Read Kok Borok LUK 20 Bible Online

LUK 20 - Kok Borok bible

LUK 20

¹Salsa Jisu noktharo lukuno phrwng twtwi Kothoma Kaham pírwi tong phuru okra chakrarok bai baksa ochai okrarok tei Kerong phrwngnairok phaiwi

²bono hai hwnwi sẃng phai kha, “Chwngno sa di, nwng bu phan bai omo tẃirokno khlai? Omo tẃirokno khlaimani phan nono sabo rw kha?”

³Jisu bórokno hai hwnwi sa kha, “Angbo norokno kók tháisa sẃngnai. Norokbo sa di,

⁴Johon baptisma rwmani phan le Kaitorni aroni da, borokni aroni?”

⁵Hakhe bórok kiching bórok hai hwnwi sẃng lai kha, “Chwng tamo sanai? ‘Kaitorni aroni,’ hwnwi sa khebo, ‘Norok tamo wngwi ahai khe Johonno poito khlai ya sla?’ hwnwi bo chwngno sẃngnai.

⁶Phiya ‘Borokni aroni,’ hwnwi sa khebo aswk bororok chwngno holong khitarnai, tamni hwn khe bórok Johonno diyari hwnwi tong lai-o.”

⁷Aboni bagwino bórok hai hwnwi sa kha, “Abo buroni chwng saui man ya.”

⁸Jisu bórokno hai hwnwi sa kha, “Bu phan bai omo tẃirokno khlai angbo hai khe norokno sa ya.”

⁹Jisu lukuno o rwngthomabo sa kha, “Borok khoroksa angur káimani. Bo a angur barino munirokni yago klangwi balogwi tongna hwnwi beraina tháng kha.

¹⁰Angurni jora phuru bo bini banta angur na rw rohorna hwnwi seleng khoroksano a munirokni thani rohor kha. Yang le munirok a selengno bu laiwi yak bukcha khe kiphilwi rohor kha.

¹¹Hakhe bo tei khoroksa selengno rohor khua. A munirok bonobo bu laiwi lachimasingcha khe yak bukcha khe rohor kha.

¹²Hakhe bo uáithamni jora tei khoroksa selengno rohor khua. Munirok bonobo kwsa-komok cha rwui barini kari lai rohor kha.

¹³Hakhe angur barini nokphang hai hwnwi sa kha, ‘Tabuk ang tamo khlainai? Khájani angslano rohor anw; bono le bórok sak ang ya wng glak!’

¹⁴Bono nuk kheno munirok hai hwnwi sa lai kha, ‘Omo nokphangni bwsla se bla. Phai di, chwng bono buthar lai anw, hakhe buphani sompoti chini yago klai anw.’

¹⁵Aboni bagwino bórok bono barini kariui buthar lai kha. “Hakhe a munirokno nokphang tamo khlai no?” hwnwi Jisu sẃng kha.

¹⁶“Bo phaiwi a bororokno buthar baiwi buini yago angur bari rw anw.” Lukurok o kók khnaui “Omo hai ta wng ja thung!” hwnwi sa kha.

¹⁷Jisu bórokno naisigwi hai hwnwi sẃng kha, “Hakhe elembago omo tamni kók? “ ‘Nok tangnairok samung nang ya hwnwi khibiui rwmani holongthai abo’-no wng phai kha nok busuni holongthai.’

¹⁸O holongthai-o klainai borok bo phindrik phandrak wngnai, phiya o holongthai khoroksa swkni saka klai khe a borok kepeknai.”

¹⁹Kerong phrwngnairok bai ochai okrarok Jisuno arono romna nai lai kha, tamni hwn khe bo o rwngthoma bai bórokno kók khitarwi hwno hwnwi saui man kha; tamo khe bórok lukuno kiriui tong gra kha.

²⁰Aboni bagwino bórok bwlam naitugwi tong lai kha. Bórok Jisuno khẃi-o kwcha rwna hwnwi borok khoroknwi khorokthamno rang tuksonwi borok kaham hai khe Jisuno kók sẃng phenek di hwnwi rohor kha. Hakhe bórok bo bujni bagwi gobornorni yago yapharwi man anw.

²¹A siadirok Jisuno hai hwnwi sa kha, “Hodakra, nwng sama bai phrwngmani abo bebak sói se hwnwi chwng si-o. Keboni bumukhang naisik yaui nwng Kaitorni lamani kókno sói khe phrwngo.

²²Hakhe chwngno sa di, Rumni bugra kotorno teks rwmani abo chini Kerong swbaima da klai?”

²³Jisu bórokni phemlokmano saui manẃi hai hwnwi sa kha,

²⁴“Rukphaini rang kaisa ano phunuk phai di. Omo saboni bumukhang? O bumung saboni?” “Bugra kotorni,” hwnwi bórok sa kha.

²⁵Jisu hai hwnwi sa kha, “Hakhe ba bugra kotorni manthaino bugra kotorno rw di, phiya Kaitorni manthaino Kaitorno rw di.”

²⁶Aswk bororokni bwskango bo kók samano bórok cha ya hwnwi man li ya, hakhe bo samano se uanajagwi siring siring khe tong si-o.

²⁷Sadukai khoroknwi khoroktham Jisuni thani phai kha. (Bórok wng kha kwthwirok thangwi bacha ya hwnwi sa lainairok.) Bórok bono hai hwnwi sẃng kha,

²⁸“Hodakra Musi chini bagwi Kerongo hai hwnwi swiwi klang kha: ‘Khoroksa swk bwsa man ya sini bihikno klangwi thwi tháng khe bini bosongno narwkna bagwi a randijwkno a borokni buphayung nok phirogwi na thung.’

²⁹Rom di, takhuksnirok tongmani. Okra káijagwi bwsa man yaui’-no thwi kha.

³⁰Aboni ulo tei takhuksa a bwrwino nok phirok khu a,

³¹phiya bini ulni tei takhuksa a bwrwino na khua. Abo hai khe máng bórok takhuksni a bwrwino naui bwsa man yaui’-no thwiwi tháng bai kha.

³²Ulo khe a bwrwibo thwi kha.

³³Tabuk, kwthwirok thangwi bacha phuru a bwrwi saboni bihik wngna klai? Bórok takhuksni’-no bono na lai kha.”

³⁴Jisu bórokno hai hwnwi sa kha, “O molni bororok se káijak lai-o kái lai-o.

³⁵Tamo khe kwthwini thangwi bachaui phainai molo tongna chúknairok bórok káijak lai ya kái lai ya.

³⁶Bórok tei thwiwi man ya, bórok suarirok hai; bórok kwthwini thangwi bachama bai bórok Kaitorni bwsa.

³⁷Kwthwirok mwthangwi tisajakmano Musi suda phunuk lang kha. Elembago satasuta khamwi tongmani kogo bo Subraino ‘Abrahamni, Isakni tei Jakobni Kaitor’ hwnwi sa lang kha.

³⁸O kók wng kha ahai, bo kwthangrokni Kaitor se, aboni bagwino borok thwi tháng phano kwthang tongo; bebakno bini thani kwthang.”

³⁹Khoroknwi khoroktham Kerong phrwngnairok “Hodakra, nwng kók kahamno sa kha,” hwnwi sa cha kha.

⁴⁰Tamni hwn khe Sadukairok Jisuno tei sẃng phina phano sẃng rak li ya.

⁴¹Jisu bórokno hai hwnwi sa kha, “Masia Daudni bwsa hwnwi bororok bahai khe sa lai bai?

⁴²Tamni hwn khe Lobmungo Daud sakphang’-no hai hwnwi sa lang kha, “ ‘Subrai ani Subraino hai hwnwi sa kha: Achuk di oro ani yagra bwkhak,

⁴³khlai ya sak ang nini kena arirokno yakung yaphangni yakung bokjaknai.’

⁴⁴“Daud se bono, ‘Subrai’ hwnwi hwn khe Masia bahai khe bini bwsa wngwi mannai?”

⁴⁵Bebak bororok bini kók khnaui tong phuru Jisu bini sagrirokno hai hwnwi sa kha,

⁴⁶“Kerong phrwngnairok bai hus khe tong di. Bórok liling lala kanna khá tungo; hati-habarogo khulumjakna muchungjago: thumnokrogo buini slái bwskango achukna nai-o, pandarogo khamplai kahamo achukna nai-o.

⁴⁷Bórok randijwkrokni nok-huk monok baiwi saka saka simi tángma-tángsa khe suri sanwi phunugo. Bórok belai khe yagul sujaknai.”