Read Kok Borok LUK 17 Bible Online

LUK 17 - Kok Borok bible

LUK 17

¹Jisu bini sagrirokno hai hwnwi sa kha, “Bororok sumsogo khiklaijakna bagwi be se belokjaknai; tamo khe a beloknai borok bo bwswk se hamya sitrano!

²A borok o chwrai basrarokni bisingo khoroksa swkno sumsogo khiklai khe bono totra-o holongdap kotorma khaui twijlango khiklai rwma se ham kugo.

³Hus khe tong di!” “Nini takhuk sumsok khlai khe bono khorai di, phiya bo sumsok yakar khe bono nakar di.

⁴Nini thani bo salo uáisni sumsok khlai khe, phiya sumsok khlai brúm brúm’-no ‘Ang sumsok yakar kha,’ hwnwi sa phai khe nwng bono ma nakar thai klai-o.”

⁵Chonghorrok Subraino hai hwnwi sa kha, “Chini poitono rak rw di.”

⁶Subrai hai hwnwi sa kha, “Horua bwchlwi swk phano norokni poito tong khe o letok buphangno ‘Phuichajagwi twijlango káijagwi di!’ hwn khe bo norokni kók ma khnanai.”

⁷“Rom di, norokni khoroksani seleng khoroksa tongo. Bo al chuai baiwi eba musuk mwrwk baiwi nogo hap phai kheno a nokphang ‘Hi’n, phai di, mai chá phai gra di,’ hwnwi bono sa da sano?

⁸I’nhi, sanai kha dla! Bo hai hwnwi se sa anw, ‘Ang chánani se sóng gra di; ang chá bai ya sak chango rítuku khaui mai-mui bok di. Aboni ulo nwng chá di.’

⁹A seleng kók khnamasing bai nokphang bono hambai da rw no?

¹⁰Norokni bagwibo abo tẃi’-no, norokno khlai di hwnmani abo khlai baiwi’-bo norok hai hwnwi sa di, ‘Chwng seleng ja se, chini khlaithai simi chwng khlai kha.’ ”

¹¹Jerusalemo tháng phuru Jisu Samaria bai Galili amchoini kwchar tẃi tháng kha.

¹²Kami khungsa-o sók phai phuru biyadi chájak khorokchi bini phaising phai kha. Bórok hakchalo bachaui

¹³hai hwnwi chirikhók kha, “Hodasa Jisu, chwngno khairok jaba di!”

¹⁴Jisu bórokno nugwi hai hwnwi sa kha, “Tháng di, ochairokno thángwi phunugui di.” Hakhe tháng twtwi bórok ham kha.

¹⁵Bórokni bisingo khoroksa sakno hamma nuk kheno Kaitorno sotonwi lob twtwi kiphilwi phai kha.

¹⁶Bo Jisuni yakung yaphango pwtapsa klaiwi bono hambai rw phai kha. Bo Samariani borok.

¹⁷Jisu hai hwnwi sacha kha. “Khorokchino ham rw kha bla tei khorokchuku biyang?

¹⁸O phatarsa simi se Kaitorno lob phai si-o, tei kwrwi kha da?”

¹⁹Hakhe Jisu bono hai hwnwi sa kha, “Bacha di, tháng si di; nini poito nono ham rw kha.”

²⁰“Kaitorni ha bu phuru phainai?” hwnwi khoroknwi khoroktham Pharisairok Jisuno sẃng khe bo hai hwnwi sa kha, “Kaitorni ha pháng-pháng nukjagwi phainai ya.

²¹Aboni bagwino khoroksa phano hai hwnwi sa glak, ‘Iko, nahar di, Kaitorni ha oro se!’ eba khe ‘Uro se!’ Tamni hwn khe Kaitorni ha norokni bisingo se.”

²²Aphuru Jisu bini sagrirokno hai hwnwi sa kha, “Omo tẃi sal phai anw norok Borokni Sajlani mol naina muchungwibo salsa phano nuk glak.

²³Aphuru ‘Uko uro se!’ eba khe ‘Iko, oro se!’ hwnwi bororok norokno sa anw. Hai phano naina hwnwi ta tháng di.

²⁴Nokha philik phuru yaphang buchuk jiliksama hai Borokni Sajlabo bini salo abo hai’-no jiliksanai.

²⁵Tamo khe bo aboni swkang panjalwi’-no sátokjakna nangnai, tabukni bororok bai norjakna nangnai.

²⁶Noani phuru wngma hai’-no Borokni Sajlani phurubo wngnai.

²⁷Noa rungtoro kasa ya sini, phiya twi torwi bebak’-no sokomor ya sini bororok chá lai-o nung lai-o, káijak lai-o kái lai-o.

²⁸Lotni phuru hai’-no aphurubo wngnai. Jotono chá lai-o nung lai-o, pai lai-o phal lai-o, mai-khul sar lai-o, nok huk tang lai-o.

²⁹Lot Sodomni ongkhorwi phaima salo nokhani hór bai gwndwkni uatwi uaui bebak’-no sokomor bai kha.

³⁰Borokni Sajla nukjak phai phurubo abo hai’-no wngnai.

³¹“A salo nuka-o[1] tongnai borok bo noksingo bini manwirok nauina hwnwi ta hap si thung; abo hai’-no kheto-o tongnai borok bo nogo kiphilwi ta phai si thung.

³²Lotni bihikni kókno muitu khe nai di.

³³Kwthang tongna muchungnai borok bo thwinai; phiya thwinai borok bo thangnai.

³⁴Ang norokno o kók sa-o, a horo borok khoroknwi chuki khungsa-o thu-ui tong khe khoroksa tlangjak anw, tei khoroksa klangjak anw.

³⁵Bwrwi khoroknwi mai súk lai tong khe khoroksa tlangjak anw, tei khoroksa klangjak anw.

³⁶[Kheto borok khoroknwi tong khe khoroksa tlangjak anw, tei khoroksa klangjak anw.”]

³⁷“Omorok buro wngnai, Subrai?” hwnwi sagrirok bono sẃng khe bo hai hwnwi sa kha, “Kwthwi tong thani’-no sikruk kuthum anw.”