Read Kok Borok LUK 13 Bible Online

LUK 13 - Kok Borok bible

LUK 13

¹Aphuru’-no aro tongnai baksa borok Jisuno Galilini khoroknwi khoroktham borokni kók saui khna rw kha. Galilini a bororok Kaitorni thani rathar phuru Pilat bórokno buthar kha.

²Jisu bórokno hai hwnwi sa kha, “Abo hai khe butharjakma bai bórok Galilini tei bororokni slái sumsok gwnang hwnwi da norok khá ka?

³Hai ya! Ang norokno o kók sa-o, sumsok yakar ya khe norokbo bebak’-no abo hai’-no komornai.

⁴Siloamo nok kuchuk bai sinchrepjagwi a thwinai chicharrok bórokni le tamo sla? Jerusalemo tongnai tei bororokni slái bórok teibo borok hamya hwnwi da norok khá ka?

⁵Hai ya! Ang norokno o kók sa-o, sumsok yakar ya khe norokbo bebak’-no abo hai’-no komornai.”

⁶Aphuru Jisu o rwngthomano sa kha, “Borok khoroksani angur bari-o khwichang phangsa tongmani. Salsa bo khwichang khakna naiwi tháisa phano man li ya.

⁷Aboni bagwino bo bari nainaino hai hwnwi sa kha, ‘Nai di, nokha bisiktham káui tháng kha, o khwichang buphango khwichang khakna naiwi tháisa phano man phai ya. Omono tanwi khibi di. Tamo wngwi kwrwi-kwrwini bo aro ha tos kusubwi tongjaknai?’

⁸Bari nainai hai hwnwi sa kha, ‘Nokphangsa taklai bisa tong gra di. Ang yaphango ha chogwi phas rwui nai anw.

⁹Khali thái khe ba kahamno, thái ya khe ba tanwi khibi di.’ ”

¹⁰Salsa Sabat salo Jisu thumnogo phrwngwi tongmani.

¹¹Aro mwtai hamya kolobjak bwrwi khoroksa tongo, a mwtai hamya bono nokha bisi chichar hamya khiklai ton kha. Bo guji khasuk kha, kisicha phano kepleng khe bachaui man ya.

¹²Jisu bono nugwi hai hwnwi sa hor kha, “Bwrwima, nwng o hamyani yakni yók kha!”

¹³Ahai hwnwi bo bini sago yak bera kha, hakhe logi logi’-no a bwrwi kepleng khe bachaui Kaitorno lob kha.

¹⁴Sabat salo Jisu hamya ham rwma bagwi thumnokni hoda jolijagwi lukuno hai hwnwi sa kha, “Samung tangna bagwi nokha saldok tongo. Ham rwjakna khe a sal dokni bisingo se ham rwjak phai di, Sabat salo ya.”

¹⁵Hakhe Subrai bono hai hwnwi sa kha, “Phatrarok! Sabat salo musukno eba koraino guai nokni khengwi twi khan rwna bagwi tháng ya abo tẃi borok norokni bisingo sabo tong?

¹⁶O bwrwima bo Abrahamni bwsajwkno bla. Soitan bono nokha bisi chichar kolobwi tong kha. Hai khe Sabat salo bono Soitanni yakni phiyókmani chajak li ya diba?”

¹⁷Bini o kók bai bini kena arirok lachi kothro kha, phiya bebak bororok khe bini aswk uanamasingcha samung nugwi tongthokjak bai kha.

¹⁸Jisu hai hwnwi sẃng kha, “Kaitorni ha bubo tẃi? Ang abono tamo bai sunai?

¹⁹Omo horua bwchlwi hai se. Borok khoroksa abono bini bari-o kái kha. A bwchlwi achaiwi torwi-logwi buphang wng kha. Hakhe toksa-toktẃirok bini bedego bothop thum phai kha.”

²⁰Jisu hai hwnwi tei uáisa sẃng kha, “Kaitorni hano ang tamo bai sunai?

²¹Omo chuan hai se. Bwrwi khoroksa abono mai balingsa-o sablu-ui bulma le bebak mai se lomwi tháng kha.”

²²Jisu Jerusalem bwkhak tháng tẃi kamirogo taunrogo phrwng lang kha.

²³Borok khoroksa bono hai hwnwi sẃng kha, “Hodasa, mwthangjaknai bororok báng tha ya da?” Jisu bórokno hai hwnwi sa kha,

²⁴“Dugar kesep tẃi’-no hapna bagwi káphra di. Ang norokno o kók sa-o, borok kwbángma hapna nai anw, hai phano habwi man glak.

²⁵Nokphang bachaui dugar berepnai, hakhe norok phataro bachaui dugar bu-ui ‘Nokphangsa, chwngno dugar phiyogwi rw di,’ hwnwi sa phuru bo hai hwnwi sa anw, ‘Norok buroni ang saui man ya!’

²⁶Norok aphuru hai hwnwi sa phir anw, ‘Nwng bai chwng chá lai kha nung lai kha, chini arorogo nwng phrwng phai kha.’

²⁷Bo hai’-no hai hai hwnwi sa anw, ‘Norok buroni ang saui man ya. Ani oroni tháng di, chengtarok!’

²⁸Abraham, Isak, Jakob tei diyarirokno norok Kaitorni ha-o tongma nuk anw, yang norok khe phataro rwkhlai rwjak. Aphuru norok ua hului ma kap anw.

²⁹Salkabaini, salthángbaini, salsibaini tei salgrabaini phaiwi bororok Kaitorni hani panda-o achuk phai anw.

³⁰Aphuru nai di, tabukni uklokrok swkang wng anw, phiya tabukni swkangrok uklogo klai anw.”

³¹Aphuru’-no Pharisai khoroknwi khoroktham Jisuni thani phaiwi hai hwnwi sa kha, “Nwng oroni ongkhorwi tháng di, Herod nono butharna naiwi tongo.”

³²Jisu bórokno hai hwnwi sa kha, “A siyalsano saui di, ‘Tini bai khwna ang mwtai hamya rwkhlainai, hamya ham rwnai, salthamni salo ani samung páinai.’

³³Ang thángna bwkhak ang ba tinibo, khwnabo, sonibo ma himnai; Jerusalemno karwi tei kubun jaga-o diyari butharjak anw abo wngwi man ya.

³⁴“O Jerusalem, Jerusalem! Diyarirokno nwng butharo, nini thani Kaitor bai rohorjaknairokno holong khitaro. Tokma bini bwkrang tola-o toksarokno koroui tonma hai ang bwswk se nini borokno yak kwbagwi tonna nai kha; nwng abo hai khlai rw li ya.

³⁵Tabuk norokni nok khibijak súk anw. Ang norokno o kók sa-o, ‘Subraini mungwi phainaino Kaitor hamari rw thung, hwnwi sa ya sak norok ano tei nuk glak.’ ”