Read Kok Borok LUK 11 Bible Online

LUK 11 - Kok Borok bible

LUK 11

¹Jisu salsa kwrẃngsa-o suri sanwi tongmani. Bo suri san bai khe bini sagri khoroksa hai hwnwi sa kha, “Subrai, Johon bini sagrirokno phrwngma hai nwng’-bo chwngno suri sanna phrwng di.”

²Jisu bórokno hai hwnwi sa kha, “Norok ahai khe suri san di: “ ‘Apha: Nini mung kwthar surijak thung; nini ha phai thung.

³Chini nangmani chámung sal brúm brúm rw di

⁴chini sumsokno nakar di, tamni hwn khe chwngno hamya khlainai jotono’-no chwng nakaro, chwngno belai khe ta amjok di.’ ”

⁵Jisu bini sagrirokno hai hwnwi sa kha, “Rom di, hor diboro nini kiching khoroksano nwng hai hwnwi sa kha, ‘O kiching, mairung malaktham rohor gra di.

⁶Kwrẃngsa-o thángna hwnwi phaiwi thani tabuk’-no kiching khoroksa ani nogo sók phaiwi rw phai kha, yang le chá rwnani mungsa phano kwrwi.’

⁷Phiya nini a kiching nok bisingo tongwi hai hwnwi sa hór kha. ‘Ano tekto ta rw di! Dugar berebwi khibi kha, chwrai-khonairok ang bai thu-ui tongo. Ang bachaui mungsa phano rohorwi man glak.’

⁸Hai khe ang norokno o kók sa-o, bo kiching wngma bai bachaui rw ya phano nwng lachi ya khe san máng tongma bai bo nini nangma jora tẃi bachaui rohornai.

⁹“Aboni bagwino norokno ang o kók sa-o: San di, hakhe norok mannai; naituk di, hakhe norok nuknai, dugar bu di, hakhe norok phiyogwi rwjaknai.

¹⁰Tamni hwn khe sannai borok bo mano, naituknai borok bo nugo, dugar bunai borok bo phiyogwi rwjago.

¹¹Bwsla á san khe chibuk rwnai abo tẃi bupha norokni bisingo sabo tong?

¹²Eba khe toktẃi san khe sindrai rwnai sabo tong?

¹³Norok aswk hamya twtwi bwsano manwi kaham rwna siui tongo, hai khe chuknohani Phani thani sannairokno bo Phola Kwthar rwnai o kók bwswk se kubui!”

¹⁴Khoroksano boba khlai tonnai mwtai hamyano Jisu rwkhlaiwi rohor kha. Mwtai hamya ongkhorwi tháng khe a borok kók sacha kha, hakhe lukurok uanajak bai kha.

¹⁵Bórokni bisingo baksa hai hwnwi sa kha, “Mwtai hamyarokni bokhorok Belsebulni phan bai se bo mwtai hamya rwkhlai-o.”

¹⁶Bo Kaitor bai chongjak da hwnwi baksa potaliui naina bagwi “Mungsa swk soidom phunuk di,” hwnwi bono hwn lai kha.

¹⁷Bórok uansukma kókno Jisu saui manẃi ahai sa kha, “Hani bororok uálai kak lai khe a ha tong ya. Nokni bororok uálai kak lai khe a núkhung baiwi thángo.

¹⁸Abo hai’-no Soitanni ha-o bórok kiching bórok uálaiwi kak lai khe bini ha bahai khe tongnai? Belsebul rwmani phan bai se ang mwtai hamya rwkhlai-o hwnwi norok sa-o.

¹⁹Belsebulni phai bai se ang mwtai hamya rwkhlai khe norokni bororok saboni phan bai rwkhlai sla? Norokni bororokni o kókno cha ya hwnwi phunugo!

²⁰Ahai ya, ang Kaitorni phan bai se mwtai hamya rwkhlai-o abo’-no Kaitorni ha norokni thani sók phai kha hwnwi sijak rw-o.

²¹“Phan gwnang borok da-sengrok tẃi bini nok mwrwk khe nokni manwirok tong rwgo.

²²Phiya, bini slái phan gwnang bono kosonwi mechen phai khe bo khá ragwi tongmani a da-sengrokno segwi tubu-ui manwirok banta khe rw-o.

²³“Ani bwkhak tong ya borok bo ani kena ari; ang bai thumchru ya khe a borok piring-poroi se khlai-o.”

²⁴“Borok khoroksa swkni sakni mwtai hamya ongkhor khe bo ha kwrano himgurungwi bathakthai naituk gra-o. Ulo kwrẃngsa-o phano nuk ya khe ‘Ang ongkhorwi phaima a nogo’-no tháng phir anw,’ hwnwi bo sa-o.

²⁵Hakhe bo kiphilwi thángwi a nokno pharjak sipjak tei bebak thiti nugwi-o.

²⁶Abono nugwi thángwi bo bini slái chengta mwtai hamya tei mak snino ringwi tubu-ui aro’-no aro tong phai-o. Hakhe a borok swkangni slái teibo digi-sigi wngo.”

²⁷Jisu o kók saui tong phuru luku bisingni bwrwi masa bono hai hwnwi sacha kha, “Nono ogo tẃinai a bwrwi hamchajak! Nwng chámani a abuk hamchajak!”

²⁸Tamo khe Jisu hai hwnwi sa kha, “Aboni slái Kaitorni kók khnaui abo hai khe tongnairok se hamchajak!”

²⁹Borok kuthum rwrwk Jisu hai hwnwi sa rwrwk, “Tabukni bororok bwswk chengta gwja! Bórok soidomni samung phunuk di hwno. I’nhi, Jonani a soidomno karwi tei mungsa soidom phano phunukjak glak.

³⁰Jona Ninobisongni thani phunukjakma hai Borokni Sajlabo tabukni bororokni thani abo hai’-no phunukjak anw.

³¹Jerani salo ha salgrabaini isiri bachaui tabukni bororokno majra ber anw, tamni hwn khe Solomonni kók elemi khnana hwnwi bo haktor buchukni phai kha; ang norokno o kók sa-o, aile Solomonni slái phano oro teibo manwi kotor tongo.

³²Jerani salo Ninobisong bachaui tabukni bororokno majra ber anw, tamni hwn khe Jona pírma bai bórok sumsok yakar kha; ang norokno o kók sa-o, aile Jonani slái phano oro teibo manwi kotor tongo.”

³³“Chati phnangwi kebo hakhoro huiwi ton ya, eba khe twk bai kholobwi ton ya, tamo khe nok bisingo hapnairok pohor nukna tẃi khe thopna-o tono.

³⁴Nini mokol’-no nini bwsakni chati. Nini naisikma kepleng khe bwsak gwnangwi chẃngnai; phiya nini naisikma bejua khe bwsak gwnangwi mwnaknai.

³⁵Aboni bagwino nini bisingni chati da thwi langno abo hus khe tong di.

³⁶Kwrẃngsa phano mwnakma kwrwi wngwi nini bwsak gwnangwi chati chẃng khe nini thani chati chẃngma hai nini bwsak gwnangwi chẃngsaui phai anw.”

³⁷Jisu o kók sa bai khe Pharisai khoroksa bono mai khopsa chá rwna hwnwi kobok phai kha, hakhe bo nok bisingo habwi chána achuk kha.

³⁸Cháma swkang Jisuno yak súma nuk ya wngwi a Pharisai uanajak kha.

³⁹Aboni bagwino Subrai bono hai hwnwi sa kha, “Norok Pharisairok! Norok mairang lotano saka saka simi hu-o, aile bwkha bising bising norok buini manwi sekna máng se uansugui tongo, buini hamya khlaina máng se uansugui tongo,

⁴⁰Bepotarrok! Sakano snamnaisa Kaitor bo bisingninobo snamnai ya diba?

⁴¹Tamo khe mairang lota-o tongmano kwrwirokno rw di, hakhe se norokni bebak’-no sap-sutra wngnai.

⁴²“Pharisairok, norok bwswk se hamya sitra no! Norok banta, wsundwi tei bebak daloni kaichi-o kaisa Kaitorno rwui tongo, yang khe buino sói khe nainani, Kaitorno hamjaknani abono khe norok samung nangjak ya. Abo tẃirokno khlaiwi’-no omo hai khe tongthai klai-o.

⁴³“Pharisairok, norok bwswk se hamya sitra no! Norok thumnogo buini slái bwskango achukna nai-o, hati-haba-o bui bai khulumjakna nai-o.

⁴⁴Norok bwswk se hamya sitra no! Norok wng kha simalwng hwnwi saui man yaui bororok him laiwi tongmani abo tẃi simalwng hai.”

⁴⁵Kerong phrwngnai khoroksa bono hai hwnwi sa kha, “Hodakra, o kók saui nwng chwngno suda lachi rw kha.”

⁴⁶Jisu hai hwnwi sa kha, “Kerong phrwngnairok, norokbo bwswk se hamya sitra no! Norok buini phikungo poja hilik boksaui simi rw-o, chubana hwnwi le yasichuk bai suda érwi nai ya.

⁴⁷Norok bwswk se hamya sitra no! Norokni chuchusong aswk diyari butharmani norok a diyarirokni mangkhorno naithok khe snamo.

⁴⁸Norok abo hai’-no norokni chuchusong samung tongmano kaham hwnwi gosi-o; bórok khe diyarirokno buthar kha, norok khe simalwng tisa kha.

⁴⁹Aboni bagwi Kaitorni Elem hai hwnwi sa kha, ‘Ang bórokni thani diyari bai ani kók sanairokno rohor anw. Bórok baksano buthar anw, baksano sátok anw.’

⁵⁰Aboni bagwino takchengjak phuruni simi aswk diyarirokni thẃi kochok rwmani majra tabukni bororokni sago klainai, Abelni simi mareui háyá bai nokthar kwcharo butharjaknai Sakariani thẃini majra tabukni bororokni sago klainai. Au, ang norokno o kók sa-o, tabukni bororokni sago bebak majra klainai!

⁵¹

⁵²“Kerong phrwngnairok, norok bwswk se hamya sitra no! Elem nokni surani norok yapha-o naui ton kha; norokbo bisingo hap ya, hapna nainairoknobo hap rw ya.”

⁵³Jisu aroni ongkhorwi tháng kheno Kerong phrwngnairok tei Pharisairok bono seja lai kha; bo tháisa swk kók cha ya sa khe bono khẃi-o kwcha rwna hwnwi bórok bono podrepot kók sẃng lai kha.