Read Kok Borok LUK 18 Bible Online

LUK 18 - Kok Borok bible

LUK 18

¹Bórok khá bái yaui suri san máng tong thung hwnwi Jisu aphuru bórokno phrwngna bagwi o rwngthoma sa kha.

²“Taun khungsa-o joj khoroksa tongmani. Bo Kaitornobo kiri ya, boroknobo sak nang ya.

³A tauno’-no randijwk khoroksa tongo. Bo bini thani hai hwnwi koi phai máng tongo, ‘Ani mungwi kwrwi kwrwini kes phnangnaini yakni ano phiyók di.’

⁴Udamsa le bo a randijwkno kiphilwi rohor gra kha; ulo khá bising bising hai hwnwi uansuk kha, ‘Ang Kaitornobo kiri ya, boroknobo sak nang ya phano

⁵o randijwk ano tekto rwui tong phaima bai ang bini kesno kaham khe pái ma rwnai; wng ya khe bo phaiwi máng tongwi ano tekto rwui leng rwnai.’ ”

⁶Subrai hai hwnwibo sa kha, “A joj hamya tamo sa kha khna di.

⁷Hakhe tabuk, Kaitorni thani hopung sapung chuba di hwnwi koi máng tongnai bini a bororokni bagwi Kaitor samung khlai glak diba? Bo omono khlainani le da lerno?

⁸Ang norokno o kók sa-o, bo bórokni bagwi dakti’-no samung khlai anw. Phiya Borokni Sajla o swngcharo phai phuru bo poito gwnang borok da nuk phai no?”

⁹Sakno simi kaham hwnwi khá kaui buino sak nang ya wngnairokno Jisu o rwngthomano sa kha.

¹⁰“Borok khoroknwi suri sanna hwnwi noktharo thángmani; khoroksa khe Pharisai, tei khoroksa khe teks romnai.

¹¹A Pharisai bachaui khá bising bising hai hwnwi suri san kha, ‘O Kaitor, ang bui hai khámainai ya, tatal ya, lupcha ya, aboni bagwi ang nono hambai rw-o; ang u teks romnai hai buya ang nono hambai rw-o.

¹²Ang hati barsa-o uáinwi ubas tongo, ang ajimani kaichi-o kaisa nono rwui tongo.’

¹³Phiya a teks romnai khe kisa hakchalo bacha kha, bo nokhasa naisana suda naisa rak li ya, khaklap simi bu-ui hai hwnwi saui tong ja si-o, ‘O Kaitor ang sumsok gwnang borok, nwng ano khairok jaba di.’ ”

¹⁴Jisu hai hwnwi sa kha, “Ang norokno o kók sa-o, o borok se Kaitor bai kaham hwnwi romjagwi nogo kiphil kha, a Pharisai ya. Tamni hwn khe kotor wngna sadinai borok bo kotoi snamjaknai, phiya kotoi wngna sadinai borok bo kotor snamjaknai.”

¹⁵Jisu chwrairokni sago yak rw thung hwnwi baksa borok chwrairokno bini thani tubu kha. Sagrirok abono nugwi “Ta tubu di,” hwnwi bórokno hwn kha.

¹⁶Tamo khe Jisu a chwrairokno ringwi hai hwnwi sa kha, “Chwrairokno ani thani rohor di, ta kasu di; omo tẃi bororokni bagwino Kaitorni ha.

¹⁷Muitu narwk di; chwrai hai khe Kaitorni hano yachak ya khe khoroksa phano aro habwi se man ya.”

¹⁸Judai bokhorok khoroksa Jisuno hai hwnwi sẃng kha, “O hoda kaham, kwthang tong phlaina bagwi ang tamo khlaithai klai?”

¹⁹Jisu bono hai hwnwi sa kha, “Nwng tamo wngwi ano kaham hwn? Kaitor simi se kaham, tei khoroksa phano kaham kwrwi.

²⁰Nwng kerong dagimano saui mano: ‘Buitali-buitala ta wng di, borok ta buthar di, ta khok di, tatal ta sa di, ma-phano sak nang ya ta wng di.’ ”

²¹A borok hai hwnwi sa kha, “Chwrai phangsni simi’-no ang omorok bebak’-no rákhogwi phai kha.”

²²O kók khnaui Jisu bono hai hwnwi sa kha, “Tabuk phano nwng tei mungsa samung khlaina tong kho. Nini tong kwrwi bebak’-no phal baiwi a rangno kwrwirokno rw di, hai khe chuknoha-o nini rang khatijak anw; omo khlai bai khe nwng ani logi phai di.”

²³A borok abono khnaui belai khá thwijak kha, tamni hwn khe bo le snamwi gwnang bla.

²⁴Bono khá thwijakma nugwi Jisu hai hwnwi sa kha, “Gwnangrok Kaitorni ha-o hapnani bwswk se kutuk!

²⁵Suchi bwlam tẃi mangingang hapna se lai anw ba, Kaitorni ha-o gwnangrok hapnani aswk lai glak.”

²⁶O kók khnanairok bono hai hwnwi sẃng kha, “Hai khe sabo mwthangjaknai sla?”

²⁷“Borok khlai man yano Kaitor khlai mano,” hwnwi Jisu sa kha.

²⁸Hakhe Pitor hai hwnwi sa kha, “Nai di, chwng nok-huk khibi baiwi nini logi phai kha.”

²⁹Jisu bórokno hai hwnwi sa kha, “Ang norokno sói kókno sa-o, Kaitorni hani bagwi nok-huk, hik-sa, tai-takhuk, buma-bupha, chwrai-khonaino khibinai borok

³⁰bo o molo aboni slái phano kwbángma mannai, phiya phainai molo mwthangjak phlainai.”

³¹Jisu sagri chiknwirokno simi tlangwi hai hwnwi sa kha, “Khna di, chwng tabuk Jerusalemo thángnai; arono Borokni Sajlano tẃi diyarirok swi langmani abo jotono nang phainai.

³²Buini bororokni yago bo yapharwi rohorjaknai; bórok bono mwnwinai, lachi rwnai, phiya khuktwi musunai.

³³Bórok bono swpraknai, hakhe butharnai, hai phano salthamni salo bo thangwi bachanai.”

³⁴Sagrirok bo samano tháisa phano romwi man li ya. Omo tamni kók abo bórokno khogwi ton kha, aboni bagwino Jisu tamo sa kha bórok saui man li ya.

³⁵Jisu Jeriko sók phai twtwi wng kha, aphuru bigra phula khoroksa lama gana-o achugwi bírwi tongo.

³⁶Borok kwbángma himma sari khnaui a bigra “Abo tamo?” hwnwi sẃng kha.

³⁷“Nasaretni Jisu phai-o,” hwnwi bórok bono sa kha.

³⁸Hakhe bo hai hwnwi chirikhók kha, “O Jisu, Daudni Sajla! Nwng ano khairok jaba di!”

³⁹Bwskangni bororok bono “Ta kutuk di,” hwnwi damrok rwrwk bo teibo sotonwi “O Daudni Sajla, nwng ano khairok jaba di!” hwnwi chirikhók rwrwk.

⁴⁰Hakhe Jisu bathagwi “A phulano ani thani tubu di,” hwnwi dagi kha. Bo gana-o phai phuru Jisu hai hwnwi sẃng kha,

⁴¹“Nwng tamo nai? Ano tamo khlai di hwn?” “Hodasa, ang mokol nuk phina muchungo,” hwnwi bo sa kha.

⁴²“Nuk di! Nini poito nono nuk rw kha,” hwnwi Jisu bono sa kha.

⁴³Bo logi logi’-no nuk kha, hakhe Kaitorno lob twtwi Jisuni logi-o tháng kha. Aswk bororok abono nugwi Kaitorno lob bai kha.