Read Kok Borok LUK 19 Bible Online

LUK 19 - Kok Borok bible

LUK 19

¹Jisu Jeriko-o habwi taun kwchar tẃi himwi thángmani.

²Aro Sakai hwnwi teks romnai bokhorok khoroksa tongo, bo rang gwnang.

³Jisu sabo hwnwi naina káphrauibo lukuboniani bai aswk borogo bo nuhur li ya.

⁴Hakhe bo khachigwi thángwi Jisu phaima lama-o bono naina hwnwi khwichang buphango kasaui kha.

⁵Jisu aro sók phai khe naisaui Sakaino hai hwnwi sa kha, “Sakai, dakti ongkhorwi phai di; ang nini nogo tini ma tongwinai.”

⁶Bo dakti ongkhorwi belai tongthokjagwi Jisuno nogo kasa rw kha.

⁷Abono nuknairok bebak’-no hunu-hanai khe hai hwnwi sa lai kha, “Basijakni nogo se o borok tongna hwnwi thángo!”

⁸Yang khe Sakai bachaui Subraino hai hwnwi sa kha, “Hodasa, nai di, ang joto tongmani aboni bere khaksa ang kwrwirokno rw anw. Ang khoroksa swkno phemlokma tong khe tei uáibrwi bono su phir anw.”

⁹Jisu bono hai hwnwi sa kha, “O nokni borok tini mwthangjak kha; o borokbo Abraham bosongni borok.

¹⁰Borokni Sajla kwmanairokno se naitugwi mwthangna phai-o.”

¹¹Bororok o kók khnaui tong phuru Jisu rwngthomabo tháisa sa kha. Bo Jerusalemo sók phai twtwi wngma bai se Kaitorni ha tabuk’-no nukjaknai hwnwi bororok khá ka kha.

¹²Aboni bagwino bo hai hwnwi sa kha, “Borok kotor khoroksa bugra chá rwjagwi phaina hwnwi hakchalma kwrẃngsa-o tháng kha.

¹³Bo nokni ongkhorwi thángna phuru bini seleng khorokchino ringwi rangchakni rang khoksa khoksa[2] khe rwui hai hwnwi saui klang kha, ‘Ang phai ya sak norok omo bai bwswk bepar thwngwi man thwng sok di.’

¹⁴Yang le bini hani bororok khe bono naislerjago. Aboni bagwino bo tháng bai khe bórok borok rohorwi hai hwnwi sa rw hor kha, ‘O borok chini bugra wng thung chwng abo nai ya.’

¹⁵“A borok kotor bugra chá rwjagwi kiphilwi phai kha. Phai kheno bo rang klangmani selengrok bepar thwngwi bwswk ajiui man kha saui manna bagwi bórokno ring rw hor kha.

¹⁶Khoroksa hai hwnwi sa phai kha, ‘Nokphangsa, nwng klangmani khoksa bai ang khokchi aji sok kha.’

¹⁷Bo hai hwnwi sa kha, ‘Kaham khlai kha, nwng seleng kaham! Samung kotoino kaham khe khlaima bai nwng taun khungchini bokhorok wng di.’

¹⁸Tei khoroksa seleng hai hwnwi sa phai kha, ‘Nokphangsa, nwng klangmani khoksa bai ang khokba aji sok kha.’

¹⁹Bo bono hai hwnwi sa kha, ‘Nwng taun khungbani bokhorok wng di.’

²⁰Tei khoroksa seleng hai hwnwi phaiwi sa kha, ‘Nokphangsa, iko nini rang; ang omono rí-kundri khaui huiwi ton sok kha.

²¹Nwng maya kwrwi borok hwnwi ang nono kiri-o. Nini ya phano nwng na-o, nwng mai káima ya phano nwng ra-o.’

²²Bo bono hai hwnwi sa kha, ‘Seleng hamya nwng! Nini kók bai’-no ang nono kha anw. Ang maya kwrwi hwnwi nwng saui mano, ani ya phano na-o, ang mai káima ya phano ra-o hwnwi nwng saui mano.

²³Hai khe tamo wngwi nwng ani rangno buino phano lakai rw ya sla? Hakhe ang kiphilwi bwsa bai buma bai man phai kha mun.’

²⁴Bo aphuru khe aro bachaui tongnairokno hai hwnwi sa kha, ‘Bini yakni a rangno naui khokchi gwnang a selengno rw di.’

²⁵Bórok bono hai hwnwi sa kha, ‘Nokphangsa, bini ba khokchi’-no tong bla.’

²⁶Bo bórokno hai hwnwi sa kha, ‘Ang norokno o kók sa-o, gwnangno teibo rwjak anw, phiya ba kwrwini khe kisa tongma suda bini yakni najak anw.

²⁷Tabuk, ano bugra hwnwi gosina nai ya ani kena arirokno oro tubu-ui ani bwskango rathar phai di!’ ”

²⁸Jisu omono saui Jerusalem bwkhak bórokni swkang swkang him kha.

²⁹Tháistwi hatháini Betphagi bai Bethania gana sók phai phuru

³⁰bo sagri khoroknwino hai hwnwi saui rohor gra kha, “Bwskangni u kami-o tháng di. Norok aro sógwima logi’-no khoroksa bai phano kasajak ya kho abo tẃi korai masa nugwi anw. Abono khengwi oro tubu-ui phai di.

³¹‘Norok tamo wngwi omono kheng?’ hwnwi khoroksa swk sẃng khe, ‘Hoda omono samung nangjago,’ hwnwi sa di.”

³²Rohorjaknai a sagrirok aro thángwi Jisu sama hai’-no nugwi kha.

³³Bórok a koraino khengwi tong phuru “Norok tamo wngwi omono kheng?” hwnwi koraini nokphangsong sẃng kha.

³⁴“Hoda omono samung nangjago,” hwnwi saui

³⁵bórok a koraino Jisuni thani tubu-ui phai kha. Hakhe bórok a koraini phikungo bórokni rí phinwi a saka-o Jisuno kasa rw kha.

³⁶Jisu korai kasaui bwskango tháng phuru bororok lama-o bórokni rí boui rw lai kha.

³⁷Tháistwi hatháini lama tokhlai phaimani jidolo, Jerusalem gana Jisu sók phai kheno sagrirok kwbángma aswk phan kwrakni samungrok nukma bai tongthokjagwi sotonwi Kaitorno hai hwnwi lob lai kha,

³⁸“Subraini mungwi phainai bugrano Kaitor hamari rw thung! Chuknoha-o tongnairok ham thung, Kaitor ba chẃngsacha wng thung!”

³⁹Aphuru luku bisingni khoroknwi khoroktham Pharisai Jisuno hai hwnwi sa hor kha, “Hodakra, nini sagrirokno ta kutuk di hwn di!”

⁴⁰Jisu hai hwnwi sa kha, “Ang norokno o kók sa-o, bórok kutukma thak khe holongrok se chirikhóksa anw.”

⁴¹Bo Jerusalem gana-o sók phai phuru abono nugwi kap twtwi hai hwnwi sa kha,

⁴²“Kahamni bagwi tamo nangwi tong kha tini phano nwng omono saui manma te! Tamo khe abo tabuk nini mokol kotonjak.

⁴³Omo tẃi sal nini oro phai anw, nini kena arirok choba nang laina bagwi yang yang haplok tisa phai anw, nono chorsa gerebwi phai anw, nono kasu phai anw.

⁴⁴Hakhe nwng bai bini oro tongnairokno bórok sokomor súk anw; holong saka holong dulsa phano bórok narwk glak, tamni hwn khe Kaitor nono mwthangna phaimani abono nwng saui man li ya.”

⁴⁵Jisu noktharo habwi bepar thwngnairokno hai hwnwi saui rwkhlai kha, “Elembago ‘Ani nok suri sanjaknai nok hwnjaknai,’ hwnwi Kaitor samani kók swijak tongo. Yang norok le omono dagait bothop se snamwi tong kha!”

⁴⁶

⁴⁷Jisu aphuru noktharo sal brúm brúm phrwngo. Ochai okrarok tei Kerong phrwngnairok bono butharna lama naituk lai kha, luku bokhorokrokbo abo hai’-no naituk lai kha.

⁴⁸Tamo khe lukurok bini kókno tháisa karjak ya tẃi khnaui tongma bai bórok bono bahai khe butharnai buma manjak ya wngwi tong lai kha.