Read Kok Borok LUK 21 Bible Online

LUK 21 - Kok Borok bible

LUK 21

¹Jisu naharwi nai ba gwnangrok noktharni rang tonjaknai japa-o Kaitorni mungwi rang rwui tong lai-o.

²Belai bigra randijwk khoroksano lepnwi rwui tongmabo bo nuhur kha.

³Hakhe Jisu hai hwnwi sa kha, “Ang norokno o kók sa-o, o randijwk se bebakni slái rw kuk kha.

⁴Bui le kwbángmani mukhi swk khái rw-o; o randijwk le kwrwi twtwi chána ajimano se bebak rw bai kha.”

⁵“Holong milik milik bai tei Kaitorno yapharjakmani manwirok bai o nokthar bwswk se naithogwi tong kha,” hwnwi khoroknwi khoroktham borok sa laiwi tong laimani.

⁶Hakhe Jisu hai hwnwi sa kha, “Tabuk norok aswk manwi nugwi tong dla, omo tẃi sal phai anw, holong saka-o holong dulsa phano tong glak, joto swbaiwi khibijak anw.”

⁷Bórok hai hwnwi sẃng kha, “Hodakra, omo hai bu phuru wngnai? Wngna phuru bubo tẃi tamo phunukjak granai?”

⁸Jisu hai hwnwi sa kha, “Hus khe tong di, lama ta koró rwjak di. Baksa baksa ani mungwi ‘Ang’-no bo!’ eba khe ‘Mol sók phai kha!’ hwnwi sa phai anw. Bórokni kók ta na di.

⁹Norok choba bai urumuruni kók khna pha’-no ta kiri di; omo hairok ma wng granai’-no, tamo khe aphurubo o mol pái glak kho.”

¹⁰Bo hai hwnwibo sa kha, “Dopha bai dopha choba nang lai anw, ha bai ha nang lai anw;

¹¹bangla kotor koromsaui phai anw, kwrẃngsa kwrẃngsa-o asari nang anw, boyar kwthwng sip anw; podrepot kirimasingcha wng anw, phiya nokha-o uanamasingcha manwirok nukjak anw.

¹²Omorok wng ya sini norok khajak anw, sátokjak anw; norok thum nokrogo bujni bagwi tlangjak anw, alongo chopjak anw; ani bagwi norok bugra bai bokhorokrokni thani tubujak anw.

¹³Aphuru norok ani kók sanani lama man anw.

¹⁴Buj thumjak phuru tamo tamo sana nangno abono swkang baira uana ya hwnwi norokni bwkhano chap di.

¹⁵Tamo khe ang’-no norokno si rwui norokni búkhúgo omo tẃi kók rw anw, norokni kena arirok abono in’-hi hwnwi saui man glak.

¹⁶Norokni ma-phasong, takhuksong, sandai-masakrok tei bayaprok bai suda norok yapharwi rohorjak anw; norokni bisingo baksa butharjak anw.

¹⁷Ani bagwi norok joto bai naislerjak anw,

¹⁸tamo khe norokni bwkhnai twngsa phano kwma glak.

¹⁹Kwrak khe tong di, hai khe se norok mwthangjaknai.”

²⁰“Sengkrak bai sengkrak khe Jerusalemno chorsa gerepsajak nuk phuru bo sokomorjakna sampha kha hwnwi norok saui man anw.

²¹Aphuru Judia-o tongnairok hathái bwkhak khárwi tháng thung; o tauno tongnairok phataro ongkhor thung; kami-o tongnairok taun bisingo ta hap thung.

²²Tamni hwn khe abo ‘Yagul sumani sal,’ a salono Elembago swijakrok bebak nang phainai.

²³A salo sakderiya bai sak gwnangmarokni bwswk se birman wng jano! Belai digi-sigini sal o ha-o phai anw, o dophano Kaitor jolijagwi yagul su anw.

²⁴Baksa seng bai tanwi butharjak anw, baksa ba buini harogo khaui tlangjak anw, phiya buini bororok bórokni mol pái ya sak Jerusalemno kádul lai anw.”

²⁵“Sal, tal tei athukirini bising tẃi uanamasingcha manwirok phunukjak anw. Swngcharo aswk hani bororok khá thwijak bai anw, twijlang kutuksaui phaima bai bwkha kwlwisa anw.

²⁶O swngchar gwnangwi phaina hwnmano uansugui naising twtwi’-no bororok kirima cháui phola bomjak glak, tamni hwn khe nokha gwnangwi jangrijak anw.

²⁷Aphuruno Borokni Sajla nukjak phai anw, bo chumui-o khe belai phankrak wngwi chẃngsacha khe phai anw.

²⁸Omorok wng kheno norok bokhorok tisaui bacha di, tamni hwn khe norok yóknani kasu kha.”

²⁹Aphuru Jisu bórokno o rwngthoma sa kha, “Khwichang buphangno eba khe kubun buphangrokno nahar di.

³⁰Bórokni bwlái rotomma nuk khe tangbla sampha kha hwnwi norok saui mano.

³¹Omo hai kheno norok omo tẃirok wngma nuk khe aphuru Kaitorni ha phaina nai kha hwnwi khá ka di.

³²“O kókno muitu narwk di, o molni bororok thwi bai ya sini’-no omorok wng anw.

³³Ha bai nokha se kwma anw ba, ani kókrok kwma glak.”

³⁴“Chána-nungna, chuak-maikham, swngcharni uanama-uansukma norokno kolobwi man ya tẃi norok hus khe tong di. Wng ya khe norokni thani a sal achomsa phano phaina tongo.

³⁵Tamni hwn khe swngcharo tongnai bebak bororokni thani a sal choka hai chakjagwi phai anw.

³⁶Norok o wngma hwnmarokni bising tẃi kwrak khe tongwi Borokni Sajlani bwskango bachaui manna tẃi khe sichaui tong di, suri san máng tong di.”

³⁷Aphuru Jisu sal salo noktharo phrwngo, hor horo khe Tháistwi hathái-o thángwi tongwi-o.

³⁸Bebak borok bini kók khnana bagwi aichukni simi no noktharo thángwi tongwi lai-o.