoha bai swngcharni bugra Apha. Ang nono hambai rw-o, tamni hwn khe nwng elem gwnang bai sinairokno khogwi tongmano siyarokno si rw kha. Au, Apha, nwng omono’-no kaham hwnwi khá chongmani.

²²“Apha ani yago bebak’-no rw bai kha. Aphano karwi Sajlano sininai kwrwi, phiya sajla bai Sajla sini rwna muchungma borokno karwi Aphano sininai kwrwi.”

²³Sagrirokni phaising uphilwi Jisu bórokno simi hai hwnwi sa kha, “Omorokno nukma bai norok hamchajak!

²⁴Ang norokno o kók sa-o, norok nukmano aswk diyarirok bai aswk bugrarok naina muchungwi suda nuk ya, norok khnamano khnana muchungwi suda khna ya.”

²⁵Kerong phrwngnai khoroksa Jisuno potaliui naina bagwi phaiwi hai hwnwi sẃng kha, “Hodakra, kwthang tong phlaina hwn khe ang tamo ma khlaithai klai?”

²⁶“Kerongo tamo swijak tong? Nwng tamo saui man kha?” hwnwi Jisu bono sẃng kha.

²⁷Hakhe bo hai hwnwi sa kha, “ ‘Nini Kaitor Subraino nini khá bai khúk bai yak bai uansukma bai hamjak súk di,’ phiya, ‘Nwng sakno hamjak tẃino buinobo hamjak di.’ ”

²⁸Jisu hai hwnwi sa kha, “Sói kókno sa kha; omo hai’-no khlai di, hakhe thang anw.”

²⁹Tamo khe Kerong phrwngnai sak rwngjakmano bólaiwi Jisuno hai hwnwi sẃng kha, “Ang sabono hamjak thai?”

³⁰Jisu hai hwnwi sa kha, “Borok khoroksa Jerusalemni Jeriko tokhlai thángmani. Lama-o bo dagaitrokni yago klai kha. Bórok bini bebak’-no segwi bu-ui thwi twtwi khe khibiui klangwi tháng kha.

³¹Ochai khoroksabo aphuru achomsa a lama tẃi tháng phaima jora. Bo a borokno nugwi phérwi tháng kha.

³²Abo hai kheno Lebi khoroksa aro sók phai kha, bo’-bo a borokno naisigwi phérwi tháng khua.

³³Phiya, Samariasa khoroksa a lama tẃi tháng phuru a borokni thani sók phai kha. Bono nugwi bo khairokjak kha.

³⁴Bo gana thángwi a borokni kwsarogo thok bai angurni arak phulwi khaui rw kha; hakhe bini korai saka kasa rwui nograi nogo tubu-ui bono kaham khe nai kha nuk kha.

³⁵Teini salo bo nograi nokni bubagrano rukphaini rang khoknwi tikhlai rwui hai hwnwi sa kha, ‘O borokno kaham khe nai sok di. Omoni slái teibo rang bai khe ang kiphil phuru abono su phai anw.’

³⁶“Tabuk, o khorokthamni bere sabo dagaitrokni yago klainai borokno hamjakma klai kha? Nwng tamo hwn?”

³⁷Kerong phrwngnai hai hwnwi sa kha, “Bono khairokjaknai a borok bono hamjakma klai-o.” “Tháng di, nwngbo abo hai’-no khlai di,” hwnwi Jisu bono sa kha.

³⁸Jisu bini sagrirok bai tháng te tháng te kami khungsa-o sók phai kha. Aro Martha hwnwi bwrwi khoroksa bono nogo kasa rw kha.

³⁹Mariam hwnwi bini bahanokjwk khoroksa tongo. Mariam Jisuni yakung yaphango achugwi bo kók samano khnaui tongo.

⁴⁰Yang Martha khe chá rwna-khan rwna samung tẃi pái laijak ya. Bo aboni bagwino Jisuni thani hai hwnwi sa phai kha, “Subrai, aswk samungno kwkwi ani sago máng phinwi ton kha. Nwng omono nuk ya da? Ano chuba di hwnwi bono sa di!”

⁴¹Subrai hai hwnwi bono sa kha, “Martha, khna di. Nwng samungo máng khorok mihimwi tekto manjagwi tongo;

⁴²nangmani manẃi le mungsa se. Mariam samung kaham’-no saiwi na kha, abono bini yakni tlangwi man glak.”